Klei Aê Diê Blŭ: I Têsalônik 3:6-10
Êlan kliăng: “Kyuanăn, Ơ phung ayŏng adei, hlăm jih klei rŭng răng leh anăn klei knap mñai hmei, hmei mâo klei bi juh kyua klei diih đăo. Kyuadah ară anei hmei ăt dôk hdĭp, kyua klei diih dôk kjăp hlăm Khua Yang” (I Têsalônik 3:7-8)
Klei êmuh ksiêm mĭn: Ya klei mrâo mrang jăk Khua ƀĭng kna Y-Pôl hmư̆ mơ̆ng Y-Timôthê? Si klei mơak anăn mđĭ ai, bi juh Khua ƀĭng kna Y-Pôl leh anăn phung mă bruă hŏng ñu? Ya ngă Khua Yang dưm drei hlăm sa êpul êya klei đăo? Si drei ngă klei anăn?
Hlăm boh klei arăng ngă jhat ktang snăk tơl bi ktlah hŏng phung đăo ti Sang Aê Diê Têsalônik (dlăng Bruă Phung Khua Ƀĭng Kna 17:1-10), ƀiădah Khua ƀĭng kna Y-Pôl leh anăn phung mă bruă mbĭt ăt hdơr nanao kơ diñu, čang hmăng nanao dưi nao čhưn hŏng ayŏng adei tinei “…leh anăn čiăng bi ênŭm ya klei kƀah hlăm klei đăo diih” (êlan 10b), kyua anăn diñu hruê mlam akâo kơ Aê Diê brei kơ diñu dưi mâo klei găl, ƀiădah Aê Diê ka brei ôh.
Ară anei, mơ̆ng Y-Timôthê diñu hmư̆ klei hâo hưn jăk kơ dua mta phŭn mơ̆ng klei đăo kơ Krist jing “klei đaŏ sa ai tiê bi khăp” mơ̆ng phung đăo Sang Aê Diê Têsalônik, thâo kơ ai tiê digơ̆ čang hmăng lŏ bi tuôm hŏng Khua ƀĭng kna Y-Pôl ăt msĕ mơh ñu čang hmăng lŏ bi tuôm hŏng digơ̆. Hlăk dôk rŭng răng kơ ayŏng adei, klei mrâo mrang jăk anei jing sa klei mđĭ ai, bi juh prŏng snăk hŏng Khua ƀĭng kna Y-Pôl leh anăn phung mă bruă mbĭt. Wăt tơdah ñu leh anăn phung mă bruă mbĭt dôk tuôm hŏng klei dleh dlan, rŭng răng, ƀiădah tơdah thâo klei hdĭp klei đăo phung đăo Têsalônik ăt hriê kơ prŏng snăn amâo mâo ôh klei bi juh leh anăn klei hơ̆k mơak mkăn yuôm bhăn hĭn ti anăp Aê Diê tơl Khua ƀĭng kna Y-Pôl leh anăn phung mă bruă mbĭt amâo dưi djăp ôh klei bi mni kơ Aê Diê.
Sa Phung Sang Aê Diê mrâo ƀiădah lŏ dôk hlăm klei arăng ngă jhat msĕ si Sang Aê Diê Têsalônik ƀiădah klei đăo leh anăn klei khăp diñu ăt đĭ kyar nanao. Anei amâo djŏ knŏng jing klei mơak kơ diñu pô ôh ƀiădah boh tŭ klei hdĭp mngăt hriê kơ prŏng anăn lŏ mâo Aê Diê yua čiăng bi juh, mđĭ ai phung ayŏng adei sa klei đăo mkăn, boh nik phung kriê dlăng leh klei hdĭp mngăt kơ diñu. Klei Anăn ăt jing hdră kñăm Aê Diê mdưm čiăng drei jing phung mâo klei đăo hlăm Khua Yang hrăm mbĭt kkuh mpŭ leh anăn bi kƀĭn hlăm sa êpul êya, čiăng kơ drei mđĭ ai, bi juh hlăm klei hdĭp mngăt. Klei hriê kơ prŏng mơ̆ng phung anei ăt ba klei mơak leh anăn klei mđĭ ai kơ phung ayŏng adei mkăn hlăm Phung Sang Aê Diê. Anăn jing klei mđĭ ai leh anăn bi juh drei. Phung đăo amâo bi blah hjăn ôh hlăm hdră tui hlue Khua Yang, ƀiădah mâo nanao ayŏng adei sa klei đăo nao mbĭt hrăm mbĭt bi đru mđĭ klei đăo hdơ̆ng găp. Akâo kơ Khua Yang đru kơ drei amâo ngă ngơi mang ôh ƀiădah mđing uêñ nanao bi đru hdơ̆ng găp čiăng hriê kơ prŏng hlăm Khua Yang tơl truh hruê bi tuôm hŏng Ñu.
Drei mđing kơ klei đăo ayŏng adei hlăm Phung Sang Aê Diê hriê kơ prŏng mơ̆?
Wah lač: Ơ Aê Diê! Kâo bi mni kơ Ih kyua Ih dưm kâo ti djiêo ayŏng adei hrăm mbĭt sa klei đăo čiăng mđĭ ai, bi juh hdơ̆ng pô. Akâo kơ Ih đru kâo thâo hdră kñăm anei čiăng mđing uêñ leh anăn wah lač brei hdơ̆ng pô, hrăm mbĭt mđĭ klei đăo hlăm Khua Yang. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mphŭn Dơ̆ng 29
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
