Klei Aê Diê Blŭ: I Kôrantô 3:16-23
Êlan kliăng: “Snăn đăm brei arăng bi mni kơ bruă mnuih ngă.” (I Kôrantô 3:21a)
Klei êmuh ksiêm mĭn: Si čiăng lač kơ “klei mĭn phung thâo mĭn” hlăm êlan 21? Si ngă klei mĭn anăn “bi rai” sang kkuh mpŭ kơ Aê Diê? Ya mta klei drei khăng bi mni, hlăm klei hdĭp myang?
Khua ƀĭng kna Y-Pôl hưn mdah phung ayŏng adei hlăm Phung Sang Aê Diê Kôrantô jing “sang kkuh mpŭ kơ Aê Diê”. Hŏng phung Israel, sang kkuh mpŭ jing anôk myang leh anăn bi knăl kơ anôk Aê Diê dôk. Khua ƀĭng kna Y-Pôl yua rup myang anei čiăng kơ phung đăo ti ƀuôn Kôrantô ƀuh snei, bruă “bi rai sang kkuh mpŭ”, hŏng klei “bi mni kơ bruă mnuih ngă” (êlan 21) jing klei ngă bi jhat kơ klei mâo Aê Diê dôk mbĭt.
Tơdah lač kơ klei “bi rai sang kkuh mpŭ”, khua ƀĭng kna Y-Pôl čiăng lač kơ klei bi mni kơ phung mnuih, kyuadah bruă yap drei dôk tĭng kơ hlei pô, bi kah phung , jing klei bi rai kjham snăk. Knhuah ngă anei amâo knŏng atăt kơ klei bi mneh msao, bi kah phung hlăm lam Phung Sang Aê Diê Kôrantô, ƀiădah boh sĭt brei ƀuh, wăt atăt truh kơ klei bi kah leh anăn ngă bi jhat klei bi mguôp hlăm hdơ̆ng phung khua kiă kriê amâodah phung mtô mblang msĕ si kơ Y-Pôl leh anăn kơ Y-Apôlôs msĕ mơh. Hlăk anăn, Phung Sang Aê Diê bi kah phung, dơ̆ng mơ̆ng dlông truh ti gŭ, atăt truh kơ klei bi rai klei bi mguôp sa ai leh anăn klei khăp ti krah phung đăo, kyuanăn arăng amâo thâo kral ôh diñu jing phung ƀĭng kna Khua Yang (Y-Yôhan 13:35). Khua ƀĭng kna Y-Pôl, pô tuôm dôk leh hlăm êpul phung Pharisi, mâo klei hriăm lu thâo êlam; Y-Apôlôs, pô thâo blŭ thâo mtô leh anăn hriăm lu thâo lu; Khua ƀĭng kna Y-Sêphas (Y-Pêtrôs) jing sa čô hur har leh anăn mâo klei Aê Diê pap, tui si năng djŏ diñu yap jih jang mnuih jing “dŏ diih sơăi”, hrăm mbĭt bi mguôp kăp rŭ mdơ̆ng klei đăo phung đăo ti Kôrantô (êlan 21-22) ƀiădah klei diñu ngă bi roh hdơ̆ng pô atăt phung đăo kơ klei bi kah phung.
Kna ti I Kôrantô 3:15, tơdah atur klei đăo dưm ti dlông Khua Yang Yêsu Krist, phung đăo ăt mâo klei bi mtlaih mơh ƀiădah “knŏng msĕ si kbiă mơ̆ng pui”, kyuanăn boh blŭ “bi rai” tinei amâo lač kơ luč klei bi mtlaih ôh, biădah čiăng lač jih klei gĭr ktĭr pô anăn rai jih, jing hĕ hơăi mang. Lu mnuih lač snei “ti knhal tuč dưi mâo klei bi mtlaih jing jăk leh!” Ƀiădah lĕ, tơdah jih thŭn mlan dôk hdĭp ti lăn ala knŏng bi mneh msao, bi nač, amâo thâo kral ôh klei jăk mơak Khua Yang, snăn năng mơh hĕ dôk hdĭp msĕ snăn?
Jing klei bi kngăr êdi, hlăk mrâo đăo, drei thâo hdơr knga bi mni kơ Khua Yang kyua klei pap Khua Yang prŏng prĭn, kyua kyâo bi kal Khua Yang Yêsu, ƀiădah thŭn mlan găn gao, klei drei bi mni amâo lŏ jing klei khăp, kyâo bi kal, klei pap Khua Yang kơ drei ôh! Klei Aê Diê Blŭ mtô đăm bi mni ôh kơ bruă mnuih ngă. Tơdah mjưh tăp mơ̆ng anôk thâo hdơr knga kơ phung rŭ mdơ̆ng leh drei jing jăk êdi yơh, ƀiădah tơdah dưh knang kơ phung anei leh anăn ngă klei bi mkă bi mđơr ƀiă lu, bi nač, bi mni, snăn boh jhat srăng jing prŏng snăk.
Si ngă jih jang klei drei blŭ, klei drei mĭn ba klei bi rai amâodah klei rŭ mdơ̆ng kơ Phung Sang Aê Diê?
Wah lač: Ơ Khua Yang, klei mĭn bi kah phung bi rai leh Phung Sang Aê Diê kjham êdi. Akâo Khua Yang đru kâo thâo răng leh anăn bi klă jih klei kâo mĭn, klei kâo blŭ leh anăn jih bruă kâo ngă, čiăng ba klei rŭ mdơ̆ng kơ Phung Sang Aê Diê. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Êsêkiêl 10
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
