Nêhêmi 4:1-3, 7-14
“Mă-lei lu nhôn krao khan apinh Kră Yang ‘Bok Kei-Dei lu nhôn păng rơih chă bơngai kral gak kơ măng kơ’năr wă găn lu sư.” (Nêhêmi 4:9)
Nơ̆r jet tơchĕng pơwao:
– Bơngai ayăt kơ ‘Bok Nêhêmi păng lu kon pơlei Jêru salem noh bu?
– Lu sư chă đon liơ wă pơgăn tơdrong jang man hơmet ming dur pơlei Jêrusalem?
– Bok Nêhêmi păng kon pơlei Jêrusalem hlôi pơm kiơ bơih?
– Bơ̆n kăl kơ đei jơhgơ̆m liơ mưh tơ’bơ̆p tơdrong đe hil areh pơm kơnê̆?
Iŏk đơ̆ng năr ‘bok Nêhêmi wih brŏk dơ̆ng tơ Pơlei Jêrusalem,păng tơdrong jang man hơmet ming dur pơlei,lu sư tam mă pơtơm jang, na đei hloi lu ayăt lăm dêh sư pơtơm drŭt blah lu sư. (Nêhêmi 2:19-20). Lu sư wang pơlei Jêrusalem tăp puăn pah: ‘Bok Sanbalat păng lu bơngai Samri noh pah yă nơ̆m,‘bok Tôbia păng lu bơngai Am môn pah hơlĕch,’bok Gesam păng lu bơngai Arâp pah gơal, na lu bơngai Asdôt pah bơmơ̆t. Tơmam tơblah mă lu sư yua wă blah lu kon pơlei Jêrusalem ‘noh hăm tơdrong che bơle, pơjăm.(tr.1). Trong lu sư chă đon ‘nei wă pơkeh ‘bônh dêh, yua kơ hăm nơ̆r ‘bơ̆r che bơle, pơjăm pơjuă đĕch, mă-lei lu sư chă đon thoi ‘nei đei yua ăn kơ lu sư dêh, yua kơ che bơle pơjăm pơjuă noh bơih pơm kơ jơhngơ̆m đe bơ̆l hăl, sap klai, yua kơ pơjăm noh pơrăm tơdrong gĭt lăm to bơngai noh, kư̆m pơrăm tơdrong gĭt tơdrong jang mă bơngai ei oei jang noh.
‘BokThômaskarlyle, sư bơngai Ăng gle, sư juăt kơ tơchĕng hơlen kơ nơ̆r đe pơma, sư khan tơdrong che bơle pơjăm noh “nơ̆r yang kơnê̆”. Lu bơngai Juđa kơtuei, lu sư jang man hơmet ming dur pơlei, noh tơdrong jang tih kăl dêh, na lu ayăt ei pơm kơnê̆ che bơle pơjăm tơdrong “rơdu tơrăn” lu bơngai Juđa ‘bơ̆t anăp tơdrong jang tih kăl ei. Lu bơngai Juđa jang man dur ei yua kơ Kră Yang, wă ư-ang anăn Kră Yang păng yua kơ adrĕch lu sư kơdih mơ̆n, noh bơih tơdrong pơdrŭt jơhngơ̆m lu sư jang. Mă-lei lu ayăt blah jơhngơ̆m lu sư, khan lu sư jang noh wă yua ăn lu sư kơdih đĕch, ưh kơ jang wă ư-ang kơ Kră Yang. Tơm măt đe Juđa hloi,lu ayăt che bơle pơjăm pơjuă adrĕch Juđa, kư̆m che bơle pơjăm pơjuă tơdrong lui, pơlong lăng tơdrong lui kon pơlei Kră Yang hloi mơ̆n.(tr.2-3).Gah cheng kơ ‘noh dơ̆ng,lu ayăt kư̆m blah tơhli kon pơlei Jêrusalem, pơlôch kon pơlei adrĕch Juđa wă pơm kơ tơdrong jang lu sư dơ̆ng, wă ưh kơ yĕng jang. (trong 7, 11).
Ưh kơ minh tăl ayăt đơ̆ng ‘nguaih wang tăp puăn pah noh đĕch ôh, mă-lei đei lăm lu kon pơlei Kră Yang noh hai, lu sư adrĕch đe Juđa mă-lei lu sư pơma nơ̆r ưh kơ pơdrŭt hơtŏk tơiung,lu sư pơma nơ̆r hơi pơm kơ jơhngơ̆m kon pơlei sap (tr.10). Adrĕch Juđa, trŏ kơ adrĕch pơgơ̆r, adrĕch tơnăp kơjăp, păng adrĕch pran kơtang hloh lăm tơdrong jang Kră Yang. (Blŭng a 49:8-10), mă-lei ‘bơ̆t dâu ‘nâu, adrĕch Juđa tă tơ pơm kơ kon pơlei Kră Yang lơ bơngai bơ̆l hăl băl lap sap klai. Mă loi, lu bơngai Juđê mă arih oei jê̆ tơtil lu bơngai ayăt noh iung pơm pơrŭng , pơm kơ kon pơlei rŭng-răng, hơwơ̆l hơwang,tơrơ tăr wăr (tr.12). Lu sư pơtơm ‘maih mơ̆ng dôm nơ̆r lu ayăt pơma che bơle pơjăm pơjuă noh hloh kơ mơ̆ng nơ̆r’Bok kei-Dei, na lu bơngai Juđê ‘nâu hei, mă lu sư pơrơ̆ng ‘mơ̆i dah mă ưh kơ pơrơ̆ng ră, lu sư pơm thoi noh,‘noh lu sư jing thoi tơmam tơblah mă lu ayăt yua wă blah lu kon pơlei Kră Yang.
Rơđah hơđăl tơpă lu ayăt pơm kơnê̆ ‘nâu, rai đunh rai dêh, bơngai lu sư rai lơ, tơdrong lu sư pơm kơnê̆ kư̆m rai trăp rai krê hơmơt hloh. Tơdrong ‘nâu trŏ hăm jơhnơr‘bok Nêhêmi păng kon pơlei Kră Yang ei sơ̆, kư̆m lei-lăi thoi lu bơngai kiơ̆ Kră Yang rim jơhnơr đơ̆ng sơ̆ khơ̆ kơ dang ei. Sơ̆‘bok Nêhêmi hlôi rơih chă bơngai gak kơmăng kơ ’năr thoi yơ bơih noh, lu bơ̆n dang ei kư̆m athei mă kơchăng, krăng kơ tơdrong lu ayăt chă đon blah bơ̆n thoi noh mơ̆n (Mathiơ 7:15). Tơdrong kăl hloh kơ đĭ-đăng noh athei ‘măn tơdrong krao khan adrol hloh, ‘nĕ kơ pơjăng pơjăr hăm lu ayăt ei hăm tơdrong tơchĕng hlôh wao bơ̆n kơdih, tơdrong kĕ pran bơ̆n kơdih (tr.9,14). Bơ̆n athei pơhrăm iŏk đơ̆ng ‘bok Nêhêmi hăm kon pơlei Kră Yang ei sơ̆ gah tơdrong krao khan, gơnang kơ Kră Yang wă kơ bơ̆n tơblah hăm lu ayăt đơ̆ng lăm,ayăt đơ̆ng ‘nguaih jei bơ̆n yua kơ đơ̆ng Kră Yang dŏng bơ̆n.
Kơkuh kơ Ih Kră Yang, rim năr inh arih lăm chăl arih ‘nâu đei tơ’bơ̆p lơ tơdrong pơlong lăng,anat anot, tơdrong đe hil areh pơm kơnê̆…, apinh Ih ăn kơ ĭnh lăng ‘bôh tơdrong Ih pơgơ̆r wei-lăng tôm tơdrong sele lăm chăl arih ĭnh, tơgŭm ĭnh lăng tơ Ih ling-lang, păng yua kơ ‘noh đon lui inh kơjăp iăp kơtang. Inh krao khan yua anăn Kră Yang Yêsu Krist, Amen!
Đêl ‘bok Nêhêmi jang, pơm‘bơ̆t sư pơjăng pơjăr hăm tơdrong đe pơm kơnê̆ sơ̆ noh tơgŭm bơ̆n dang ei tơdrong kiơ?
Đŏk Sơ̆p Hla bơar ‘Bok Kei-Dei lăm pêng sơnăm: Luka 4
Kênh Youtube BHKTHN:
