Klei Aê Diê Blŭ: Klei Mphŭn Dơ̆ng 2:1-3
Êlan kliăng: “Ti hruê tal kjuh Aê Diê bi ruê̆ bruă Ñu ngă leh, leh anăn Ñu mdei hruê tal kjuh mơ̆ng jih bruă Ñu ngă leh” (Klei Mphŭn Dơ̆ng 2:2)
Klei êmuh ksiêm mĭn: Ya ngă Aê Diê mdei hlăm hruê tal kjuh? Ya klei hriăm drei mâo kơ klei yuôm mơ̆ng klei mdei leh anăn mă bruă? Si srăng ngă čiăng mâo klei djŏ hnơ̆ng ti krah klei hdĭp mñik mñak hŏng lu bruă?
Ruê̆ năm hruê hrih mjing lăn adiê leh anăn jih jang mnơ̆ng, Aê Diê mdei ti hruê tal kjuh. Aê Diê mdei amâo djŏ Ñu êmăn ôh. Klei Aê Diê Blŭ brei thâo Aê Diê mdei tơdah “bi ruê̆ bruă Ñu ngă leh” (êlan 2). Ruê̆ năm hruê hrih mjing, “Aê Diê ƀuh jih jang mnơ̆ng Ñu mjing leh, leh anăn nĕ anei, diñu jing jăk snăk” (Klei Mphŭn Dơ̆ng 1:31). Truh ti hruê tal kjuh, Aê Diê mdei kyuadah klei Ñu hrih mjing jing jăk leh anăn klă ênŭm leh, leh anăn dưi săng klei mdei anăn jing êlan čiăng bi êdah kơ klei jăk hlăm bruă Ñu hrih mjing.
Aê Diê amâo čiăng kơ klei mdei ôh, ƀiădah Ñu ngă snăn čiăng mjing klei bi hmô kơ klei mdei leh ruê̆ klei mă bruă. Mă bruă jing jăk leh anăn mdei jing jăk snăk mơh. Tơdah knŏng mă bruă ƀiădah amâo mâo mdei ôh, amâo djŏ mnuih knŏng hwăt ôh ƀiădah wăt dôk bi êdah kơ diñu dlăng kơ bruă jing msĕ si rup yang, jing mnơ̆ng diñu dưm êlâo hĭn hlăm klei hdĭp diñu, tơl diñu bruă mă jih hruê mmông leh anăn ai ktang diñu. Mnuih srăng mă bruă grăp hruê kyuadah huĭdah tơdah amâo mă bruă ôh amâo srăng mâo djăp ôh mnơ̆ng yua kơ klei hdĭp, leh anăn klei anăn bi êdah kơ mnuih amâo mâo knang sĭt ôh kơ klei jăk Aê Diê.
Bi tơdah knŏng mdei ƀiădah amâo mă bruă ôh, anăn jing klei alah. Klei mdei knŏng jing jăk tơdah mdei ruê̆ klei mă bruă. Boh klă gơ̆, amâo djŏ Aê Diê knŏng mdei hlăm hruê tal kjuh ôh, ƀiădah wăt Ñu “hơêč hmưi klei jăk jĭn kơ hruê tal kjuh leh anăn pioh brei gơ̆ jing hruê doh jăk” mơh (êlan 3). Klei mdei jing mnơ̆ng brei Aê Diê brei kơ mnuih leh anăn mnơ̆ng brei anăn knŏng jing yuôm tơdah drei yua klei mdei anăn pioh kkuh mpŭ kơ Aê Diê, Pô brei leh kơ drei klei mdei. Hruê mdei amâo srăng jing hruê doh jăk ôh tơdah anak mnuih amâo pioh hruê anăn kơ Pô Doh Jăk.
Knư̆ klei hdĭp đĭ kyar knư̆ anak mnuih mñik mñak. Tơdah arăng mkă hruê mmông hŏng prăk snăn arăng srăng dlăng kơ hruê mdei jing hruê luč liê. Kyuanăn mâo lu mnuih “mă hruê amâo djăp, hnêč ngă mlam, ngă thiăm wăt hruê mdei”. Mnuih mñik mñak hŏng klei duah prăk čiăng kơ klei hdĭp jing jăk hĭn, ƀiădah boh sĭt brei ƀuh jing jhat hĭn. Êjai anăn klei mă bruă leh anăn klei mdei yơh jing hdĭp djŏ tui si hdră klei hdĭp Aê Diê mkra leh. Tơdah drei thâo kral sĭt nik Khua Yang jing Pô dôk kiă kriê, gai gĭt jih jang mnơ̆ng kơh drei srăng mâo klei mdei sĭt nik amâo mâo klei rŭng răng ôh.
Si ngă drei knang kơ klei jăk Aê Diê kiă kriê leh anăn mdei pioh kkuh mpŭ kơ Ñu mơ̆?
Wah lač: Ơ Khua Yang, kâo thâo săng klei mdei jing mnơ̆ng brei jăk jĭn Ih brei leh kơ kâo. Đru kâo kriăng mă bruă leh anăn mdei wăt tơdah mñik mñak dưn mơh. Đru kâo thâo knang kơ Ih jing Pô Hrih Mjing bŏ hŏng klei jăk hrô kơ klei knang kơ ai ktang kâo pô. Brei hruê mdei kâo jing hruê doh jăk leh anăn hruê jăk jĭn tơdah kâo kkuh mpŭ kơ Ih. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Yêrêmi 30
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
