I Kauleethaus 3:16-23
Nqe cim:
“Yog li ntawd, nej tsis txhob khav tej uas neeg ua tau.” (I Kauleethaus 3:21a)
Lus nug xav:
– “Tej tswvyim hauv ntiajteb no” raws li nqe 21 hais txog yog yam dabtsi tiag?
– Vim licas qhov ntawd ho yog txojkev “rhuav tshem” Vajtswv lub Tuamtsev?
– Hauv lubneej sab ntsujplig, koj pheej khav txog yam dabtsi?
Timthawj Paulus piv cov ntseeg hauv Pawg Ntseeg Kauleethaus yog “Vajtswv lub Tuamtsev”. Raws li cov neeg Yudais, Tuamtsev yog qhov chaw dawbhuv kawg nkaus thiab yog lubcim qhia hais tias tseem muaj Vajtswv nyob nrog nraim. Timthawj Paulus siv daim duab dawbhuv no los qhia rau cov ntseeg hauv Kauleethaus pom hais tias, txojkev “rhuav Vajtswv lub tuamtsev”, hais tob dua yog “khav tej uas neeg ua tau” (nqe 21) ces yog saib tsis taus Vajtswv txojkev tshwmsim nyob nrog nraim.
Thaum hais txog kev “rhuav Vajtswv lub tuamtsev”, Timthawj Paulus xav hais txog kev khavtheeb txog tej uas tibneeg ua tau, vim qhov uas lees hais tias yus yog leejtwg pab, sib faib pab faib pawg, ua rau muaj kev rhuav hnyav kawg nkaus li. Tus cwjpwm no tsis yog tsuas ua rau muaj kev sib ceg, sib faib hauv Pawg Ntseeg Kauleethaus xwb, tiamsis qhov tseeb, nws tseem ua rau txojkev sib raug zoo ntawm cov thawjcoj lossis cov neeg qhia Vajtswv Txojlus zoo li Paulus thiab Apaulaus raug kev cuamtshuam. Thaum ntawd, Vajtswv Pawg Ntseeg raug sib faib txij saum ntsis mus txog rau hauv paus, ua rau txojkev koom siab thiab kev sib hlub ntawm cov ntseeg raug rhuav tshem, vim li ntawd neeg ntiajteb thiaj tsis zeem paub hais tias lawv yog Tswv Yexus cov thwjtim (Yauhas 13:35). Timthawj Paulus yav thaum ub yog tus uas nyob hauv pab Falixais, muaj kev kawm deb paub dav; Apaulaus yog tus txawj hais lus thiab muaj tswvyim; Timthawj Petus yog tus muaj lub siab kub thiab tau tus Tswv koobmoov. Tsimnyog lawv txhua tus puavleej tau suav tias yog “sawvdaws tug”, lawv puavleej koom txhim tsa cov ntseeg hauv Kauleethaus txojkev ntseeg (nqe 21-22), tiamsis cov ntseeg ho muab lawv los ua yeebncuab sib txeeb, sib faib ua pab ua pawg.
Raws li I Kauleethaus 3:15, thaum txojkev ntseeg lub taw twb txawb rau saum tus Tswv Yexus Khetos lawm, ces cov ntseeg yuav tau cawm dim “ib yam li tus uas khiav dim hauv hluavtaws los”, vim li ntawd lo lus “kub hnyiab” ntawm no tsis yog hais txog plam txojkev cawmdim, tiamsis txhais hais tias tagnrho tus neeg ntawd tej kev siv zog ua haujlwm yuav raug hluav taws hlawv kub hnyiab. Muaj coob leej hais tias “Thaum kawg tau cawm dim ces yog zoo lawm!” Tiamsis, yog tias lub sijhawm tseem nyob hauv ntiajteb no pheej ua neej sib txeeb, sib ceg, tsis tau saj tus Tswv tej koobmoov, ces ua neej li ntawd puas tsimnyog ua?
Txawv kawg li, thaum nyuam qhuav los ntseeg tus Tswv, peb yeej ua Vajtswv tsaug vim peb tau cawmdim los ntawm tus Tswv txojkev hlub uas loj kawg nkaus thiab dim dhau ntawm Tswv Yexus tus ntoo khaublig; tiamsis hnub nyoog ntev tuaj, yam uas peb khav txog tsis yog tus Tswv txojkev hlub, tsis yog tus ntoo khaublig, tsis yog tus Tswv txoj koob hmoov lawm! Vajtswv Txojlus qhia hais tias, tsis txhob khav txog tej uas tibneeg ua tau. Yog peb paub nres ntawm qhov uas ua tsaug rau cov neeg txhim tsa yus txojkev ntseeg xwb ces zoo heev, tiamsis yog peb muab cov neeg ntawd los ua chaw sib piv, sib txeeb, sib khav, ces yuav raug lub txim hnyav kawg li.
Thov Vajtswv,
Tus Tswv, txojkev sib faib tau rhuav tshem Pawg Ntseeg hnyav heev. Thov pab nyuam yaus niaj hnub ceevfaj thiab tswj nyuam yaus txojkev xav, tej lus hais thiab tes haujlwm, kom coj tau kev txhim kho los rau Pawg Ntseeg. Nyuam yaus tuav Yexus Khetos lub npe thov, Amees.
Tej lus uas peb hais thiab peb txojkev xav yuav coj kev rhuav tshem lossis coj kev txhim kho tuaj rau Pawg Ntseeg?
Nyeem Vajluskub hauv peb lub xyoos: Exekees 10
Kênh Youtube BHKTHN:
