Klei Aê Diê Blŭ: Hêbrơ 5:11-14
Êlan kliăng: “Kyuadah hlei pô ăt mnăm êa ksâo amâo thâo yua klei blŭ kơ klei kpă ênô, kyuadah ñu ăt jing hđeh. Ƀiădah mnơ̆ng ƀơ̆ng huă khăng pioh kơ phung khue leh, kơ phung hriăm leh anăn yua leh klei mĭn diñu dưi thâo săng klei jăk hŏng klei jhat.” (Hêbrơ 5:13-14).
Klei êmuh ksiêm mĭn: Ya klei pô čih hră Hêbrơ ƀuah kơ phung đăo? Si klei mdê pô “mnăm êa ksâo” hŏng pô ƀơ̆ng “mnơ̆ng ƀơ̆ng khăng”? Si drei ngă čiăng khăp kơ “mnơ̆ng ƀơ̆ng khăng” mơ̆ng Klei Aê Diê Blŭ leh anăn khue hĭn grăp hruê?
Êjai dôk hưn mdah kơ bruă Khua Yang Yêsu jing Khua Ngă Yang Prŏng, pô čih hră Hêbrơ mjưh bhiâo čiăng mblang:“Kơ klei anăn hmei mâo lu klei čiăng lač, ƀiădah dleh mblang kyuadah diih jing phung êmưt thâo săng” (êlan 11). Amâo djŏ ôh kyuadah akŏ phŭn kơ Yang Krist dlông kdlưn đei, dleh thâo săng, ƀiădah kyuadah “diih jing phung êmưt thâo săng”. Mâo đa đa hdruôm hră Klei Aê Diê Blŭ mblang “diih amâo čiăng thâo săng”, “knga diih alah amâo čiăng mđing hmư̆”. Blŭ mdê, diñu amâo khăp amâo mơak ôh hŏng akŏ phŭn lač kơ knuih Yang Krist. Dŭm sui leh tui hlue Khua Yang, năng djŏ diñu jing khue leh, leh anăn dưi jing pô mtô Klei Aê Diê Blŭ kơ pô mkăn leh, ƀiădah diñu adôk jing hđeh mda, amâo čiăng prŏng, ăt čiăng kơ arăng lŏ mtô kơ pô klei ênưih êđal.
Êa ksâo jing mnơ̆ng ƀơ̆ng jăk hĭn kơ hđeh điêt, ƀiădah knŏng guôp kơ phung adôk hđeh mda. Kyuadah “hlei pô ăt mnăm êa ksâo amâo thâo yua klei blŭ kơ klei kpă ênô” (êlan 13). Năng ai phung anei knŏng thâo, đăo kơ Khua Yang Yêsu snăn mâo klei bi mtlaih, amâo srăng lŏ tŭ klei bi kmhal hlŏng lar hlăm war pui ôh, leh anăn diñu amâo lŏ mđing mĭn ôh kơ mta klei adôk mkăn. Diñu amâo thâo săng ôh si Klei Aê Diê Blŭ mtô kơ hdră klei Aê Diê bi mtlaih, kơ phŭn yuôm kdlưn hĭn jing hŏng bruă Khua Ngă Yang Prŏng Khua Yang Yêsu. Diñu ăt kăn thâo săng rei si mă yua Klei Aê Diê Blŭ hlăm klei hdĭp.
Bruă klam kơ grăp čô phung đăo kơ Khua Yang jing brei đĭ hriê kơ prŏng, dơ̆ng mơ̆ng anôk dôk “mnăm êa ksâo” truh kơ “mnơ̆ng bơ̆ng huă khăng”. Ênguôt êdi, lu phung đăo khăng ƀuah si ngă khua pô mtô knŏng mtô mblang nanao Klei Aê Diê Blŭ yơh ƀiădah amâo blŭ yăl dliê ôh “klei boh sĭt” đa, msĕ si klei lăn ala dôk găn ară anei hin. Diñu mơak hĭn hlăm klei bi kƀĭn trông čhai kơ akŏ klei bi hriăm thâo yua răng kriê jăk prăk ngăn, mtô lač kơ anak aneh, mkŏ mjing gŏ huă… ƀiădah amâo čiăng mđing ôh, êgah êmăn tơdah hmư̆ mtô mblang kơ knuih Khua Yang, kơ hdră bruă Ñu bi mtlaih.
Bi mklăk hŏng phung đăo adôk hđeh mda, bi phung khue hlăm Khua Yang thâo bi mjuăt ñu pô hlăm klei dưi thâo săng klei jăk hŏng klei jhat (êlan 14). Anăn yơh jing phung mâo klei hdĭp bi mjuăt klei hdĭp mngăt diñu pô tui hlue klei bhiăn, thâo dlăng răk, hriăm, ksiêm mĭn Klei Aê Diê Blŭ grăp hruê leh anăn thâo mă yua kơ klei hdĭp grăp hruê hlăm grăp mta klei găn truh, thâo kral ya mta klei năng ngă, ya mta klei bi mơak kơ Khua Yang. Khue hlăm klei hdĭp mngăt jing sa knhuang êlan sui dlông leh anăn lu klei lông dlăng, čoh čuăn kơ grăp čô phung đăo brei mâo klei “hriăm leh anăn yua klei mĭn”, snăn kơh ñu pô dưi đĭ hriê kơ prŏng, mâo boh tŭ dưn kơ Khua Yang, đru atăt lu mnuih hriê kơ Khua Yang.
Si ngă drei khăp leh anăn mhao kơ “mnơ̆ng ƀơ̆ng huă khăng” mơ̆?
Ơ Khua Yang, bi mni kơ Ih kyuadah Klei Ih Blŭ ksiêm êmuh kâo, đru kâo thâo kral kâo jing khue amâodah ăt dôk hđeh mda. Akâo Khua Yang thiăm kơ kâo ai tiê khăp kơ Klei Ih Blŭ, bi hriăm mjuăt klei hdĭp djŏ klei bhiăn čiăng dưi đĭ hriê kơ prŏng hlăm klei đăo grăp hruê leh anăn mâo boh tŭ dưn kơ bruă Khua Yang.
Dlăng Klei Aê Diê Blŭ hlăm tlâo thŭn: Y-Êsêkiêl 29
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
