Tơdrong Pơđơ̆k 24:21-22
“Lu bơngai pơgơ̆r noh lu sư dang jang tơdrong ‘Bok Kei-Dei, wă kơ kon bơngai arih hiôk-hian. ‘Noh na tơ̆ng bơ̆n pơm kơnê̆, bơ̆n hli kơ lu sư. Lu bơngai pơgơ̆r chĕp tak đao, lu sư trŏ tơdrong gơh chĕp. Yua kơ lu sư jang tơdrong ‘Bok Kei-Dei, lu sư gơh rôp phak lu bơngai pơm kơnê̆ mă ‘Bok Kei-Dei ưh kơ lăp đon.” (Rôm 13:4)
Nơ̆r jet tơchĕng pơwao:
– Yua kơ kiơ Pơtao Sa-lô-môn bơtho kon hơ’lơ̆p kăl kơ pơyom kơ bơngai pơgơ̆r?
– Lu bơngai chă pơdôr pơpôi wă pơm tơplơ̆ kơ bơngai pơgơ̆r thoi yơ?
– Lu bơ̆n kăl kơ pơm thoi yơ hăm tơdrong juăt lu bơngai pơgơ̆r tơplơ̆ kơ khôi juăt Kră Yang?
Pơtao Sa-lô-môn bơtho kon hơ’lơ̆p sư kơdih athei hli yom kơ ‘Bok Kei-Dei păng pơyom kơ lu bơngai pơgơ̆r. Nơ̆r “hli yom kơ Kră Yang Yê-hô-va păng hli yom kơ pơtao” (trong 21). Tơdrong âu nhen thoi tơdrong tơguăt băl pơtao jơ̆ lu bơngai chĕp pơgơ̆r đơ̆ng Kră Yang song ăn wă pơgơ̆r kon pơlei pơla, wă bơtho pơjĭ lu bơngai pơm tơdrong glăI, gơh ăn tơdrong arih tơdrong lôch dah lu bơngai mă đei pơm glăI tih. Pơma pha ra bơngai pơgơ̆r noh jơ̆ đơ̆ng Kră Yang song ăn pơgơ̆r, thoi noh kon pơlei kăl kơ pơyom (I Pêtrôs 2:17). Pha ra tơdrong âu dơ̆ng ưh kơ gơh năm hơdai hăm lu bơngai tơplơ̆ kơ lu bơngai pơgơ̆r hơmơt kơ tơdrong răm ‘băm truh tơbơ̆n. Nơ̆r “răm ‘băm” lăm trong 22 noh jơ̆ hơdai hăm nơ̆r “gleh pơmat” mă Kră Yang hăm ‘Bok Pơtao đei pơm ăn kơ lu bơngai mă pơm tơplơ̆ kơ tơdrong pơgơ̆r lu sư ‘maih wă chă pơm yŏng kơ dih hăm tơdrong pơrăm, ưh kơ hăm tơdrong chu yom. ‘Maih wă kơ tơdrong jang sa kơdih akâu ‘net ‘net noh jơ̆ kăl kơ sơ̆ng iŏk tơdrong pơgơ̆r ‘lơ̆ng đơ̆ng lu bơngai pơgơ̆r.
Nơ̆r Kră Yang tơ’blŏk kơ bơ̆n lăm chăl arih wă kơ lu bơ̆n đei arih jang sa hơđơ̆ng hiôk hoei kơ đei tơdrong tơsŭl tơwŏk kiơ lu bơ̆n kăl kơ pơyom kơ tơdrong trŏ mă đơ̆ng lu bơngai pơgơ̆r đei tơlĕch ăn, nĕ kơ năm hơdai hăm lu bơngai mă đei chĕp tơdrong pơm tơplơ̆ kơ bơngai pơgơ̆r wă kơ đei hơđuh iŏk tơdrong pơgơ̆r đơ̆ng lu sư. ‘Bok Pôl đei pơma hơđăl Kră Yang song ăn kơ bơngai pơgơ̆r wă ba ăn tơdrong hơđơ̆ng hiôk, đei yua ăn kơ kon pơlei pơla “Lu bơngai pơgơ̆r noh lu sư dang jang tơdrong ‘Bok Kei-Dei, wă kơ kon bơngai arih hiôk-hian” (Rôm 13:4). Yua kơ đơ̆ng lu bơngai pơgơ̆r chĕp tơdrong pơgơ̆r lu sư noh jơ̆ wă rôp phak lu bơngai pơm kơnê̆, na ba ăn tơdrong hơđơ̆ng hiôk hian kơ lu bơngai mă pơm ‘lơ̆ng. Thoi noh, chu yom kơ lu bơngai pơgơ̆r ‘lơ̆ng trŏ, noh kŭm jơ̆ chu yom kơ ‘Bok Kei-Dei păng pơm kiơ̆ kơ khôi juăt Sư đei pơkă. La yơ mă tơdrong khôi juăt lu bơngai pơgơ̆r tơplơ̆ kơ nơ̆r ‘Bok Kei-Dei lu bơ̆n kăl kơ chu kơ nơ̆r ‘Bok Kei-Dei hloh kơ tơdrong khôi juăt lu bơngai pơgơ̆r. ‘Bok Pêtrôs đei dơ̆ng ‘bơ̆t anih sek tơlang sư đei pơma thoi âu: “Nhôn athei chu Kră Yang ‘Bok Kei-Dei đĕch, nhôn ưh kơ wă chu kon bơngai ôh.” (Tơdrong Jang 5:29). Apinh ‘Bok Kei-Dei ăn kơ lu bơ̆n đĭ jơhngơ̆m lui gơnang kơ ‘Bok Kei-Dei mơsêh tih, păng krao khan kơ lu bơngai pơgơ̆r păng pơyom kơ lu sư wă kơ bơ̆n đei arih hơđơ̆ng hiôk wă kơ kuh kơ ‘Bok Kei-Dei păng ră roi tơdrong ‘nao ‘lơ̆ng.
Ơ Kră Yang, bơnê kơ Ih đei ăn kơ lu bơngai pơgơ̆r lăm teh đak âu, Apinh Ih Kră Yang ‘Bă ăn kơ lu sư băt hli yom kơ Ih, na ba ăn tơdrong khôi juăt trŏ thoi khôi juăt Ih. Apinh Ih ăn kơ Inh đei jơhngơ̆m hli yom kơ Ih păng pơyom kơ lu bơngai pơgơ̆r. Yua anăn Kră Yang Yêsu Krist. Amen
Lu bơ̆n hăm đĭ jơhngơ̆m lui gơnang kơ ‘Bok Kei-Dei hăm pơyom kơ lu bơngai mă pơgơ̆r ưh?
Krao khan kơ lu bơngai pơgơ̆r
Arih kơ kuh kơ ‘Bok Kei-Dei păng ră roi Tơdrong ‘Nao ‘Lơ̆ng
Lui gơnang kơ Kră Yang mơsêh tih
Wei răk khôi juăt Kră Yang.
Đŏk Sơ̆p Hla Bơar nơ̆r ‘Bok Kei-Dei lăm pêng sơnăm: Yakơ 2
Kênh Youtube BHKTHN:
