Klei Aê Diê Blŭ: Y-Mathiơ 9:35-38
Êlan kliăng: “Tơdah Ñu ƀuh phung lu, Yêsu mâo klei pap kơ digơ̆, kyuadah digơ̆ jing knap mñai leh anăn klah đuĕ mdê mdê msĕ si biăp amâo mâo mgăt ôh” (Y-Mathiơ 9:36).
Klei êmuh ksiêm mĭn: Ya bruă Khua Yang Yêsu khăng ngă hlăm jih thŭn Ñu mă bruă? Tơdah ƀuh phung lu, si ai tiê Khua Yang mâo hŏng digơ̆? Ya mta bruă tiŏ nao jêč hĭn hŏng Ñu? Si ai tiê drei mâo tơdah ƀuh lu mnuih riêng gah ka thâo kral Khua Yang?
Pô čih hră Y-Mathiơ klah čŭn bruă Khua Yang Yêsu khăng ngă hlăm jih thŭn Ñu mă bruă jing “hiu hlăm jih ƀuôn prŏng ƀuôn điêt, bi hriăm hlăm sang bi kƀĭn, leh anăn mtô klei mrâo mrang jăk kơ ƀuôn ala mtao, leh anăn bi hlao djăp mta klei ruă duam” (êlan 35) hŏng klei kñăm čiăng ba klei bi mtlaih kơ anak mnuih. Anăn jing mta phŭn bruă tiŏ nao Khua Yang Yêsu leh anăn ăt jing bruă tiŏ nao yuôm bhăn Ñu jao leh kơ jih jang phung ƀĭng kna Ñu (Y-Mathiơ 28:19-20, Y-Markôs 16:15). Êlan 36 brei ƀuh ai tiê pap prŏng Khua Yang pioh kơ phung dôk knap mñai, asei hjăn, klah klap msĕ si “biăp amâo mâo mgăt ôh”. Digơ̆ klah đuê̆ mdê mdê leh anăn amâo ƀuh mta klei yuôm sĭt kơ klei hdĭp ôh. Tơdah ƀuh kơ digơ̆ msĕ snăn, Khua Yang ktang hĭn ngă bruă tiŏ nao Ñu bi jêč hĭn. Ñu ƀuh mâo lu mdiê čiăng wiă, ƀiădah phung wiă jing ƀiă (êlan 37). Kdrăn hma hiu hưn klei đăo adôk kƀah mnuih myơr asei mlei kbiă nao jing phung wiă kơ Khua Yang.
Tơdah dlăng kơ phung lu, Khua Yang Yêsu ƀuh kbưi êlâo ti anăp ală leh anăn iêô mthưr lu mnuih mŭt hlăm kdrăn hma klei hdĭp mngăt myang ngă bruă bi mtlaih mnuih msĕ si Khua Yang ngă leh. Khua Yang Yêsu bi leh ênŭm jih bruă tiŏ nao Ama jao kơ Ñu ti lăn ala leh tŭ klei djiê leh anăn kbiă lŏ hdĭp, ară anei Ñu jao bruă tiŏ nao bi mtlaih mnuih kơ phung ƀĭng kna leh anăn kơ jih jang phung drei. Grăp čô phung anak Aê Diê brei mâo ai tiê thâo pap kơ phung lu “arăng atăt kơ klei djiê” (Klei Bi Hriêng 24:11) leh anăn brei thâo săng bruă tiŏ nao Khua Yang jao jing yuôm snăk leh anăn jêč, brei ngă mtam amâo ngă kĭ kơ̆ leh anăn bi kdung ôh.
Sa čô hiu hưn klei đăo hing ang D. L. Moody, sa mlam leh ruê̆ klei kƀĭn prŏng mtô hưn Klei Mrâo Mrang Jăk ñu lŏ wĭt kơ sang jưh, mâo sa čô êkei hlăk ai nao êmuh ñu si êlan čiăng mâo klei tŭ jing. Ñu iêô hlăk ai anăn hriê kơ ƀăng bhă điêt leh anăn dlăng trŭn phă êlan leh anăn êmuh ya ih ƀuh? Êkei hlăk ai wĭt lač, ƀuh pui mtrang kơ êlan, êdeh êran, sang čhĭ mnia… Moody brei ñu lŏ dlăng bi nik lu blư̆, leh anăn ñu lŏ thiăm, ƀuh lu mnuih dôk êrô êbat. Ñu duah mđing lŏ êmuh wĭt: “Bi ih, ya ih ƀuh?” Moody dlăng kơ ñu leh anăn wĭt lač: “kâo ƀuh lu mnuih dôk nao kơ war pui. Anăn yơh jing êlan kâo mtô.”
Tơl truh kơ hlăk grăp čô drei ƀuh phung ka đăo jŭm dar drei dôk nao yư̆ yư̆ kơ war pui, snăn anăn jing ênai tiêng liêng hưn brei drei thâo kơ bruă tiŏ nao bi mtlaih mnuih jing bruă tiŏ nao jêč êdimi, mtrŭt ai tiê drei duah êlan kah mbha Klei Mrâo Mrang Jăk čiăng bi hmao mtlaih diñu.
Si ngă drei mâo klei pap mơ̆ kơ phung ka mâo klei bi mtlaih? Ya diih ngă čiăng bi mtlaih diñu?
Wah lač: Ơ Khua Yang, akâo Ih brei kơ kâo mâo ai tiê thâo pap msĕ si Ih leh anăn mtrŭt kâo ngă bi jêč bruă tiŏ nao kâo hŏng klei kah mbha Klei Mrâo Mrang Jăk kơ lu mnuih jŭm dar kâo.
Dlăng Klei Aê Diê Blŭ hlăm tlâo thŭn: Klei Mmuñ Hđăp 109:1-31
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
