Klei Aê Diê Blŭ: Klei Bi Hriêng 16:10-15
Êlan kliăng: “Msĕ mơh brei klei mngač diih mtrang ti anăp mnuih, čiăng kơ diñu dưi ƀuh bruă jăk diih ngă leh anăn diñu mpŭ mni kơ Ama diih hlăm adiê.” (Y‑Mathiơ 5:16).
Klei êmuh ksiêm mĭn: Si knuih phung khua gĭt gai brei mâo čiăng bi guh kơang Anăn Aê Diê? Si knuih phung ƀuôn sang brei mâo hŏng phung khua gĭt gai kpă ênô? Si drei hdĭp čiăng bi guh kơang Anăn Aê Diê?
Mtao Salômôn čih dŭm klei mtô anei hlăm boh klei ênuk Klei Bi Mguôp Hđăp, hlăk mtao amâo djŏ knŏng kiă kriê lăn čar ôh ƀiădah lŏ bi ala kơ Aê Diê hlăm bruă phat kđi leh anăn mtô bi hriăm phung ƀuôn sang hdĭp tui si klei bhiăn Aê Diê, kyua anăn “Mtao blŭ hŏng klei kơhưm” (êlan 10). Khădah snăn, Mtao Salômôn pô ăt akâo leh kơ Yêhôwa Aê Diê: “Snăn brei bĕ kơ dĭng buăl Ih ai tiê thâo mĭn čiăng phat mkra kđi phung ƀuôn sang Ih, čiăng kơ kâo dưi thâo ksiêm klei jăk hŏng klei jhat; kyuadah hlei pô dưi phat mkra kđi phung ƀuôn sang Ih êngŭm anei?” (I Bruă Mtao 3:9). Čiăng bi guh kơang Anăn Aê Diê, tal sa, phung khua gĭt gai brei hdĭp bi êdah klei kpă ênô leh anăn doh jăk Aê Diê. Hdĭp kpă ênô kơh mtao dưi phat kđi phung ƀuôn sang kpă ênuah. Sĭt mtao ngă klei jhat, ngă soh hŏng Aê Diê, Ñu srăng mdlưh jhưng mtao (II Y‑Samuel 7:14; I Bruă Mtao 14:5-11). Čiăng kơ jhưng mtao dưi dôk kjăp, brei mtao kiă kriê kpă ênuah (êlan 12). Brei Mtao thâo klei kpă ênuah jing dŏ Aê Diê leh anăn brei mtao tŭ klei Aê Diê phat kđi. Tal dua, khua gĭt gai brei ktrâo lač leh anăn mđĭ ai phung mkăn hdĭp kpă ênuah. Mtao Salômôn ktrâo lač ya klei mtao kpă ênuah tŭ ư leh anăn amâo ư ai. Mtao mơak hŏng klei blŭ kpă mơ̆ng phung kpă ênô, bruă bi êdah klei kpă ênô mơ̆ng phung thâo mĭn. Mklăk wĭt, mtao kpă ênô bi êmut kơ phung ngă bruă jhat, phung mâo klei hdĭp amâo djŏ mđĭ ai ngêñ mtao.
Êngao anăn, Mtao Salômôn ăt mñă klă kơ klei phung ƀuôn sang đup gưt kơ mtao kpă ênô. Tơdah mtao khăp kơ anak, anak srăng dưi mâ klei jăk mơak, mklăk wĭt tơdah ngă kơ mtao ngêñ, anak srăng tuôm hŏng klei truh. Pô thâo mĭn brei hdĭp kpă ênô čiăng bi hlai ai ngêñ mtao. Brei thâo răng hlăm klei hdĭp kyua mtao mâo klei dưi hlăm klei hdĭp leh anăn klei djiê phung ƀuôn sang (êlan 14-15).
Hruê anei, Khua Yang Yêsu bi mtlaih leh drei, brei kơ drei klei dưi jing anak Ñu khăp hơiêng, jing anak Mtao kơ phung mtao, Aê Diê kơ jih jang yang. Khua Yang Yêsu lač: “Msĕ mơh brei klei mngač diih mtrang ti anăp mnuih, čiăng kơ diñu dưi ƀuh bruă jăk diih ngă leh anăn diñu mpŭ mni kơ Ama diih hlăm adiê.” (Y‑Mathiơ 5:16). Hlăm bruă jing khua, akâo kơ Aê Diê brei kơ drei thâo huĭ mpŭ kơ Aê Diê, hdĭp tui si klei Aê Diê čiăng, leh anăn mđĭ ai phung pô kiă kriê hdĭp kpă ênô. Hlăm bruă jing sa čô mnuih ƀuôn sang amâodah sa čô đăo, akâo kơ Khua Yang đru drei thâo hdĭp thâo mĭn. Amâo djŏ knŏng drei đup gưt leh anăn bi mơak kơ khua ti lăn ala anei ôh, ƀiădah kdlưn hĭn kơnăn, drei hdĭp bi guh kơang Anăn Aê Diê hlăm adiê.
Sĭt blŭ amâodah mă bruă, drei bi mĭn bi guh kơang Anăn Aê Diê mơ̆?
Wah lač: Ơ Khua Yang, kâo bi mni lač jăk kơ Ih kyua Ih bi hriăm kâo thâo hdĭp bi guh kơang Anăn Ih. Akâo kơ Yang Mngăt Jăk ktrâo lač kơ kâo ya klei soh čhuai, brei kâo klei thâo mĭn, čiăng hdĭp bi guh kơang Anăn Ih nanao hlăm djăp bruă Aê Diê jao.
Dlăng Klei Aê Diê Blŭ hlăm tlâo thŭn: Klei Mmuñ Hđăp 44:17-26; 45:1-17; 46:1-3
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
