Jôsuê 3:1-5
“Jôsuê kư̆m khan kơ kon pơlei: Lu iĕm athei wei akâu mă ‘lơ̆ng rơgoh yua kơ dơning Kră Yang gô pơm tơdrong hlĭch chrơp, tŏk-bŏk lu iĕm,” (Jôsuê 3:5)
Nơ̆r jet tơchĕng pơwao:
– ‘Bok Jôsuê păng kon pơlei iung đơ̆ng tep oei hrôih wă pơm kiơ?
– Sư athei kon pơlei pơm kiơ?
– Lu bơ̆n kăl kơ pơm kiơ wă kơ ‘bôh “tơdrong hlĭch chrơp” Kră Yang pơm kơ tơdrong arih păng tơdrong bơ̆n bơ̆jang kơ Kră Yang?
Đơ̆ng Sitim, ‘bok Jôsuê iung đơ̆ng hrôih wă chông ba kon pơlei Isơrael năm dang 11 kơsô̆ truh tơ jih đak krong Jôrđăn păng ‘bĭch gô tơ noh adrol kơ tŏk găn đak krong. Đơ̆ng rŏng kơ noh pêng năr, lu bơngai wei lăng năm jơ̆p kơ rim anih păng pơkă kơ kon pơlei đơ̆ng rŏng kơ đe tung Hom tơdrong Pơgơ̆p Kră Yang đơ̆ng lu ‘bok soi tung. Đei pơkă kơ lu sư athei yak ataih băl sơlam kơ lu iĕm hăm Hom Pơgơ̆p Kră Yang noh dang ‘bar rơbâu hơgăt wă kơ “băt kơ trong yak” (trong 4). Dah kon pơlei jum dăr kơ Hom tơdrong Pơgơ̆p Kră Yang lei anat dêh wă lăng tơ gah Hom tơdrong Pơgơ̆p Kră Yang păng yak kiơ̆ Hom tơdrong Pơgơ̆p Kră Yang. Đơ̆ng tơdrong noh bơih na lu sư gơh năm kiơ̆ kơ trong mă lu sư “ưh tam lah yak trong noh” păng ‘bôh tơdrong mơsêh hlĭch Kră Yang pơm kơ đak tơklah ‘bar pah. ‘Nguaih kơ ‘noh, Hom tơdrong Pơgơ̆p Kră Yang pơtih kơ tơdrong Kră Yang oei hơdai thoi noh kon pơlei athei yak ataih băl wă pơyom tơdrong ‘lơ̆ng rơgoh Kră Yang (II Samuel 6:6-7).
Wă hơmet kơ tŏk găn đak krong ‘bok Jôsuê athei kon pơlei: “Jôsuê kư̆m khan kơ kon pơlei: Lu iĕm athei wei akâu mă ‘lơ̆ng rơgoh yua kơ dơning Kră Yang gô pơm tơdrong hlĭch chrơp, tŏk-bŏk lu iĕm,” (trong 5). Tơdrong tơplih ‘nao kăl dêh tơpă wă hơmet kơ kon pơlei ‘bôh tơdrong hlĭch chrơp Kră Yang gô pơm kơ lu sư. Sơ̆ ki sơ̆ kach, Kră Yang khan kơ kon pơlei tơ kông Sinai. Lăm kơplah noh lu sư athei bơwei akâu ‘lơ̆ng rơgoh, athei pih ao tai, ‘nĕ năm jê̆ bơngai drŏkăn (LĐ Êyiptơ 19:10-15). Adrol kơ đei Kră Yang ăn pŭn hiôk, ‘bok Jôkôp kư̆m athei hnam dơnŏ sư “wă kơ bơ̆n rơgoh ‘lơ̆ng” (Blŭng a 35:2), hŭt lê̆ bĕ lu rup man pơm yang păng tơplih bĕ hơbĕn ao iĕm. Kơplah Kră Yang wă pơm tơdrong hlĭch chrơp kơ kon pơlei sư lei na lu sư athei hơmet lê̆ (Jô̆ bơngai 11:18), athei weh bĕ đơ̆ng tơdrong kiơ mă ưh kơ ‘lơ̆ng rơgoh, noh dôm tơdrong kiơ mă pơm kơnê̆ kơ lu sư hăm ‘Bok Kei-Dei mă ‘lơ̆ng rơgoh. Lu sư athei pih hơbĕn ao lu sư, wei akâu rơgoh, ‘nĕ kơ sa lu minh ‘bar tơmam sa.v.v… Đĭ đăng dôm tơdrong noh pơma gah minh tơdrong arih păng jơhngơ̆m ‘lơ̆ng rơgoh kăl kơ đei kơplah wă năm tơ Kră Yang.
Dang ei, mă khan Kră Yang ưh kơ pơm đak tơklah băl thoi chăl sơ̆ wă kơ bơ̆n tŏk găn đak krong mălei sư oei pơm dôm “tơdrong hlĭch chrơp” wă tơgŭm kơ bơ̆n hlôi đơ̆ng dôm tơdrong pơgăn, pơmat lăm tơdrong dah arih lăm tơdrong bơ̆jang kơ Kră Yang. Kră Yang wă gah tơdrong arih ‘lơ̆ng rơgoh ‘măn kơ lu kon Sư mă đơ̆ng chăl sơ̆ truh dang ei ưh kơ layơ tơplih. Wă kơ ‘bôh lu tơdrong hlĭch chrơp Kră Yang pơm, bơ̆n kư̆m kăl kơ đei hơmet lê̆ păng pơm kơ akâu ‘lơ̆ng rơgoh. Athei năm bĕ tơ Kră Yang păng nơ̆r Sư, apinh tơdrong sut rơgoh păng tơdrong mơnat đơ̆ng Kră Yang, ataih đơ̆ng tơdrong yoch păng dôm tơdrong kiơ mă Sư ưh kơ lăp đon (I Yôhan 1:7, 9).
Ơ Kră Yang, apinh Ih tơplih inh jing bơngai ‘nao rim năr wă kơ inh băt sĭt tơdrong mơsêh hlĭch chrơp Ih lăm chăl arih inh. Apinh Ih tơgŭm inh weh ataih đơ̆ng dôm lu tơdrong pơm kơ inh jing kơnê̆ gah tơdrong tơ’bưh hăm Ih păng inh. Krao khan yua anăn Kră Yang Yêsu Krist, Amen.
Đŏk Sơ̆p Hla bơar ‘Bok Kei-Dei lăm pêng sơnăm: Tơdrong Tơ’bôh 5
Kênh Youtube BHKTHN:
