Khiavdim 32:1-9
Nqe cim:
“Kuv yog tus Tswv uas yog nej tus Vajtswv, tus uas coj nej tawm nram tebchaws Iziv uas nej ua luag qhev los. Tsis txhob pe lwm tus vajtswv, tiamsis pe Kuv tib leeg xwb” (Khiavdim 20:3-4).
Lus nug rau sawvdaws xav:
- Qhov uas nchuav tus mlom nyuj peb pom cov Yixalayees kev ntseeg zoo li cas?
- Cov Yixalayees ua txhaum rau tus Tswv txog yam dab tsi?
- Peb kawm tau yam dab tsi hauv zaj kawm hnub no?
Zaj xwm no yog txuas ntawm Khiavdim tshooj 24. Vajtswv qhia Nws lub tshwjchim rau hnub nyob saum lub roob Xinais. Hnub tim xya, Tus Tswv hu Mauxes mus ntsib tus Tswv thiab nrog tus Tswv nyob tau plaub caug hnub, plaub caug hmo saud. Thaum pheej tsis pom Mauxes nqis saum roob los, ua rau lawv tas kev cia siab, txawm hais tias lawv twb pom Vajtswv lub fwjchim ua txujci tseemceeb tso lawv dim nram tebchaws Iziv tiamsis lawm tiamsis txog thaum no lawv yeej tsis paub tseeb Vajtswv uas yog lawv tus Tswv li. Lawv ua xyem xyav rau tus Tswv, lawv dhau mus ua cov tsis muab siab ntseeg tus Tswv. Vajtswv haiv neeg txhawj ntshai thaum tsis pom Mauxes nqis saum roob los. Vajtswv haiv neeg kev ntseeg txog Vajtswv yog saib los ntawm Mauxes xwb, lawv thiaj cog lus hais tias yuav ua raws li tus Tswv hais (Khiavdim 24:3). Thaum tsis pom Mauxes los lawm, lawv tuaj cuag Aloos, kom nws nchuav ib tug mlom nyuj rau lawv ib yam li lwm haiv neeg muaj. Thaum kom sawvdaws muab nyias tej qhwsntsej los nchuav ua mlom ces sawvdaws zoo siab nqa tuaj, thiaj yoojyim nchuav tau ib tug mlom nyuj. Lawv sawvdaws hais tias: “Ib tsoom Yixalayees, tus no yog tus vajtswv uas coj peb nram tebchaws Iziv los” (nqe 4); lawv xav hais tias tus mlom nyuj cawm lawv dim nram tebchaws Iziv. Hnub tomqab ntawd, lawv sawv ntxov los qw zoo siab, fij tej khoom rau tus mlom nyuj ib yam li lawv hlawv khoom fij rau Vajtswv ntag (nqe 6).
Cov Yixalayees cheemtsum muaj tus los pab lawv, lawv tas siab fij khoom thiab pe hawm tus uas los pab lawv. Lawv paub Vajtswv yog tus Tswv uas ncaj ncees, tus Dawbhuv thiab ntshai Vajtswv rau txim tiamsis lawv tseem xav mus pe lwm tus tswv ib yam li lwm haiv neeg pheej pe. Thaum haiv neeg Yixalayees nchuav mlom nyuj los pe, lawv tau ua txhaum tus Tswv kaum nqi kevcai, ntawm peb nqi xub thawj, uas yog pe hawm tus Tswv uas yog Vajtswv tib leeg, txhob puab mlom los pe thiab txhob muab tus Tswv lub npe mus siv ua si. Vajtswv chim rau Nws haiv neeg, thiaj hu lawv ua cov niag neeg tawv ncauj heev (nqe 9).
Muaj kev ntseeg raws li lwm tus yooj yim ua rau kev ntseeg tsis ruaj khov, vim saib luag ntseeg li cas yus ntseeg li ntawd. Txoj kev ntseeg zoo li ntawd ua tsis tau ib yam dab tsi raws li Vaj Ntsujplig qhia thiab tsis paub loj hlob. Peb cov ntseeg txhua tus yuav tau tig rov los xyuas nyias kev ntseeg (II Kauleethaus 13:5) thiaj tsis zoo li cov neeg Yixalayees hnub thaud uas ib ke pe hawm Vajtswv, ib ke mus pe mlom.
Thov Vajtswv,
Tus Tswv, Koj pab nyuam yaus dim ntawm kev txhaum lawm. Thov Koj pub kom nyuam yaus muaj lub neej tas siab pe hawm Koj ib leeg thaum nimno thiab mus ibtxhis. Amees.
Hauv peb lub siab puas tseem muaj tus mlom twg hloov tus Tswv chaw?
Nyeem Vajluskub hauv peb lub xyoo: Tej Lus Qhia 3
Kênh Youtube BHKTHN:
