Klei Aê Diê Blŭ: Klei Kbiă: 40:12-15
Êlan kliăng: “Brei ih bi hơô Y‑Arôn hŏng čhiăm ao doh jăk, leh anăn trôč êa ƀâo mngưi ti ñu pioh brei ñu, čiăng kơ ñu dưi mă bruă kơ kâo jing khua ngă yang” (Klei Kbiă 40:13)
Klei êmuh ksiêm mĭn: Si klei bhiăn ruah mdưm khua ngă yang Y‑Arôn hŏng phung anak êkei ñu? Ya jing Khua ngă yang kơ Aê Diê? Ya klei mâo msĕ snăn hŏng diih leh đăo kơ Khua Yang Yêsu?
Hlăk êjai dŭm mta mnơ̆ng hlăm lam leh anăn nah êngao Sang čhiăm knŏng dưi trôč êa ƀâo mngưi jing doh jăk, snăn hjăn Y‑Arôn leh anăn phung anak êkei ñu dưi mprăp, găn dŭm klei bhiăn dưi dôk ti anăp Yêhôwa Aê Diê mă bruă kơ Aê Diê (dlăng thiăm Bruă Lêwi 8:1-13).
Êlâo hĭn, brei diñu mnei hŏng êa (êlan 12). Anei jing klei bi doh grăp blư̆ nao giăm Aê Diê, phung khua ngă yang brei ngă tơdah amâo ngă srăng djiê (Klei Kbiă 30:19-21). Leh anăn diñu dưi hơô ao doh jăk. Kdrăp čŭt hơô doh jăk mơ̆ng khua ngă yang Y‑Arôn jăk siam hlue si Aê Diê mkra mjing mâo lu klei yuôm bhăn. Pluh dua mta asăr boh tâo yuôm čih anăn pluh dua anăn djuê phung Israel hlăm mnal đah da leh anăn hlăm dua nah mra ao êphôt bi ala kơ pluh dua êpul djuê ana Israel (Klei Kbiă 28). Urim leh anăn Thumim ti mnal đah da jing kdrăp đru diñu êmuh, blŭ hrăm hŏng Aê Diê, leh anăn hnơ̆ng yuôm bhăn mơ̆ng kdrăp doh jăk bi hmô kơ klei jăk siam, guh kơang mơ̆ng Aê Diê. Leh anăn, diñu dưi trôč êa ƀâo mngưi leh anăn pioh jing doh jăk čiăng yua kơ Aê Diê hlăm Sang čhiăm. Khua ngă yang amâo hơô kdrăp doh jăk dôk ti anăp Aê Diê srăng djiê.
Bruă phung khua ngă yang jing bi ala kơ phung ƀuôn sang dôk ti anăp Aê Diê leh anăn ăt jing pô blŭ bi ala kơ Aê Diê hŏng phung ƀuôn sang. Phung khua ngă yang đru bruă hlăm Sang čhiăm klei bi kƀĭn, bi ala kơ phung ƀuôn sang Aê Diê ngă klei bhiăn kkuh mpŭ kơ Aê Diê grăp hruê leh anăn hlăm dŭm knăm yuôm bhăn msĕ si knăm akâo pap brei klei soh, myơr mnơ̆ng hdơr knga…
Hruê anei, tơdah đăo kơ Khua Yang Yêsu jing Khua kơ klei hdĭp pô, drei mâo êrah Khua Yang Yêsu rao bi doh klei soh leh anăn djăp mta klei soh hlăm thŭn mlan leh êgao. Khua Yang Yêsu brei kơ drei klei kpă ênô Ñu; kyua anăn, drei mâo Aê Diê yap kpă ênô tơdah Ñu dlăng hlăm klei kpă ênô Anak Ñu. Drei dưi pioh jing doh jăk kơ ƀuôn ala mtao Aê Diê. Drei dưi mâo Yang Mngăt Jăk, Pô dôk mbĭt, bi hriăm, atăt gai leh anăn thiăm brei ai ktang kơ drei mâo sa klei hdĭp bi guh kơang Anăn Aê Diê. Khua ƀĭng kna Y‑Pêtrôs mtô leh, phung đăo mâo anăn knăl khua ngă yang sang mtao, jing phung ƀuôn sang doh jăk, ƀuôn sang Aê Diê, kyua anăn, drei mâo klei dưi hriăm Klei Aê Diê Blŭ, bi blŭ hrăm hŏng Aê Diê, leh anăn wah lač brei kơ grăp čô mnuih, mbĭt anăn brei mâo bruă klam hiu hưn klei khăp, klei Aê Diê bi tui kơ phung ka thâo kral Ñu (I Y‑Pêtrôs 2:9).
Si drei tŭ mă klei Aê Diê pap leh anăn ngă bruă klam pô?
Wah lač: Bi mni lač jăk kơ Aê Diê ruah leh kâo ti krah lăn ala čiăng jing anak Ih, pio hjăn kâo jing pô bi ala kơ ƀuôn ala mtao adiê ti krah lăn ala anei. Akâo kơ Khua Yang đru kâo thâo mpŭ kơ bruă klam Aê Diê jao leh anăn đru kâo bi leh bruă klam Ih jao hŏng klei jăk hĭn.
Dlăng Klei Aê Diê Blŭ hlăm tlâo thŭn: Bruă Phung Khua Ƀĭng Kna 7:20-53
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
