Klei Aê Diê Blŭ: Y‑Mathiơ 6:19-21
Êlan kliăng: “Kyuadah ti anôk mâo ngăn drăp yuôm ih, tinăn mơh ai tiê ih srăng dôk.” (Y‑Mathiơ 6:21)
Klei êmuh ksiêm mĭn: Si klei bi mguôp mâo ti krah knhuah hŏng prăk kăk leh anăn hŏng knhuah hdĭp pô anăn? Ya ngă brei mkăm pioh ngăn drăp yuôm hlăm adiê? Ih dôk duh klei hdĭp pô kơ ya mta ngăn drăp?
Khua Yang Yêsu bi msĕ ti krah “ngăn drăp ti lăn ala” leh anăn “ngăn drăp hlăm adiê” leh anăn iêo mthưr brei duh kơ ngăn drăp hlăm adiê kyuadah ngăn drăp ti lăn ala knŏng jing bhiâo êjai ƀiădah ngăn drăp hlăm adiê adôk nanao hlŏng lar. Mtao Y‑Salômôn lač msĕ mơh: “Klei hơăi mang hĭn kơ klei hơăi mang! Klei hơăi mang kơ klei hơăi mang! Jih jang mnơ̆ng jing hơăi mang sơăi!” (Khua Pô Mtô 1:2). Boh blŭ “hơăi mang” amâo djŏ ôh mblang jih jang mnơ̆ng jing amâo thâo yua, ƀiădah jih jang mnơ̆ng ti lăn ala knŏng găn bhiâo, leh anăn srăng tŭ klei tăm pah mbĭt hŏng klei jing bhiâo leh anăn găn pral ñu. Kyuanăn, wăt tơdah amâo mâo ôh phung knĕ tlĕ, muôr leh anăn bring bi rai, ƀiădah klei mkăm pioh ngăn drăp mâo kdriêl knhal hruê mmông msĕ snăn ăt jing klei hơăi mang mơh. Klah čŭn, klei dôk bhiâo êjai kơ jih jang mnơ̆ng jing dŏ ti lăn ala mâo dua mta klei: amâodah srăng luč rai jih, amâodah pô mâo dŏ ngăn srăng mŭt hlăm ênuk hlŏng lar hŏng dua kngan mang.
Hĭn mơh, brei drei duh kơ ênoh yuôm klei hdĭp myang kyuadah ngăn drăp srăng atăt gai klei hdĭp drei. Khua Yang Yêsu mtô, ai tiê mnuih srăng dôk ti anôk ngăn drăp ñu dôk pioh. Tơdah sa čô mnuih dlăng kơ dŏ lăn ala anei yuôm hĭn kơ dŏ hlăm ƀuôn jăk snăn jih klei hdĭp ñu srăng duh kơ mnơ̆ng jing dŏ ti lăn ala. Mơ̆ng klei bi hriêng hlăm Y‑Luk 12:16-21, Khua Yang Yêsu brei ƀuh hlei pô dlăng kơ dŏ ti lăn ala anei jing yuôm hĭn kơ dŏ hlăm ƀuôn jăk jing mnuih mluk kyuadah ñu bi mlih ênoh yuôm adôk hlŏng lar hŏng ênoh adôk knŏng bhiâo êjai, bi mlih klei hdĭp hlăm ênuk hlŏng lar hŏng klei hdĭp dôk bhiâo êjai ti lăn ala. Mnuih anei amâo srăng tuôm ƀuh ôh anôk kñăm phŭn kơ klei hdĭp pô wăt kơ jih jang mnơ̆ng jing dŏ ñu mâo kyuadah ñu amâo dưi djă ba mbĭt hlăm ênuk hlŏng lar ôh. Ñu knŏng jing sa čô hlŭn knap mñai kơ dŏ ti lăn ala. Tơdah yap yuôm ênoh klei hdĭp kđeh ti lăn ala ƀiădah phưi lui hĕ ênoh yuôm klei hdĭp myang, snăn amâo djŏ knŏng klei hdĭp ti lăn ala ôh srăng rai luč ƀiădah boh nik mngăt, knuih, leh anăn jih jang klei bi mguôp pô anăn ăt rai luč mbĭt mơh.
Brei dôk răng hlăm klei hdĭp anei kyuadah ênưih snăk ñu ktŭng drei mŭt hlăm klei tiŏ êran amâo thâo mjưh čiăng dưi mâo lu prăk hĭn, lu sang hĭn, hing ang hĭn, lu mnuih mpŭ hĭn, anôk bruă dlông hĭn… Phung anak Aê Diê amâo dưi brei djăp mta mnơ̆ng ktŭng hrip drei hlăm knhuah hdĭp “mkăm pioh ngăn drăp ti lăn ala” ôh, ƀiădah brei thâo “mkăm pioh ngăn drăp hlăm adiê” hŏng knhuah hdĭp amâo čuôt klih, hdĭp mơak hŏng ya mnơ̆ng mâo, bi êdah ai tiê kmah thâo uêñ mĭn kơ phung dôk kƀah hŏng klei khăp, hŏng klei čŏng čiăng amâo djŏ hŏng klei mgô̆ ôh.
Phă anôk ai tiê drei dôk hung nao, ti adiê amâodah ti lăn ala anei?
Wah lač: Ơ Khua Yang, bi mni kơ Khua Yang mtô leh kâo brei thâo ƀuh ênoh yuôm bhăn klei hdĭp myang. Akâo Khua Yang đru kâo duh klei hdĭp kâo kơ mnơ̆ng amâo thâo rai luč ôh, čiăng kơ ai tiê kâo dlăng nanao phă Khua Yang hlăm adiê.
Dlăng Klei Aê Diê Blŭ hlăm tlâo thŭn: Y‑Yôhan 12:20-50
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
