II-Kevcai 18:9-14
Nqe cim:
“Nej yuav tsum muab siab npuab tus Tswv uas yog nej tus Vajtswv kom kawg siab kawg ntsws.” (II-Kevcai 18:13).
Phau txhais HMOWSV hais li no: “Koj yuav tsum ua tus tsis muaj chaw thuam li rau ntawm koj tus Vajtswv Yawmsaub xubntiag.”
Lus nug rau sawvdaws xav:
- Lwm haivneeg tej kev coj noj coj ua tsis zoo twg uas tus Tswv txwv tsis pub Nws haivneeg xyaum thaum mus nyob hauv lub tebchaws Nws coglus tseg?
- Lub vimchiv tus Tswv ntiab lwm haivneeg tawm hauv tebchaws Kana-as mus?
- Tus Tswv xav kom Nws haivneeg yuav tsum ua neej zoo li cas?
- Peb yuav hais li cas thaum muaj neeg qhia ib tug neeg txawj khawvkoob rau peb?
Lub sijhawm thaum ntawd, cov neeg uas nyob hauv lub tebchaws Kana-as ua tej kevcai dab qhuas teev tej vajtswv uas lawv pe. Cov kevcai ntawd yog hu cov neeg tuag, muab menyuam tua hlawv fij. Cov neeg saib yaig, xam hnubnyoog, khobkuam saib yav tom ntej. Ntu Vajluskub hnub no hais txog tej kev teev dab uas Vajtswv ntxub thiab phem kawg nkaus. Qhov no yog lub vimchiv Vajtswv ntiab cov neeg Kana-as tawm hauv lub tebchaws mus.
Peb paub tseeb hais tias sawv tom qab tej kev teev dab qhuas no yog ntxwgnyoog. Lub hwjchim kav tiam tsaus ntuj ntawm dab ntxwgnyoog siv lub hwjchim uas tus Tswv pub thaum tsis tau ua txhaum los mooj lossis dag tibneeg tso tus Tswv tseg. Yog li, tus tswv txwv tsis pub Nws haivneeg mus xyaum lawv tej kevcai teeb dab qhuas ntxim ntxub ntawd. Tus Tswv haivneeg yuav tsum paub tseeb Nws los ntawm tej kevcai Nws qhia. Lub sijhawm tshwjxeeb, tus Tswv hais kom cov cevlus qhia Nws lub siab nyiam rau tej pejxeem. Mauxes ntuas tus Tswv haivneeg yog yuav nrhiav tau yam uas haum tus Tswv siab ces yog muab siab npuab Nws kawg siab kawg ntsws (nqe 13).
Yam muaj tseeb nimno, muaj qee tus tibneeg tseem saib yaig, saib hmoov, lossis twv tej yam yuav muaj tom ntej. Qhov tseeb, cov neeg no raug ntxwgnyoog lub hwjchim thiab qhov tsaus siv, tswj lawv ua cuabyeej ntxias tibneeg tso Vajtswv tseg. Cov uas siv dab hwjchim, saib yaig yoojyim rub neeg, vim muaj dab ntxwgnyoog qhia rau lawv hais yog qee yam yav tas los kom lwm tus ntseeg siab thaum hais tej uas yuav muaj tom ntej. Thaum raug dab mooj lawm ces yoojyim ntseeg txhua yam. Vajtswv haivneeg yuav tsum nco ntsoov peb lub neej nyob hauv tus Tswv uas tsim ib puas tsav yam txhais tes thiab Nws saib xyuas, tsis yog cov neeg xam hnubnyoog saib xyuas. Yog li, tsis txhob ua neeg ruam mus nrhiav cov neeg saib yaig, saib hmoov ntawd qhia kom paub yav tom ntej lossis lub neej pauv hloov. Tiamsis cia li ntseeg tus Tswv kawg siab ntsws, Nws yog tus muaj kev hlub, Nws niaj hnub coj thiab nrog peb nyob mus txog hnub kawg.
Thov Vajtswv,
Tus Tswv, thov Koj qhia kom nyuam yaus paub txav deb cov neeg saib yaig, siv dab lub hwjchim. Koj tib leeg thiaj yog tus Tswv uas nyuam yaus ntseeg, pehawm, thiab nyob hauv Koj txhais tes. Amees.
Peb twb ntsib tej kev nyuaj twg thaum nyob hauv tus Tswv txhais tes?
Nyeem Vajluskub hauv peb lub xyoos: Yelemis 40:1-41:10
Kênh Youtube BHKTHN:
