Klei Aê Diê Blŭ: Klei Bi Hriêng 23:12-14
Êlan kliăng: “Hŏng jih ai tiê duah klei hriăm, leh anăn mđing knga kơ klei thâo săng.” (Klei Bi Hriêng 23:12)
Klei êmuh ksiêm mĭn: Si klei mtao Y‑Salômôn kñăm kơ klei mtô lač anak? Si Klei Bi Hriêng lač kơ klei mtô hŏng klei čăm hŏng giê? Si drei thâo săng kơ bruă klam hlăm klei mtô lač anak?
Mtao Y‑Salômôn kñăm kơ klei mtô lač anak, atăt gai diñu mđing knga kơ klei thâo săng. Pruê̆ blŭ “hŏng jih ai tiê” leh anăn “mđing knga” kñăm kơ klei mă tŭ klei bi hriăm klă nik, tliêr kjăp. Hŏng phung anak adôk điêt ƀiădah mrưh, khăng kŏ, brei mkra mjuăt hŏng klei hriêt kjăp phĭt. Boh blŭ “duah klei hriăm” (êlan 12) hlăm klei blŭ phŭn klei Hêbrơ ăt mblang jing “mkra bi kmhal” (êlan 13), kyuadah klei bi hriăm mâo jih hlăm anăn wăt klei mtô lač leh anăn klei mkra mjuăt hŏng giê hnuăt, djŏ hŏng mbĭt sa klei kñăm jing atăt gai, mtô lač. Klei mtô “čăm hŏng giê hnuăt” hŏng phung anak mrưh, khăng kŏ amâo gưt asăp, amâo djŏ tŭ ư hŏng klei bi kmhal asei mlei anak, ƀiădah mkhư̆ mgang đăm anak lŏ ngă klei soh ôh. Klei mtô lač bi êdah bruă klam klei bi hriăm leh anăn mkra mjuăt anak kjăp phĭt. Ƀuah mkra anak amâo djŏ ôh čiăng bi hrăp klei ăl ngêñ pô, ƀiădah mâo klei kñăm klă mngač, čăm hŏng giê hnuăt ngă bi ruă asei mlei, ƀiădah đru kơ anak weh đuê̆ mơ̆ng êlan phung jhat ƀai, tlaih mơ̆ng phung blŭ klei wê (Klei Bi Hriêng 2:12), leh anăn klei yuôm hĭn jing “bi mtlaih mngăt ñu mơ̆ng ƀuôn phung djiê” (êlan 14).
Hruê anei, năng ai mâo lu mnuih bi kdơ̆ng hŏng Klei Aê Diê Blŭ mtô kơ klei mtô anak hŏng giê hnuăt. Ƀiădah lĕ, brei kñăm klă Klei Bi Hriêng lač kơ klei mkra mjuăt anak hŏng giê hnuăt amâo djŏ mtrŭt amĭ ama ngă kơ anak hŏng klei măk ƀai ôh, knŏng yua giê hnuăt yơh amâodah čăm anak hŏng giê hnuăt êjai mmông ăl ngêñ, ƀiădah yua giê hnuăt hŏng phung anak mrưh, khăng kŏ jing yuôm čiăng ƀư̆ mkra anak.
Phung đưm khăng lač: “Anak jhat mơ̆ng amĭ, čô jhat mơ̆ng aduôn”, klei blŭ anei čiăng lač, bi lĕ klei soh kơ amĭ kơ aduôn mtô anak čô ênưih đei, hơiêng đei tơl phung anak čô ƀrư̆ ƀrư̆ dlăng hơăi mang kơ klei ngă soh, jing phung jhat, amâo tŭ, mrưh, khăng kŏ. Ƀiădah lĕ, Klei Aê Diê Blŭ mtô hlăm Klei Bi Hriêng snei, wăt amĭ hŏng ama mâo bruă klam sơăi kơ klei mtô bi hriăm anak pô (Klei Bi Hriêng 1:8; 6:20), tơdah lui anak jing mnuih jhat, wăt ama amĭ tŭ bruă klam msĕ sơăi ti anăp Khua Yang.
Jing phung đăo kơ Krist, wăt tơdah drei jing phung aê aduôn amâodah amĭ ama, brei mâo bruă klam sơăi hŏng phung anak čô, jing ngăn dưn Aê Diê jao kơ drei, brei mâo bruă klam hŏng jih ai tiê bi hriăm anak čô tui hluê djŏ êlan Aê Diê hlăm Klei Aê Diê Blŭ. Tăp năng ăt yuôm brei yua klei mkra mjuăt khăng hŏng anak čô hlăm klei khăp leh anăn klei mpŭ. Grăp blư̆ msĕ snăn, brei drei mblang brei anak čô thâo săng klă, si ngă brei anak tŭ klei mkra mjuăt snăn, čiăng kơ anak thâo kral klei khăp, klei uêñ mĭn, leh anăn klei tŭ dưn kơ anak hlăm klei hdĭp kđeh wăt hlăm klei hdĭp mngăt.
Si drei uêñ mĭn hlăm klei mtô anak čô tui si Klei Aê Diê Blŭ?
Wah lač: Ơ Khua Yang, bi mni lač jăk kơ Khua Yang mñă leh kơ kâo hŏng Klei Aê Diê Blŭ mtô kơ klei amĭ ama bi hriăm anak čô. Akâo Khua Yang brei kâo thâo bruă klam anei, hŏng jih ai tiê hlăm klei atăt gai, mtô lač anak čô čiăng kơ diñu jing mnuih tŭ dưn, wăt bi mtlaih mngăt diñu mơ̆ng klei djiê hlŏng lar, kyua thâo weh đuê̆ mơ̆ng êlan soh wê, luč klei đăo kơ Khua Yang. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: I Bruă Mtao 5
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
