Klei Aê Diê Blŭ: I Y-Pêtrôs 3:1-7
Êlan kliăng: “Msĕ mơh, Ơ phung mô̆, brei diih đup gưt kơ ung diih, čiăng kơ wăt tơdah mâo đa đa ung amâo gưt ôh kơ klei blŭ, phung mô̆ dưi atăt diñu kơ klei đăo, amâo djŏ hŏng klei blŭ ôh, ƀiădah hŏng klei dôk dơ̆ng ƀơ̆ng huă” (I Y-Pêtrôs 3:1)
Klei êmuh ksiêm mĭn: Si ngă sa čô mô̆ đăo kơ Krist brei hdĭp hŏng ung pô? Čiăng bi mlih jăk ung pô, ya klei sa čô mô̆ đăo kơ Krist tui hlue klei H’Sara bi hmô? Si sa čô ung đăo kơ Krist hdĭp hŏng mô̆ pô? Si klei hriăm mñă kơ klei ung mô̆ phung drei?
Hlăm ala ƀuôn hlăk anăn, phung ung mâo klei dưi kluôm dhuôm hŏng phung mô̆. Kyua anăn bruă mô̆ čiăng mâo klei êngiê bi êdah klei đăo kơ Aê Diê jing klei dleh dlan snăn tơdah ung amâo ư ai. Ti anăp boh klei anăn, Klei Aê Diê Blŭ mtă kơ phung mô̆ đăo kơ Aê Diê ti anăp ung pô, amâo djŏ mtô klei đăo kơ ung ôh, ƀiădah hdĭp klei hdĭp đup gưt, leh anăn “hŏng klei dôk dơ̆ng ƀơ̆ng huă, êjai diñu ƀuh klei diih dôk dơ̆ng ƀơ̆ng huă hŏng klei mpŭ kơ Aê Diê leh anăn klei doh jăk” (êlan 1-2). Aê Diê čiăng kơ phung mniê đăo kơ Krist hdĭp bi êdah klei jăk siam amâo thâo luč hlăm knuih hdĭp gŏ sang pô mtam. Hrô kơ bi msiam ti êngao hŏng kdrăp bi msiam, čhum ao,…snăn “mprăp bĕ ti lam hgăm hlăm ai tiê hŏng mnơ̆ng amâo thâo rai tuč ôh, jing knuih êdu leh anăn êđăp ênang. Klei anăn jing yuôm snăk ti anăp Aê Diê” (êlan 3-4).
Čiăng dưi bi mlih jăk ung pô, phung mniê đăo kơ Krist brei tui hlue klei H Sara bi hmô,“čang hmăng kơ Aê Diê, mprăp diñu pô msĕ snăn leh anăn đup gưt kơ ung diñu, msĕ si H’Sara gưt kơ Y-Abraham leh anăn iêu kơ gơ̆ khua…(êlan 5-6). Hdĭp hlăm klei bi dôk ung mô̆ hŏng ung ka đăo kơ Khua Yang, lu phung mô̆ lui leh klei đăo, amâodah huĭ hyưt tơdah bi êdah klei đăo hŏng ung. Klei Aê Diê Blŭ brei diñu mâo sa klei čang hmăng srăng jing anak mniê H’Sara tơdah đăo knang nanao kơ Aê Diê, hdĭp tui hlue klei ñu bi hmô hlăm klei gưt kơ ung leh anăn ngă bruă jăk, snăn srăng kjăp hlăm djăp boh klei (êlan 6).
Khua ƀĭng kna Y-Pêtrôs ăt mtă kơ phung ung đăo kơ Krist brei thâo mĭn hlăm klei dôk dơ̆ng ƀơ̆ng huă, mpŭ kơ mô̆ pô msĕ si sa čô hlăm êpul awăt hĭn, čiăng răng mgang, đru leh anăn sĭt suôr. Tơdah ung amâo mpŭ ôh kơ mô̆ pô, ngă amâo jăk, amâo sĭt suôr, snăn klei wah lač pô anăn srăng amâo jing sĭt ôh. Kyua klei bi mguôp jăk siam hŏng Aê Diê tui hlue si klei bi mguôp kpă ênô hŏng pô mkăn (êlan 7). Tơdah ung hdĭp amâo jăk, srăng ngă kơ mô̆ ka đăo kơ Aê Diê dleh snăk đăo kơ Aê Diê, amâodah mô̆ đăo leh kơ Aê Diê srăng mâo ai tiê phĭ, luč klei jăk mơak Aê Diê brei.
Klei hriăm anei đru drei lŏ dlăng wĭt klei hdĭp ung mô̆ pô. Bruă mô̆ amâodah ung srăng dưi bi mlih jăk ung amâodah mô̆ pô ka đăo, amâodah jih dua ung mô̆ dưi dưn klei pap klei hdĭp Aê Diê brei, tui hlue si klei thâo săng leh anăn knuih hdĭp grăp čô. Akâo kơ Aê Diê đru drei hdĭp leh anăn dôk dơ̆ng ƀơ̆ng huă hŏng mô̆ amâodah ung pô hlue si Klei Aê Diê Blŭ mtô čiăng tơdah hlăm ya boh klei ăt mơak dưn klei jăk mơak gŏ sang.
Si drei hdĭp čiăng bi mlih jăk ung amâodah mô̆ pô?
Wah lač: Ơ Khua Yang jing Khua kơ gŏ sang kâo. Akâo kơ Ih đru kâo thâo ya klei adôk kƀah hlăm klei hdĭp ung mô̆ kâo. Akâo kơ Khua Yang brei klei hơêč hmưi čiăng kơ kâo thâo mkra mlih hlue si Klei Aê Diê Blŭ mtô, čiăng kơ klei hdĭp ung mô̆ kâo dưi bi mơak kơ Khua Yang. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: : Y-Ôsê 11
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
