Hơriso 78:1-8
“Wă kơ lu sư đei jơhngơ̆m băt gơnang kơ Kră Yang ‘Bok Kei-Dei. Wă huay kơ hiơt kơ dôm tơdrong Kră Yang đei pơm. Păng wei răk dôm nơ̆r Sư tơtă.” (Hơriso 78:7)
Nơ̆r jet tơchĕng pơwao:
– Bơngai chih âu krao pơtơm kon pơlei pơm kiơ?
– Sư pơma tơpăt tơdrong kăl păng tơdrong kơnhăm wă bơtho kon sâu thoi yơ?
– Lu bơ̆n ‘măn adrol hloh wă bơtho kon sâu ‘noh tơdrong kiơ?
Hơriso 78 jơ̆ kơthơ chih tơdrong bơtho đơ̆ng ‘bok Asap, bơngai Lêwi pơm. Sư jơ̆ bơngai pơm yŏng pơgơ̆r păng bơtho gah reh brŏ lăm Hnam Pơtao Đawit (I Hơ’mon 16:4-5). Pơih blung a lăm Hơriso âu, sư krao pơtơm kon pơlei mơ̆ng nơ̆r sư đei bơtho, jơ̆ dôm tơdrong đêl yă ‘bok sư bơtho kơ kon sâu đơ̆ng rŏng gah tơdrong ‘lơ̆ng rŏ păng tơdrong mơsêh pran đơ̆ng Kră Yang ‘Bok Kei-Dei hlôi dôm jơhnơr.Tơdrong pŭ iŏk lăm kon pơlei Isơrael pơtrơp đơ̆ng jơhnơr âu truh tơ jơhnơr nai ‘noh athei bơtho kơ kon sâu lu sư, păng athei roi ăn kơ chăl đơ̆ng rŏng(Jôel 1:3; Bơtho Khôi juăt 6:7-9).
Kơplah chih Hơriso âu tơdrong tơchĕng tơtăm mă kăl tơm hloh đơ̆ng bơngai chih noh ăn kơ jơhnơr đơ̆ng rŏng athei băt kơ tơdrong roi hơ’mon kơ adrĕch adrung đơ̆ng tơdrong bơtho kơ lu bơngai năm hơdrol. Tơdrong kơnhăm wă kơ lu sư wă huŏng lăm tơdrong yoch dah ưh kơ wă kơ lui mă lei đĭ jơhngơ̆m lui gơnang kơ Kră Yang. Sư pơma tơpă lăm tơdrong bơtho ăn kơ jơhnơr đơ̆ng rŏng tơdrong rĕng wă tơgŭm kon sâu huay kơ hiơt kơ dôm tơdrong Kră Yang đei tơgŭm yă ‘bok lu sư, păngbăt kơ wei răk khôi juăt Sư (tr.7). Kră Yang ‘Bok Kei-Dei ưh kơsĭ kơ lăp “pơjing pơgơ̆p pơkă hăm Jakôp hơgăt ăn tơdrong juăt lăm Isơrael”, mă lei oei “bơtho tơtă ăn kơ yă ‘bok lu bơ̆n athei bơtho ăn kơ kon sâu sư kơdih” ( tr.5 BTTHĐ). ‘Nâu bơih minh nơ̆r tơtă! Kră Yang ‘Bok Kei-Dei wă kơ mĕ ‘bă athei đei pŭ iŏk tơdrong bơtho ăn kon sâu lăm hnam dơnŏ wă tơgŭm kon sâu băt kơ Kră Yang păng đĭ jơhngơ̆m lui gơnang kơ Sư. Bơngai chih kư̆m tơ’blŏk kơ yă ‘bok Isơrael đei iung plơ̆ Kră Yang. Lu sư ưh pă lui kơjăp kơ Kră Yang. Păng lu sư gô pŭ iŏk đơ̆ng rŏng kơ lu sư ưh kơ chu yom Kră Yang.
Khul Lui kơ Kră Yang dang ei kăl dêh ‘măn hơdrol hloh tơdrong pơyơ̆r jên tơmam, jơhngơ̆m pran wă bơtho Nơ̆r Kră Yang ăn kơ lu chăl lu oei hơ’lơ̆p. Păng kư̆m ‘nĕ kơ hiơt tơ’blŏk ăn kơ lu mĕ ‘bă, yă ‘bok kăl kơ tơchĕng tơtăm mă lơ hloh kơ đĭ jơhngơ̆m krao khan păng bơtho tơdrong lui ăn kơ kon sâu jơ̆ jơhnơr ning mônh lăm Khul Lui. Tơdrong bơtho ăn khôi juăt Kră Yang ăn kơ jơhnơr pơtrơp đơ̆ng rŏng ‘noh đĭ jơhngơ̆m kăl dêh tơpă păng hăt hot wă kơ kon sâu oei kơjăp lăm đon lui păng băt chu yom Nơ̆r Kră Yang. Kon sâu kư̆m kăl kơ băt tơdrong hơ’mon kơ kon pơlei Kră Yang wă kơ băt kơ dôm tơdrong Kră Yang đei tơgŭm păng wei răk Nơ̆r Sư bơtho pơkă. Mă khan lu yă ‘bok đei pơm glăi, pơrơ̆ng pơm yoch, blah plơ̆, ưh pă bơwei tơdrong tơnăp hăm Kră Yang, kư̆m ưh kơ gơh ôn mă lei noh ‘bai pơhrăm wă tơgŭm kon sâu wă huay kơ pơma chrih yua kơ kiơ yă ‘bok bơ̆n pơm yoch glăi (tr.8).
Đơ̆ng noh, kon sâu lu bơ̆n huay kơ gơnang kơ kon bơngai mă-lei “Wă kơ lu sư đei jơhngơ̆m băt gơnang kơ Kră Yang ‘Bok Kei-Dei. Wă huay kơ hiơt kơ dôm tơdrong Kră Yang đei pơm. Păng wei răk dôm nơ̆r Sư tơtă” (tr.7).
Ơ Kră Yang, apinh tơ’blŏk kơ inh wă huay kơ hiơt bơtho ăn kơ kon sâu lui gơnang kơ Ih wă kơ truh tơ kră wă kơ lu nơ̆r noh huay kơ weh đơ̆ng lu sư. Apinh tơgŭm jơhnơr pơtrơp đơ̆ng rŏng băt ‘mêm kơ Ih păng đĭ jơhngơ̆m lui gơnang kơ Ih. Yua anăn Kră Yang Yêsu Krist, Amen.
Lu bơ̆n păng Khul Bơngai Lui hăm krao khan păng bơtho kon sâu băt lui gơnang kơ Kră Yang trŏ thoi nơ̆r Kră Yang tơtă ưh?
Đŏk Sơ̆p Hla ar ‘Bok Kei-Dei lăm pêng sơnăm: II Hơ’mon 6
Kênh Youtube BHKTHN:
