Klei Aê Diê Blŭ: Klei Kbiă 32:1-9
Êlan kliăng: “Đăm ih lŏ mâo yang mkăn ôh ti anăp Kâo. Đăm ih ngă ôh kơ ih pô rup krah thâodah rup mnơ̆ng hlăm adiê ti dlông, hlăm lăn ala ti gŭ, amâodah hlăm êa ti gŭ lăn” (Klei Kbiă 20:3‑4).
Klei êmuh ksiêm mĭn: Bruă tuh mkra êđai êmô mah brei drei ƀuh ya klei đăo phung ƀuôn sang Israel? Ya klei soh phung ƀuôn sang Aê Diê ruah ngă soh leh ti anăp Aê Diê? Ya klei mñă kơ drei kơ klei đăo mơ̆ng klei hriăm anei?
Klei yăl dliê anei lŏ čuê Klei Kbiă 24. Aê Diê bi êdah klei guh kơang Ñu ti čư̆ Sinai hlăm năm hruê. Hruê tal kjuh Ñu iêô Y‑Môis đĭ čư̆ hlăm krah knam bi tuôm hŏng Aê Diê leh anăn tinăn bŏ pă pluh hruê mlam. Hlăk êjai phung ƀuôn sang Aê Diê dôk guôn amâo ƀuh ôh Y‑Môis trŭn, diñu luč jih klei gĭr. Wăt tơdah ƀuh leh ti ală mta klei guh kơang leh anăn klei myang Aê Diê hlăm lu klei bi knăl, klei myang hlăm ktuê êlan kbiă mơ̆ng čar Êjip ƀiădah truh wưng anei phung ƀuôn sang Aê Diê ăt ka klă sĭt thâo kral Aê Diê. Diñu đing kơ klei khăp leh anăn klei sĭt suôr Aê Diê, kyua anăn bi êdah klei diñu amâo đăo. Phung ƀuôn sang Aê Diê luč klei êđăp ênang leh bi mĭn Y‑Môis amâo lŏ wĭt ôh. Klei diñu đăo kơ Aê Diê knŏng jing klei đăo mañ mơ̆ng Y‑Môis đuč. Diñu mrâo ƀuăn rơ̆ng srăng hlue ngă djăp klei Yêhôwa Aê Diê mtă (Klei Kbiă 24:3), ară anei diñu lŏ bi kƀĭn čiăng Y‑Arôn ngă sa rup yang čiăng nao êlâo diñu msĕ si phung ƀuôn sang nah êngao. Leh hmư̆ lač toh hĕ jih mah ti knga, ti kngan čiăng tuh rup yang snăn grăp čô srăng myơr, snăn yơh tuh sa êđai êmô mah. Diñu bi lač: “Ơ Israel, nĕ anei yang ih, pô bi kbiă leh ih mơ̆ng čar Êjip” (êlan 4); čiăng lač êđai êmô mah jing yang bi mtlaih diñu. Aguah hruê êdei diñu kgŭ ưm, diñu bi ur driâo, myơr mnơ̆ng myơr čuh leh anăn mnơ̆ng myơr kơ klei êđăp ênang ti anăp rup êđai êmô hŏng mah msĕ si diñu myơr leh kơ Aê Diê (êlan 6).
Klă sĭt phung ƀuôn sang Aê Diê thâo diñu čiăng klei đru mơ̆ng adiê, srăng myơr leh anăn jih ai tiê kkuh mpŭ. Diñu thâo Aê Diê jing Pô Doh Jăk, huĭ Aê Diê bi kmhal ƀiădah ai tiê diñu ăt dôk mđing kơ knuih hdĭp kkuh mpŭ kơ lu yang phung nah êngao. Mơ̆ng bruă tuh leh anăn kkuh kơ rup êđai êmô mah, diñu ngă soh leh tlâo hlăm Pluh Mta Klei Bhiăn: kkuh mpŭ kơ yang mkăn êngao kơ Aê Diê; ngă rup yang leh anăn kkuh kơ rup yang; mă Anăn Aê Diê jing hơaĭ mang leh diñu lač rup êđai êmô mah jing yang ba leh diñu tlaih mơ̆ng čar Êjip. Aê Diê đĭ ai ngêñ, iêô diñu jing phung ƀuôn sang khăng kŏ! (êlan 9).
Klei đăo mañ jing đăo hlue si klei đăo pô mkăn, ênưih kpĕ êka sĭt dlăng riêng gah ƀuh si arăng đăo kâo đăo snăn mơh. Anăn jing klei đăo amâo mâo boh Yang Mngăt Jăk leh anăn amâo hriê kơ prŏng ôh hlue thŭn mlan. Grăp čô drei brei lŏ ksiêm dlăng klei đăo pô (Ii Kôrantô 13:5) čiăng amâo lĕ lăm klei đăo kơ Aê Diê ƀiădah lŏ kkuh kơ rup yang msĕ sip hung ƀuôn sang Israel đưm adih.
Mâo mơ̆ yang mkăn hrô Aê Diê hlăm ai tiê drei?
Wah lač: Ơ Khua Yang, Pô bi mtlaih leh kâo mơ̆ng klei soh, brei kơ kâo hdĭp mơak hlăm klei hdĭp anei leh anăn klei hdĭp lă lar. Akâo kơ Ih đru kâo knang nanao kơ Aê Diê, khăp kơ Ih ƀrư̆ hruê lu hĭn leh anăn mpŭ knŏng hjăn kơ Ih.
Dlăng Klei Aê Diê Blŭ hlăm tlâo thŭn: Khua Pô Mtô 3:1‑22
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
