Mathais 6:19-21
Nqe cim:
“Rau qhov nej tej nyiaj txiag thiab qhov txhia chaw nyob qhov twg, nej lub siab yeej yuav nyob qhov ntawd” (Mathais 6:21).
Lus nug rau sawvdaws xav:
– Tej khoom nyiaj txiag thiab tibneeg lub siab sib txuas li cas?
– Vim li cas yuavtsum khaws nyiaj txiag qhov txhia chaw cia saum ntuj?
– Koj tab tom nqis peev rau yam khoom qhov txhia chaw twg?
Tswv Yexus muab “khoom qhov txhia chaw hauv ntiajteb” thiab “khoom qhov txhia chaw saum ntuj” los sib piv tom qab ntawd Nws nqua hu kom peb nqis peev rau khoom qhov txhia chaw uas nyob saum ntuj, vim khoom qhov txhia chaw hauv ntiajteb tsuas yog nyob ib pliag xwb tiamsis khoom qhov txhia chaw uas nyob saum ntuj thiaj yuav nyob mus ibtxhis. Vajntxwv Xalumoos tau sau tseg: “Tus neeg txawj ntse hais tias tsis muaj qabhau, tsis muaj qabhau li! Kev ua neej nyob yeej tsis muaj qabhau! Txhua yam yeej tsis muaj qabhau li” (Tej Lus Qhia 1:2). Lo lus “tsis muaj qabhau” tsis txhais hais tias tas nrho txhua yam puav leej tsis muaj qabhau, tiamsis yog xav qhia hais tias tasnrho txhua yam uas nyob hauv lub ntiajteb no, tsis ruaj tsis khov, tsuas yog nyob ib pliag thiab yuav dua mus. Yog li ntawd, txawm hais tias tsis muaj tubsab nyiag thiab xeb noj los tej khoom qhov txhia chaw uas peb khaws tseg cia twb muaj nrim lawm tsis muaj qabhau. Muab hais sau zog txog khoom qhov txhia chaw uas yog lub ntiajteb muaj ob yam li no: Tim ib tej khoom ntawd yuav ploj mus lossis yuav puastsuaj zuj zus mus. Tim ob tus uas tau tej khoom ntawd los yuav tuag mus tes dawb tes npliag thiab xwb.
Yog li ntawd, peb yuavtsum muab tej khoom qhov txhia chaw uas peb muaj nqis peev kom muaj nqis rau sab ntsujplig, vim nqis peev rau qhov twg ces peb yuav ua neej nrog qhov ntawd. Tswv Yexus qhia hais tias, peb khaws khoom qhov txhia chaw tseg cia rau qhov twg peb lub siab nyob qhov ntawd. Thaum ib tus tibneeg saib txhua yam uas nyob hauv lub ntiajteb no muaj nqis dua txhua yam uas nyob saum ntuj ceebtsheej, ces nws yuav siv tas nrho nws lub neej nqis peev rau txhua yam uas yog ntiajteb li. Dhau los ntawd, zaj lus pivtxwv hauv Lukas 12:16-21, Tswv Yexus qhia rau peb pom tus uas saib txhua yam khoom nyob hauv lub ntiajteb no tseemceeb dua txhua yam uas nyob saum ntuj ceebtsheej ces tus ntawd yog tus neeg ruam, vim nws muab yam uas muaj nqis thiab nyob mus ibtxhis hloov pauv yam uas nyob ib pliag hauv lub ntijateb no. Tus neeg ntawd yuav nrhiav tsis pom lub ntsiab thiab lub homphiaj ntawm nws lub neej, vim txhua yam uas nws muaj yuav nqa tsi tau nrog nws mus. Qhov tseeb tus ntawd tsuas yog neeg ua qhev rau kev txomnyem thiab tej khoom txhua yam uas yog lub ntiajteb li xwb. Thaum uas peb saib txhua yam hauv ntiajteb no muaj nqis, peb yuav tsis quav ntsej txog kev muaj nqis ntawm sab ntsujplig lawm, ces thaum ntawd tsis yog txhua yam uas peb muaj hauv ntiajteb no yuav raug rhuav kom puastsuaj xwb, tiamsis peb tus ntsujplig, peb tus cwjpwm ua neeg zoo, kev ua phoojywg nrog tibneeg thiab Vajtswv los yuav raug rhuav puastsuaj mus tas.
Yuav tsum xyuam xim rau hauv peb txoj kev ua neej, vim lub ntiajteb no yuav rub peb mus nrog luag sib tw kom muaj nyiaj, kom muaj zoo vaj zoo tsev, kom muaj neeg coob paub txog peb, kom tau luag hwm, kom muaj meejmom siab…tsis muaj hnub paub nres. Peb yog Vajtswv menyuam lawm, txhob cia ib yam dab tsi rub peb kev ua neej uas mus “khaws khoom qhov txhia chaw cia hauv ntiajteb” tiamsis peb yuavtsum paub “khaws khoom qhov txhia chaw cia saum ntuj” los ntawd peb ua neej paub txaus siab rau yam peb muaj, tsis ua neeg qia dub, muaj lub siab dav fo, muaj kev hlub thiab muaj nplooj siab dawb paug pub rau lwm tus.
Thov Vajtswv
Vajtswv, nyuam yaus ua Koj tsaug uas Koj tau qhia nyuam yaus pom txog yam uas muaj nqi thiab zoo kawg nkaus ntawm sab ntsujplig. Thov pab kom nyuam yaus paub nqis peev rau yam uas tsis txawj puastsuaj kom nyuam yaus niaj hnub cia siab ntsoov rau Vajtswv tus uas nyob saum ntuj. Amees!
Peb lub siab tab tom nyob saum ntuj lossis nyob hauv lub ntiajteb no?
Nyeem Vajluskub hauv peb lub xyoos: Yauhas 12:20-50.
Kênh Youtube BHKTHN:
