II Timautes 3:13-15
Nqe cim
“Tiamsis koj tsis txhob ua li lawv. Koj yuav tsum ua raws li Vajtswv Txojlus uas koj tau kawm thiab cia siab rau lawm. Rau qhov koj yeej paub hais tias cov neeg uas qhia koj, lawv yeej tsis dag koj ib zaug li. Thiab koj yeej paub hais tias txij thaum koj tseem yau, koj yeej kawm Vajtswv Txojlus los lawm. Vajtswv Txojlus pab tau kom tus uas kawm muaj tswvyim; thiab yog nws los ntseeg Yexus Khetos, nws yuav dim nws lub txim” (II Timautes 3:14-15).
Lus nug rau sawvdaws xav:
- Timthawj Paulus ntuas Timautes txog tej yam dabtsi?
- Yam tseemceeb tshaj yuav tsum nqis peev yog dabtsi?
- Peb nqis peev rau kev kawm Vajtswv Txojlus ntawm tus kheej thiab tsevneeg zoo licas?
Nyob rau tiam kawg, tibneeg yim ua phem ua qias, ua nruj ua tsiv thiab yim hnub yim phem zuj zus. Kev dag ntxias huamvam, ib tug dag ntxias ib tug tsis tseg (nqe 13). Nyob rau tiam muaj ntau kev kub ntxhov zoo li ntawd, Timthawj Paulus ntuas nws leej tub sab ntsujplig uas yog Timautes yuavtsum ua lub neej raws li tus Tswv lub siab nyiam txawm yog lub neej yuav tau zoo lossis txomnyem.
Qhov xubthawj, nws qhia leej tub yuav tsum ua raws li tej uas tau kawm thiab tau cia siab rau lawm. Timthawj Paulus qhia kom Timautes rov nco txog cov neeg uas tau qhuab qhia nws. Lo lus “cov neeg” nyob hauv nqe 14 yog hais txog ob tug pojniam tau qhia Vajtswv Txojlus thiab cob qhia Timautes rau sab kev ntseeg, nkawd yog Timautes pog hu ua Lau-is thiab Timautes niam hu ua Enikes (II Timautes 1:5). Tim ob, Timthawj Paulus hais meej txog kev kawm Vajtswv Txojlus. Lo lus “paub” nyob ntawm hauv paus lus yog “kev paub, muaj kev txawj ntse, ua tau zoo” hais txog kev tshawb nrhiav, niaj hnub xav txog Vajtswv Txojlus. Los ntawm Vajluskub, tibneeg zeem paub lub tswvyim yog los ntawm tus Tswv los, paub txog tus Tswv kev dawbhuv, txojkev hlub thiab txojkev cawmdim. Vajluskub cawm tsis tau tibneeg (Yauhas 5:39-40), tiamsis Vajluskub pub dag zog rau tus kawm ua tau lub neej ruaj khov thaum ntsib kev kub ntxhov, thiab pub tswvyim rau tus kawm los ntseeg Yexus Khetos kom tau kev cawmdim (nqe 15).
Pib lub xyoo tshiab 2023, peb muaj coob leej tabtom ntsib tej kev txomnyem thiab tej zaum peb poob siab thaum pom tibneeg yim hnub yim ua phem. Thov tus Tswv txhawb peb lub zog dhau ntu Vajluskub hnub no, kom tas siab tas ntsws qhia Vajtswv Txojlus thiab qhia tshwm kev ntseeg rau peb tej xeeb leej xeeb ntxwv. Tej zaum peb tabtom siv zog nqis peev ntau heev rau lawv kev kawm txawj kawm ntse, dag zog, lossis kev ua noj ua haus, tiamsis ntau zaug peb hnov qab nqis peev rau lawv yam tseemceeb tshajplaws uas yog txojsia ibtxhis. Nrog rau tej ntawd, peb yuav tsum tseg sijhawm nqis peev rau tus kheej dhau ntawm kev kawm thiab ua raws Vajtswv Txojlus qhia kom tau tus Tswv coj kev ua lub neej muaj tswvyim, paub nqis peev rau Tebchaws Ceebtsheej uas nyob ruaj khov ibtxhis, txhob yog tsuas saib ntsoov rau lub neej ib vuag no. Thov kom lub xyoo tshiab peb txhua tus yuav tau txais kev zoo siab, kaj siab thiab cia siab hauv Cawmseej Yexus.
Thov Vajtswv,
Tus Tswv uas yog Leej Txiv, nyuam yaus ua Koj tsaug, vim Koj pub Koj Txojlus rau nyuam yaus. Thov pab nyuam yaus paub nqis peev rau kev kawm Koj Txojlus thiab thov Vaj Ntsujplig taw qhia, pub nyuam yaus muaj tswvyim, totaub Koj Txojlus nyuam yaus txojkev ntseeg Cawmseej Yexus thiaj yuav ruaj khov. Amees.
Peb coglus hloov pauv yam dabtsi nyob hauv lub xyoo tshiab no?
Nyeem Vajluskub hauv peb lub xyoos: Yelemis 50:33-51:10
Kênh Youtube BHKTHN:
