Yakơ 5:19-20
“bơngai noh ‘lơ̆ng tơpă băt ‘mêm kơ bôl sư jrok trong pơlung bôl sư wih lui dơ̆ng kơ ‘Bok Kei-Dei. Na ‘Bok Kei-Dei gô pơklaih bôl sư mă jrok trong noh đơ̆ng tơdrong lôch pơmat huay kơ jô̆ yo dôm tơdrong sư pơm yoch.” (Yakơ 5:20)
Nơ̆r jet tơchĕng pơwao:
– Bơngai “wơ̆l jrok” noh bơngai thoi yơ?
– Bơ̆n athei pơm kiơ mưh bơ̆n băt kơ bơngai bu ei hơtai oei wơ̆l jrok?
– Pơm thoi yơ wă ba lu bơngai wơ̆l jrok noh wih brŏk tơ Kră Yang?
‘Bok Yakơ chih kơthơ sư, sư pơtôch tơdrong sư chih kơthơ noh ưh hăm nơ̆r kơkuh jet gia,krao khan dah sơkat pŭn hiôk kơ lu bơngai mă đŏk kơthơ sư. Tơplih kơ noh, sư ‘măn ăn kơ lu bơngai lui nơ̆r tơ’blŏk,nơ̆r athei noh thei ba lu bơngai wơ̆l jrok wih brŏk tơ Kră Yang. Bơngai wơ̆l jrok mă ‘bok Yakơ pơma pao noh lu bơngai “ lăm lu iĕm” mă-lei lu đei ei oei “wơ̆l jrok hiong tơdong sư lui kơ ‘Bok Kei-Dei”păng lu sư noh “bơngai yoch”. Lu sư âu bơngai đêl oei lăm Khul Lui ră mălei kơplah wah noh lu sư weh tơklah đơ̆ng pơlei pơla bơngai lui, ưh pă arih lui kơkuh kơ ‘Bok Kei-Dei bơih. Lu sư hơtai arih lăm tơdrong yoch păng wơ̆l jrok hơnhăk hơnhông kiơ̆ tơdrong ala teh,arih ưh kơ đei rĕng kơnhăm,arih kiơ̆ kơ bơngai ala teh dang lĕ đak dơsĭ poh yă tŭn bơbơ̆t wă hiong răm. Dah ưh kơ đei bơngai dŏng lei bơhngol lu đe ei gô ba truh tơ tơdrong lôch.(tr.20).Kơplah ‘bôh lu bơngai wơ̆l jrok thoi noh,bơ̆n âu Kră Yang krao bơ̆n athei ba lu đe ei wih brŏk tơ Sư, “weh đơ̆ng trong wơ̆l jrok”.
Tơdrong ba lu bơngai wơ̆l jrok wih brŏk ‘nâu đei tơdrong gĭt yua tih dêh. Mă minh, tơgŭm “dŏng bơhngol bơngai noh klaih đơ̆ng tơdrong lôch.” Mă ‘bar, tơgŭm “ wă kơ Kră Yang huay kơ jô̆ yo tơdrong yoch lu đe noh” ăn kơ bơhngol lu đe noh gơh klaih huay pă pŭ tơdrong Sư hil phak.
Bơ̆n bơngai lui kơ Kră Yang, Kră Yang dan bơ̆n lăm kon pơlei bơngai lui, ưh kơ pôm akâu bơ̆n kơdih đĕch athei đĭ jơhngơ̆m arih kiơ̆ nơ̆r Kră Yang ôh, mălei kư̆m wei lăng dih băl, tơgŭm dih băl wă kơ đĭ-đăng bơ̆n oei lăm teh đak âu bu bu kư̆m arih kiơ̆ kơ đon lui.Bơ̆n lăng tơdrong arih Khul Lui bơ̆n đei tơpă dang ei ‘nâu, bơ̆n ‘bôh tơ âu, tơ to kư̆m đei lơ bơngai weh achăng lê̆ tơdrong lui. Đei bơngai mơ’nah ki sơ̆ lu sư kư̆m jang tơdrong jang Kră Yang lăm Hnam Akŭm, jang hưch hanh dêh,lu sư chĕp tơdrong jang kăl dêh pơm kră hnam yang wei lăng hnam akŭm,đei lu mơ’nah sư bơngai wei lăng tơm lăm khŭl tơdrong jang lăm hnam akŭm…mă-lei dang ei lu sư kư̆m jrok trong. Nơ̆r Kră Yang bơtho athei bơ̆n pŭ iŏk tơdrong jang chông ba lu sư wih brŏk tơ Kră Yang.
Pơm liơ wă chông ba lu bơngai wơ̆l jrok kơ trong gơh wih brŏk tơ Kră Yang? Lu bơngai mă jrok trong ei, mơ’nah sư mơn đei tơdrong truh anat kơ sư thoi yơ noh na sư băt kơ sư glăi,na sư kơdih wơ̆t brŏk tơ Kră Yang. Mă-lei lăm lu bơngai jrok trong noh lơ ‘nu kăl kơ đei bơngai ayơ ei ‘mêm mơnat adrin tơgŭm pơlung adar deh huay kơ bơ̆l hăl. Khul Lui păng kơdih rim ‘nu bơngai lui athei đĭ jơhngơ̆m krao khan tơgŭm dŏng lu bơngai jrok trong,’măn jơ năr năm ngôi hơpong, bơwei, wei tơdrong tơ’bưh ‘lơ̆ng hăm lu sư, yua iŏk dôm lu jơ trŏ lăp wă bơtho tơ’blŏk, pơlung lu sư, pơtih thoi: năr bơ̆n tơ’bơ̆p băl, dah năr bơ̆n jang hơdai..v..v.. ’noh bơih lu trong mă bơ̆n pơm wă ba lu bơngai jrok trong wih brŏk tơ Kră Yang.’Bơ̆t yơ kơnh tơdrong ba lu bơngai jrok trong ‘nâu bơ̆n mơn ‘bôh anat dêh mă-lei wă kơ bơ̆n ‘nĕ kơ bơ̆l hăl kơdŭn tơ rŏng, Kră Yang bơ̆n Sư mơsêh gơh iŏk hŭt lê̆ jơhngơ̆m arăng thoi tơmo,ăn jơhngơ̆m rơmuăn thoi sĕch wă chu kiơ̆ Sư.(Êsêkiên 36:26)
Kơkuh kơ Ih Kră Yang, inh bơnê kơ Ih ‘mêm mơnat, Ih ưh kơ wă kơ minh ‘nu bơngai ayơ huŏng lăm dơnâu ŭnh tŏ hang hơt pơmat tat ling-lang ưh kơ đei la-yơ tôch. Inh krao khan tang lu bơngai wơ̆l jrok weh ataih đơ̆ng Ih, sơngah tơdrong lui dŏng pơklaih mă lu sư kơtơ̆ng băt bơih. Apinh Ih yua inh kiơ̆ kơ Ih wă, wă kơ inh wang dŏng tơdrong jang ba lu bơngai wơ̆l jrok kơ trong wih brŏk dơ̆ng tơ Ih.Inh krao khan yua năn Kră Yang Yêsu Krist, Amen!
Năr ‘nâu, bu bơngai mă Kră Yang tơ’blŏk wă kơ bơ̆n krao khan tang, wă kơ bơ̆n tơgŭm ba sư wih brŏk tơ Kră Yang?
Đŏk Sơ̆p Hla bơar ‘Bok Kei-Dei lăm pêng sơnăm: II Hơ’mon 23.
Kênh Youtube BHKTHN:
