Pajlug 16:10-15
Nqe cim
“Ib yam li ntawd, nej yuav tsum ci rau sawvdaws pom tej haujlwm zoo uas nej ua, lawv thiaj yuav qhuas nej Leej Txiv tus uas nyob saum ntuj ceebtsheej” (Mathais 5:16).
Lus nug rau sawvdaws xav:
- Tus ua thawjcoj yuav tsum ua lubneej licas kom tus Tswv tau koobmeej?
- Cov pejxeem yuav tsum muaj kev xav licas rau tus thawjcoj uas ncajncees?
- Peb tau ua lubneej licas kom tus Tswv tau koobmeej lawm?
Vajntxwv Xalumoos sau tej lus qhia no rau tiam Vajluskub Qub, thaum ntawd vajntxwv tsis yog tsuas tswj teb kav chaw xwb, nws tseem yog tus sawv cev ntawm Vajtswv txiav txim thiab qhia cov pejxeem ua neej raws li tus Tswv txoj kevcai thiab, vim li ntawd thiaj hais tias “Vajtswv pub hwjchim rau vajntxwv, nws thiaj paub txiav txim ncaj ncees” (nqe 10). Tiamsis, vajntxwv Xalumoos kuj thov tus Tswv hais tias: “Yog li ntawd, thov koj pub kom kuv muaj tswvyim tswjhwm koj haivneeg ncaj ncees thiab paub qhov phem qhov zoo. Yog kuv tsis muaj tswvyim, kuv yuav ua li cas tswjhwm tau koj haivneeg uas coob heev no?” (I Vajntxwv 3:9). Yuav kom ua rau tus Tswv tau koobmeej, tim ib, tus thawjcoj yuav tsum ua lubneej qhia tshwm tus Tswv kev ncajncees thiab dawbhuv. Thaum ncajncees lawm, vajntxwv thiaj paub txiav txim ncajncees rau cov pejxeem. Thaum vajntxwv ua yam phem qias tawmtsam tus Tswv, ces tus Tswv yuav tshem vajntxwv lub zwmtxwv mus tsis pub ua vajntxwv lawm (II Xamuyees 7:14; I Vajntxwv 14:5-11). Yuav kom tau ua vajntxwv ruaj khov, vajntxwv yuav tsum tswj kav ncajncees (nqe 12). Vajntxwv yuav tsum paub hais tias kev ncajncees yog tus Tswv tug thiab vajntxwv yuav raug Vajtswv txiav txim. Tim ob, tus thawjcoj yuav tsum taw qhia thiab txhawb lwm tus ua neej ncajncees. Vajntxwv Xalumoos taw qhia txog tej yam uas tus vajntxwv ncajncees txaus siab thiab tsis txaus siab. Vajntxwv txaus siab rau tus neeg ncajncees tej lus tseeb thiab yam uas tus neeg muaj tswvyim qhia tshwm lawv kev ncajncees. Tiamsis, tus vajntxwv ncajncees ntxub cov neeg ua phem, cov neeg muaj lubneej tsis ncajncees ua rau vajntxwv chim.
Tsis tas li ntawd xwb, Vajntxwv Xalumoos kuj hais hnyav txog qhov uas cov pejxeem yuav tsum hwm tus vajntxwv ncajncees. Yog tias vajntxwv hlub koj, ces koj yuav tau koobhmoov, tiamsis yog koj ua rau vajntxwv chim, ces koj yuav raug teebmeem. Tus neeg muaj tswvyim yuav tsum ua lubneej ncajncees vajntxwv thiaj tsis chim. Yuav tsum ceevfaj hauv lubneej vim vajntxwv muaj hwjchim tuav cov pejxeem kev ciaj kev tuag (nqe 14-15).
Niaj hnub nimno, tus Tswv Yexus tau cawm peb dim, pub rau peb tau los ua Nws cov menyuam, peb yog tus Vaj ntawm tej vaj thiab tus Tswv ntawm tej tswv li menyuam. Tswv Yexus hais tias: “Ib yam li ntawd, nej yuav tsum ci rau sawvdaws pom tej haujlwm zoo uas nej ua, lawv thiaj yuav qhuas nej Leej Txiv tus uas nyob saum ntuj ceebtsheej” (Mathais 5:16). Yog ib tug thawjcoj, thov tus Tswv pab kom peb paub ntshai, ua neej raws Nws txojkev thiab txhawb cov uas peb saibxyuas lub zog kom ua neej ncajncees. Yog ib tug pejxeem lossis ib tug ntseeg, thov tus Tswv pab kom peb ua neej muaj tswvyim. Peb tsis yog tsuas hwm thiab ua raws peb cov tswv hauv ntiajteb no xwb, tshaj qhov ntawd, peb yuav tsum ua kom peb tus Tswv saum Ntuj Ceebtsheej tau koobmeej.
Thaum hais lus thiab ua haujlwm, peb puas xav txog qhov uas ua rau tus Tswv tau koobmeej?
Thov Vajtswv
Tus Tswv, nyuam yaus ua Koj tsaug vim Koj qhia nyuam yaus paub ua lubneej rau Koj tau koobmeej. Thov Vaj Ntsujplig taw qhia nyuam yaus tej yam txhaum, pub nyuam yaus muaj tswvyim, kom ua tau lubneej rau Koj tau koobmeej. Amees.
Nyeem Vajluskub peb lub xyoos: Ntawv Nkauj 44:17-46:3.
Tshooj Youtube BHKTHN: https://www.youtube.com/c/bhkthn
