Klei Aê Diê Blŭ: Klei Mtô Mñă Klei Bhiăn 18:9-14
Êlan kliăng: “Brei diih jing phung arăng amâo dưi ƀuah ôh ti anăp Yêhôwa Aê Diê diih” (Klei Mtô Mñă Klei Bhiăn 18:13)
Klei êmuh ksiêm mĭn: Ya klei bhiăn soh jhat phung găp djuê nah êngao Aê Diê kăm phung ƀuôn sang Aê Diê amâo dưi tui hlue sĭt mŭt hlăm Lăn Aê Diê Ƀuăn? Ya mta phŭn Aê Diê suôt phung găp djuê nah êngao kbiă mơ̆ng Kanaan? Si Aê Diê čiăng phung ƀuôn sang Aê Diê hdĭp hŏng Ñu? Si drei mblang sĭt mâo mnuih hưn mdah sa čô mjâo thâo snăk?
Hlăm ênuk ară anei, dŭm djuê ana hdĭp mda hlăm krĭng Kanaan mâo lu bruă mdian čiăng tui duah klei čiăng phung yang diñu kkuh mpŭ. Dŭm hdră êdah kdlưn jing êmuh phung djiê, myơr hđeh điêt jing mnơ̆ng ngă yang. Phung mjâo khăng ngă klei mdian čiăng thâo êlâo klei hdĭp. Trăn Klei Aê Diê Blŭ hruê anei lač kơ jih jang bruă ngă Aê Diê bi êmut kheh anei leh anăn jih jang klei anăn arăng yap jing bruă soh jhat. Anei jing mta phŭn Aê Diê suôt phung ƀuôn sang Kanaan kbiă mơ̆ng čar.
Drei thâo ti tluôn jih jang klei mdian anăn jing yang jhat. Klei myang mmăt mơ̆ng Satan bi mjhua hŏng klei myang êdu kƀah Aê Diê brei êlâo kơ diñu ngă soh čiăng mplư ai tiê mnuih leh anăn ktŭng ba lu mnuih kbưi hŏng Aê Diê. Kyua anăn, Aê Diê kăm phung ƀuôn sang Ñu amâo dưi hlue ngă ôh klei bhiăn klei đăo năng bi êmut kheh anăn. Brei phung ƀuôn sang Aê Diê thâo kral Aê Diê mơ̆ng klei bhiăn Ñu. Hlăm dŭm klei mdê hjăn, Ñu srăng lač kơ phung khua pô hưn êlâo čiăng bi êdah klei Ñu čiăng lač kơ phung ƀuôn sang. Y‑Môis mtă kơ phung ƀuôn sang Aê Diê hrô kơ duah klei Aê Diê čiăng hŏng hdră soh, snăn brei mđing kơ sa klei hdĭp sĭt suôr kluôm ênŭm ti anăp Aê Diê (êlan 13).
Boh sĭt hruê anei brei ƀuh đa đa phung mâo klei thâo ngă mdian, thâo kơ klei leh êgao mơ̆ng sa čô mnuih, amâodah đăo knăl êlâo dŭm mta klei hlăm êdei anăp. Boh sĭt, anei jing phung mâo yang jhat leh anăn klei mmăt mjhua, mdăp ti tluôn, đru kơ diñu dŭm klei diñu čang hmăng čiăng yua diñu msĕ si kdrăp pioh ngă bruă kơ diñu leh anăn kbưi hŏng Aê Diê. Phung mjâo, mdian mâo klei bi tluh kyua yang jhat đru kơ diñu blŭ djŏ kơ dŭm mta klei hlăm thŭn mlan leh êgao čiăng mjing klei đăo knang leh anăn diñu srăng hưn luar kơ klei srăng truh êdei anăp. Sĭt khăp hmư̆ snăn ênưih snăk đăo jih kơ klei anăn. Phung ƀuôn sang Aê Diê brei hdơr klei hdĭp drei êdei anăp dôk hlăm kngan Aê Diê jing Pô hrih mjing leh anăn kriê dlăng mơ̆ng asei mlei truh mngăt ai tiê drei amâo djŏ kyua phung mjâo, phung hưn klei srăng truh. Kyua anăn, đăm ôh kyua ya mta mluk mgu tui duah hĕ phung mjâo, phung mdian anăn čiăng dưi thâo êlâo ya klei srăng truh amâodah bi mlih klei hdĭp. Hrô kơ anăn brei đăo kluôm ênŭm kơ Aê Diê, đăo kơ Aê Diê jing pô khăp hơêng, Ñu atăt gai leh anăn hrăm mbĭt hŏng drei truh hruê knhal tuč.
Drei tuôm hŏng ya klei gun kpăk tơdah jao jih klei hdĭp pô hlăm kngan Aê Diê?
Wah lač: Ơ Khua Yang, akâo kơ Ih đru kâo thâo ƀuh klei myang yang jhat dôk ti tluôn klei mdian, dlăng kơ mjâo čiăng kâo ñĕ đuĕ. Knŏng Ih jing Aê Diê sĭt nik sa anăn kâo đăo knang, kkuh mpŭ leh anăn jao jih klei hdĭp hlăm kngan Ih.
Dlăng Klei Aê Diê Blŭ hlăm tlâo thŭn: Y‑Yêrêmi 40:1–41:10
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
