Mathiơ 20:24-28
“Kư̆m thoi Inh Kon Bơngai mơ̆n, Inh jur tơ ala teh âu ưh kơ sĭ Inh wă chă pơgŏ pơđep đe awih awăn kơ Inh ôh; Inh wă kơ tơ’ngla Inh kơdih awih awăn kơ đe păng Inh wă kơ tơ’ngla Inh kơdih lôch tang huai iŏk lơ bơngai.” (Mathiơ 20:28)
Nơ̆r jet tơchĕng pơwao:
– Lu bơngai jơ̆ng ‘bang đei jơhngơ̆m đon thoi yơ kơ plah mơ̆ng nơ̆r Yôhan păng Yakơ đei krao apinh Kră Yang Yêsu?
– Kră Yang Yêsu đei bơtho lu bơngai pơhrăm păng sư ‘bai pơhrăm kiơ?
– Lu bơ̆n oei bơ̆jang hăm jơhngơ̆m đon thoi yơ?
Đơ̆ng rŏng kơ mơ̆ng Yakơ hăm Yôhan đei apinh Kră Yang Yêsu wă oei gah ‘ma păng gah ‘ngiĕo, mơjĭt mônh ‘nu jơ̆ng ‘bang đei blĕk kơ bre măr sư. Lu sư đei blĕk yua kơ lu sư dai wă ‘maih pơm yŏng mă lei lu sư ưh kơ pơ̆n wă apinh. Thoi noh, na Kră Yang Yêsu đei bơtho lu sư ‘bai pơhrăm kơ minh ‘nu bơngai wă chông anhăk lăm dêh char ‘Bok Kei-Dei athei bơ̆jang phara kơ tơdrong pơm yŏng lăm teh đak. Lu bơngai bơ̆jang lăm teh đak yua kơ tơdrong pơm yŏng na pơgŏ bơngai nai athei jang yua kơ tơdrong ‘maih wă kơdih akâu sư, lu bơngai chông anhăk lăm tơdrong lui bơ̆n ưh kơ gơh thoi noh. “Mă-lei iĕm ‘nĕ kơ rok lu ‘bok pơgơ̆r noh hŏ. Dah bu lăm lu iĕm ‘maih pơm yŏng pơgơ̆r lu iĕm, bơngai noh athei pơm thoi lĕ đĭch đam iĕm.” (Trong 26-27).
Đĭch đam noh jơ̆ lu bơngai iĕ hloh lăm kon pơlei pơla, yua kơ dôm tơdrong lu sư đei noh jơ̆ lăm yŏng tơ’ngla lu sư ngăl, dôm tơdrong jang lu sư noh jơ̆ ba ăn kơ yŏng tơ’ngla sư ngăl. ‘nâu jơ̆ dôm ‘nu bơngai mă ưh kơ tơ̆chĕng kơ kơdih lu sư, lu sư bơ̆jang tơpă ưh kơ trŏ ngôi đĕch ĕch ôh, wă kơ bơngai nai wih wăn kơ lu sư păng ưh kơ trŏ kơ wă kơ bơngai nai ư-ang kơ lu sư ôh. Kră Yang Yêsu ưh kơ trŏ bơtho đĕch mă lei đei pơm kơmĭl hăm akâu jăn sư kơdih “Kư̆m thoi Inh Kon Bơngai mơ̆n, Inh jur tơ ala teh âu ưh kơ sĭ Inh wă chă pơgŏ pơđep đe awih awăn kơ Inh ôh; Inh wă kơ tơ’ngla Inh kơdih awih awăn kơ đe păng Inh wă kơ tơ’ngla Inh kơdih lôch tang huai iŏk lơ bơngai.” (trong 28).
Kră Yang Yêsu wă kơ lu bơngai mă kon Sư tơpă bơ̆jang lăm khŭl bơngai lui ưh kơ chă pơm yŏng dah wă chă lơi kơ kơdih sư ôh. Kră Yang wă kơ bơ̆n bơ̆jang tơgŭm băl hăm jơhngơ̆m đon thoi bơngai đĭch, rai băt mơn kơ Kră Yang rai iŏk đon ala păng rai bơ̆jang tơgŭm bơngai nai hloh loi. Tơdrong pơtŏ kơ tơdrong lui ưh kơ trŏ pơtŏ hăm anăn đei tơdrong jang mă lei hăm tơdrong bơ̆jang hăm tơdrong dŏng tơgŭm bơngai nai, păng chu hŭt akâu tơgŭm bơngai nai. Kră Yang Yêsu jur tơ ala teh âu ưh kơ chă pơhiôk kơ kơdih sư ôh mă lei Sư chu hŭt akâu Sư kơdih dŏng pơklaih kon bơngai. Lu bơ̆n jing kon ‘Bok Kei-Dei tơpă bơih, lu bơ̆n kăl kơ ‘bôh bơngai lui noh jơ̆ anih mă bơ̆n chu hŭt jơnăr bơ̆n, tơdrong gơh hơgei, jên tơmam bơ̆n wă tơgŭm ba ăn tơdrong đei yua kơ bơngai nai. Lu bơ̆n Kră Yang đei pơjao kơ bơ̆n đei gĭt lăm tơdrong jang tih tơdrong iĕ, “nĕ kơ pơm kiơ̆ thoi lu bơngai lăm teh đak âu” mă lei athei bơ̆jang hăm jơhngơ̆m thoi đĭch đam mă Kră Yang đei pơm kơmĭl ăn bơih.
Ơ Kră Yang, inh bơnê kơ Ih đei pơjao chăl arih Ih wă dŏng pơklaih kon, apinh ih tơgŭm Inh bơ̆jang nhen thoi bơngai đĭch đam nhen Ih đei bơ̆jang thoi noh bơih. Apinh Ih hiôk yua chăl arih inh đei pơyơ̆r bơih kơ Ih wă pơyua ăn kơ lơ bơngai kiơ̆ thoi Ih wă lăp đon. Yua a-ăn Kră Yang Yêsu Krist, Amen.
Lu bơ̆n hăm oei bơ̆jang thoi bơngai đĭch ưh?
Đŏk Sơ̆p hla bơar nơ̆r ‘Bok Kei-Dei lăm tơpêng sơnăm: Êsai 56
Kênh Youtube BHKTHN:
