Klei Aê Diê Blŭ: Klei Mtô Mñă Klei Bhiăn 25:1-3
Êlan kliăng: “Tơdah mâo klei mneh msao hdơ̆ng phung êkei leh anăn diñu nao kơ klei phat kđi, leh anăn phung khua phat kđi srăng blŭ brei kđi, yap kpă mnuih kpă leh anăn bi kmhal mnuih soh” (Klei Mtô Mñă Klei Bhiăn 25:1)
Klei êmuh ksiêm mĭn: Si ngă klei bhiăn phat kđi klei bi mneh msao hlăm phung ƀuôn sang Aê Diê? Klei kruak čua čăm hŏng giê pô ngă soh leh anăn amâo čăm êgao kơ pă pluh blư̆ ôh bi êdah si ngă Pô Aê Diê jing? Si drei srăng mă yua klei hriăm hruê anei?
Hlăm sa boh ƀuôn, amâo hô ôh kơ klei bi mneh msao pô anei hŏng pô adih. Klei bhiăn Aê Diê mtă tơdah mâo klei bi mneh msao hdơ̆ng ayŏng adei snăn brei phung khua phat kđi blŭ kđi hŏng klei kpă čiăng răng mgang mnuih kpă leh anăn bi kmhal mnuih soh. Aê Diê jao bruă anei kơ phung khua phat kđi. Bruă klam kơ digơ̆ jing brei digơ̆ ksiêm êmuh bi klă, tui duah jih jang klei ka thâo klă ôh ti tluôn klei bi kčŭt anăn, čiăng đăm mâo klei bi kčŭt mčeh kyua klei bi roh hdơ̆ng găp. Brei phung khua phat kđi ksiêm bi nik čiăng “yap kpă mnuih kpă leh anăn bi kmhal mnuih soh” (êlan 1b). Tơdah ƀuh pô ngă soh năng čăm hŏng giê, klei bhiăn mtă brei čăm gơ̆ ti anăp phung khua phat kđi, leh anăn wăt tơdah klei soh gơ̆ ktrŏ dưn, amâo dưi čăm êgao kơ pă pluh blư̆ ôh.
Klei bhiăn kơ klei phat kđi leh anăn bi kmhal bi êdah kơ Aê Diê jing Pô kpă ênô ƀiădah ăt jing Pô bŏ hŏng klei khăp mơh. Klei phat kđi brei ngă hŏng klei kpă, pô ngă soh srăng tŭ klei bi kmhal hŏng klei năng ƀiădah brei phung khua phat kđi kăp dlăng bi nik čiăng mkhư̆ mgang klei čăm bi knap leh anăn klei bi rŭ ênua. Êngao kơ anăn, klei bhiăn kơ klei bi kmhal Aê Diê mtă wăt klei soh ktrŏ dưn ƀiădah amâo dưi čăm êgao kơ pă pluh blư̆ ôh, klei bi kmhal anăn čiăng bi êdah klei kpă leh anăn čiăng đru pô ngă soh kmhal kơ klei soh lŏ wĭt hdĭp jăk amâo djŏ čiăng bi knap leh anăn bi hêñ pô ngă soh ôh, “huĭdah tơdah ăt čăm gơ̆ lu blư̆ hĭn kơ anăn, arăng bi hêñ ayŏng adei diih ti anăp ală diih” (êlan 3b). Klah čŭn ti knhal tuč, wăt tơdah mnuih soh ngă soh hŏng ayŏng adei digơ̆ ƀiădah digơ̆ ăt jing sa čô hlăm phung ƀuôn sang mâo klei bi mguôp hŏng Aê Diê, leh anăn digơ̆ ăt čiăng kơ arăng dôk dơ̆ng hŏng digơ̆ hŏng klei khăp mơh.
Aê Diê jing Pô kpă ênô leh anăn bŏ hŏng klei khăp, Ñu čiăng kơ phung anak čô Ñu êbat êlan kpă ênô leh anăn klei khăp msĕ si Ñu mơh. Kyuanăn, brei drei răng kơ drei pô hlăm klei hdĭp, tui duah klei kpă, khăp kơ klei kpă ênô, dôk jăk hdơ̆ng ayŏng hŏng klei khăp čiăng atăt ba lu mnuih ka thâo kral Khua Yang ôh hriê kơ Ñu (Y‑Yôhan 13:35). Drei ăt dưi mă yua klei hriăm anei hlăm klei mkra mjuăt kơ Phung Sang Aê Diê mơh. Brei phung klam bruă mkra mjuăt bi êdah klei kpă, klei mtăp mđơr tơdah mkra mjuăt, amâo blŭ kđi tui si klei pô čiăng leh anăn tui si klei pô mĭn ôh, amâodah bi kmhal ktrŏ pô anei leh anăn dŏng pô adih… Klei mkra mjuăt hlăm Phung Sang Aê Diê jing yuôm, ƀiădah tơdah ti krah phung ƀuôn sang Aê Diê amâo dưi bi êdah klei kpă, klei khăp ôh snăn yơh si dưi bi hmăng srăng mâo sa phung ƀuôn sang kpă ênô lač mdê leh anăn lăn ala kpă ênô lač mbĭt lĕ?
Si ngă drei răng nanao kơ drei pô tui si klei kpă ênô leh anăn klei khăp Aê Diê hlăm jih jang klei drei bi mguôp mơ̆?
Wah lač: Ơ Aê Diê Pô kpă ênô leh anăn bŏ hŏng klei khăp, brei kâo êbat hlăm êlan kpă ênô leh anăn klei khăp msĕ si Ih hlăm bruă điêt amâodah bruă prŏng hlăm klei hdĭp kâo. Kâo wah lač hlăm anăn Yêsu Krist. Amen.
Dlăng Klei Aê Diê Blŭ hlăm tlâo thŭn: Y‑Yut
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
