Mathiơ 23:23
“…iŏk jên noh pơm pơyơ̆r kơ ‘Bok Kei-Dei minh lăm mơjĭt. Mă-lei dôm tơdrong juăt ‘Bok Kei-Dei mă kăl hloh thoi lĕ kơ pơm ‘lơ̆ng kơ đe, athei ‘mêm kơ ‘Bok Kei-Dei hăm bôl buăl, tơdrong lui kơ ‘Bok Kei-Dei, dôm tơdrong noh iĕm pơhơi ưh kơ wă pơm. Mă tơdrong iĕm pơyơ̆r tơmam hơi noh kư̆m trŏ mơ̆n, mă-lei ưh kơ dang bơ̆n kiơ̆ tơdrong juăt noh hei.”
(Mathiơ 23:23)
Nơ̆r jet tơchĕng pơwao:
– Yua kơ kiơ Kră Yang chrih khă thây bơtho tơdrong juăt đe Juđê păng bơngai Pharisi bơtho hơlĕnh?
– Sư đei hŭt lê̆ tơdrong kăl ayơ?
– Nơ̆r bơtho ‘nâu hơđăl tơpă kơ Khul Bơngai Lui dang ei thoi yơ?
Kră Yang Yêsu chrih khan tơpăt lu thây bơtho tơdrong juăt đe Juđê păng bơngai Pharisi, khan kơ lu sư “bơngai bơtho hơlĕnh” yua kơ lu sư lăng gĭt tơdrong gah ‘nguaih (trong 23a). Lu sư đe ưang wei tơdrong juăt pơ’lơ̆ng dêh, na pơyơ̆r minh lăm mơjĭt jên đơ̆ng tĕch lu hla ‘nhot thoi kơ hla lŭng hŭng, hla gơsâm păng hla ĕch. Gah ‘nguaih, lăng lu sư rŏ kơ ‘lơ̆ng tơpăt dêh. Mălei Kră Yang Yêsu tơ’bôh tơdrong kăl: Lu sư lăng gĭt đơ̆ng dôm tơdrong iĕ, na hŭt lê̆ dôm “tơdrong juăt ‘Bok Kei-Dei mă kăl hloh”. Sư pơma lăm pêng tơdrong kăl: “Pơm ‘lơ̆ng kơ đe, ‘mêm kơ ‘Bok Kei-Dei hăm bôl buăl păng tơdrong lui kơ ‘Bok Kei-Dei” (trong 23b). ‘lơ̆ng tơpăt noh arih tơpăt păng arih sa tơpăt hăm bơngai nai. ‘Mêm mơnat noh băt kơ mơnat, mơnat păng tơgŭm kơ bơngai mă oei đei tơdrong kăl. Tơnăp noh arih tơpăt tơpă, pơyơ̆r kơ ‘Bok Kei-Dei lăm tôm tơdrong. ‘Nâu bơih dôm tơdrong gĭt kăl tơ’bôh jơhngơ̆m gah ‘Bok Kei-Dei, mălei lu bơngai pơgơ̆r tơdrog lui lăng hơi dêh.
Nơ̆r chrih khă ‘nâu tơpăt tơpă hăm Khul Bơngai Lui dang ei. Bơ̆n năm tơ hnam akŭm hơnơ̆ng, bơ̆jang hơdrin dêh, pơyơ̆r tôm mah, mălei oei ưh tam mă đei tơdrong ‘lơ̆ng tơpăt păng tơdrong ‘mêm tơpă. Minh Khul Bơngai Lui adrin gah ‘nguaih, mălei dah ưh kơ đei pêng tơdrong kăl ‘nâu, lei ‘bônh dêh kơ pơm tơklah băl, sek tơlang păng pơm tơ’bôh yua kơ arih glăi hăm tơdrong pơtrŭt păng tơdrong kơnhăm. Nơ̆r pơma gơh gah bơhngol, mălei tơdrong tơ’bưh băl ưh kơ đei ‘mêm mơnat. Gơh bơtho tơdrong tơpăt sĭt, mălei ưh kơ tơ’bôh tơdrong ‘mêm. Kră Yang Yêsu ưh kơ lăp đon dôm tơdrong jang pơm tơ’bôh gah ‘nguaih, Sư khan: “tơdrong lui kơ ‘Bok Kei-Dei, dôm tơdrong noh iĕm pơhơi ưh kơ wă pơm. Mă tơdrong iĕm pơyơ̆r tơmam hơi noh kư̆m trŏ mơ̆n, mă-lei ưh kơ dang bơ̆n kiơ̆ tơdrong juăt noh hei.” (trong 23c). Wă khan tơdrong arih bơngai lui kăl kơ đei ‘bar tơdrong ‘noh tơdrong chu yom lăm tơdrong bơ̆jang păng gơh tơplih lăm jơhngơ̆m. Dôm tơdrong jang trŏ athei lĕch đơ̆ng jơhngơ̆m ‘mêm kơ Kră Yang păng ‘mêm kơ kon bơngai.
Nơ̆r Kră Yang lăm âu athei rim ‘nu kơ bơ̆n lăng ming tơdrong arih kơdih. Phŏ phŏ lơ wơ̆t bơ̆n bơwei tơdrong juăt pơm tơ’bôh gah ‘nguaih na ưh kơ đei đơ̆ng lăm jơhngơ̆m gah lăm. Bơ̆n đei hiơ̆k kơ tơdrong juăt na hiơt lê̆ tơdrong ‘mêm ưh? Minh khul bơngai lui kơjăp noh anih pơgơ̆p lăm tơdrong tơpăt păng tơdrong ‘mêm. Anih noh druh kiơ̆ tơdrong ‘lơ̆ng tơpăt, mălei kư̆m ‘bĕnh jơhngơ̆m ‘mêm mơnat. Anih noh arih tơnăp ưh kơ sĭ lăm tơdrong lui đĕch, na kư̆m lăm tơdrong arih sa dih băl hai mơ̆n. Anih noh ưh kơ pơm tơ’bôh tơdrong lui đĕch, mălei noh tơdrong arih gơh tơplih: Ưh kơ sĭ pơm tơ’bôh gah ‘nguaih đĕch, mălei ‘noh tơdrong ‘mêm đei pơm tơ’bôh hloi, kơplah tơpăt ‘mêm mơnat păng tơnăp pơm kiơ̆, Khul Bơngai Lui gô jing anih ba ăn tơdrong pơlung, wơ̆ ‘lŏ păng jơ̆ nơ̆r roi kơdranh pran kơ lăm teh đak.
Kơkuh kơ Ih Kră Yang, apinh Ih tơgŭm inh huay kơ tŭk lê̆ dôm tơdrong kăl, na arih adrin pơm tơ’bôh dôm tơdrong noh rim năr wă kơ tơdrong lui inh ưh kơ đei lăng ‘bôh gah ‘nguaih, na kư̆m tơ’bôh tơdrong Kră Yang đơ̆ng lăm jơhngơ̆m. Krao khan yua anăn Kră Yang Yêsu Krist, Amen.
Bơ̆n oei hiơt dôm tơdrong kăl ayơ lăm tơdrong arih rim năr?
Đŏk Sơ̆p Hla bơar ‘Bok Kei-Dei lăm pêng sơnăm: Jop 7
Kênh Youtube BHKTHN:
