Galati 4:1-11
“Bơ̆n băt boih bơ̆n jing kon Sư tơpă, yua kơ Sư wơh Yang Bơhngol ‘Lơ̆ng đơ̆ng Kon Sư jur oei păng bơ̆n, Sư bơtho bơ̆n krao kơ ‘Bok Kei-Dei Aba, ‘Bă.” (Galati 4:6).
Nơ̆r jet tơchĕng pơwao:
– ‘Bok Pôl pơma tơdrong kiơ gah anih bơngai lăm Galati adrol sơ̆ păng dang ei?
– Anih bơngai ‘nao ba ăn tơdrong kiơ?
– Phara băl mă tih dêh hơlam bơngai arih lăm chăl tơdrong juăt păng chăl ‘mêm mơnat noh kiơ?
‘Bok Pôl oei roi tơ’bôh tơdrong phara băl gah tơdrong anih gơh jing Kon păng đei yua kơplah lu bơ̆n “oei hơ’lơ̆p” wă khan kơplah kiơ̆ tơdrong juăt hăm kơplah “sư ‘lŏ bơih” wă khan oei lăm tơdrong ‘mêm mơnat (2-3) Blŭng a, sư đei tơ’bôh lăm tơdrong gơh yua iŏk mŭk tơmam, kon sư oei hơ’lơ̆p iĕ ưh kơ đei phara kiơ thoi lĕ đĭch đam lăm hnam dơnŏ, ưh kơ đei gơh pơm kiơ gah tơdrong wă yua mŭk tơmam lăm hnam dơnŏ (trong 1-2). Tơplơ̆ dơ̆ng lăm chăl đon lui păng ‘mêm mơnat, lu bơ̆n jing Kon ‘bơ̆t anih ‘nao jing “kon rong Sư” (trong 5,7). Yua kơ kiơ khan “kon rong” đĕch? Kiơ̆ kơ lu bơngai tơ’blang nơ̆r Kră Yang nơ̆r “gơh jing kon rong” lăm Pah ‘Nao noh wă khan “đei dan ‘bơ̆t anih Kon Drŏnglo Wơ̆ ‘lŏ”. Tơdrong noh wă khan anih lu bơ̆n jing kon gơh đei yua iŏk dôm tơdrong bơngai jing kon wơ̆ ‘lŏ, ‘bơ̆t anih “bơngai pơtrơp gơh yua iŏk mŭk tơmam mơdrŏng đơ̆ng Kră Yang ‘Bok Kei-Dei”. (trong 7) Gơh yua iŏk mŭk tơmam mơdrŏng đơ̆ng ‘Bă păng gơh pơm keh trŏ kơ bơngai kon pơtrơp iŏk.
Đei lơi yua mă ‘bar, kơ bơngai ‘bơ̆t anih ‘nao kơplah oei lăm tơdrong mơnat mă ‘bok Pôl đei pơma noh: “Bơ̆n băt boih bơ̆n jing kon Sư tơpă, yua kơ Sư wơh Yang Bơhngol ‘Lơ̆ng đơ̆ng Kon Sư jur oei păng bơ̆n, Sư bơtho bơ̆n krao kơ ‘Bok Kei-Dei Aba, ‘Bă.” (trong 6). Tơdrong mă ‘lơ̆ng dêh mă anih jing kon rong đei yua noh Kră Yang ‘Bok Kei-Dei wơh Yang Bơhngol ‘Lơ̆ng jur tơlăm jơhngơ̆m lu bơ̆n. Păng yua Yang Bơhngol ‘Lơ̆ng mơ̆t pơgơ̆r lăm, lu bơ̆n thoi noh bơ̆n ưh pă arih tơdrong juăt wei lăng wă kơ pơm ‘blep trŏ lu nơ̆r “nĕ kơ” “lê̆ kơ” dơ̆ng bơih. Mă lei lu bơ̆n gơh đei rơngei wă pơm kiơ̆ tôm tơdrong kiơ̆ thoi Yang Bơhngol ‘Lơ̆ng chông anhăk.
Dang ei, hăm đei la yơ bơ̆n ‘bôh tơdrong hơnat mă Kră Yang wă kơ bơ̆n pơm minh tơdrong kiơ ‘mơ̆I mă hơđăl rơđah păng lu bơ̆n hơpơi rŏ kơ Sơ̆p hla bơar Nơ̆r ‘Bok Kei-Dei chih hơđăl nhen tơdrong kiơ kăl kơ pơm hloi wă huay kơ hli sơ’ngon lăm tơdrong tơchĕng thoi âu, thoi to dơ̆ng? tơdah đe bu mơn đei thoi noh, lei na nơ̆r ‘Bok Pôl đei tơl tơ wih khan: lu bơ̆n đei ba ăn tơdrong mă ‘lơ̆ng hloh lơ dêh mă đei bơtho tơ’bôh tôm tĕch tơdrong hăm nơ̆r pơma lăm hla ar ‘noh tơm sư đơ̆ng Yang Bơhngol ‘Lơ̆ng! kơthơ II Kôrintô 3:6 “Sư ăn kơ nhôn pran kơtang gơh jang tơdrong pơgơ̆p ‘nao, tơdrong Yêsu Krist pơgơ̆p bơ̆n hăm ‘Bok Kei-Dei. Tơdrong noh ưh kơ đei chih tơ tơmo lat thoi tơdrong ‘Bok Kei-Dei pơkă hơdrol sơ̆ ôh, tơdrong noh Yang Bơhngol ‘Lơ̆ng tơgŭm. Tơdrong chih tơ tơmo lat phak pơlôch kon bơngai. Yang Bơhngol ‘Lơ̆ng ưh ôh. Sư ling-lang ăn kon bơngai arih.”. Rim ‘nu lu bơ̆n athei chơt hiôk yua iŏk tơdrong mơdrŏng, tôm tơdrong đơ̆ng ‘bơ̆t jing kon rong, ‘nĕ kơ arih kiơ̆ nơ̆r lăm hla ar đĕch, mă lei Yang Bơhngol ‘Lơ̆ng lăm lu bơ̆n.
Ơ Kră Yang, Inh Bơnê kơ Ih yua kơ tơdrong mơdrŏng pă băt dang yơ ăn kơ inh gơh yua iŏk. Apinh Ih tơgŭm inh arih kiơ̆ Yang Bơhngol ‘Lơ̆ng wă kơ inh ‘maih pơm kiơ̆ rim năr lăm tơdrong Ih đei ăn, chông anhăk. Krao khan yua anăn Kră Yang Yêsu Krist, Amen.
Lu bơ̆n hăm oei arih lăm tơdrong ‘mêm mơnat hăm lu bơngai arih lăm tơdrong mơnat ăn đĕch ưh?
Đŏk Sơ̆p Hla Bơar nơ̆r ‘Bok Kei-Dei lăm pêng sơnăm: Êsai 14.
Kênh Youtube BHKTHN:
