Mathais 9:35-38
Nqe cim:
“Thaum Yexus saib cov neeg coob coob ntawd, nws hlub lawv kawg li, rau qhov lawv ntxhov siab thiab tsis muaj leejtwg pab lawv, lawv zoo ib yam li pab yaj uas tsis muaj tus tswv yug” (Mathais 9:36).
Lus nug rau sawvdaws xav:
- Tswv Yexus pheej ua dabtsi thaum tseem ua Nws tes haujlwm?
- Thaum pom cov neeg coob coob, Tswv Yexus hnov licas?
- Tus Tswv tes haujlwm ceev nrooj tshajplaws yog dabtsi?
- Peb hnov licas thaum pom cov neeg ibncig tsis tau paub Vajtswv?
Tus sau Mathais hais sau zog txog tus Tswv tes haujlwm thaum Nws tseem ua neej nyob hauv ntiajteb no, yog “mus txhua nrho hauv tej nroog thiab hauv tej zos. Nws qhuab qhia hauv tej tsev sablaj, nws qhia Txojmoo Zoo uas hais txog Vajtswv lub Tebchaws, thiab kho tej neeg uas muaj mob, txawm yog tus mob li cas los Yexus kho tau zoo huv tibsi” (nqe 35) lub homphiaj yog coj txojkev cawmdim rau tibneeg. Ntawd yog Tswv Yexus tes haujlwm thiab kuj yog lub luag haujlwm tseemceeb uas Nws muab cob rau Nws cov thwjtim (Mathais 28:19-20, Malakaus 16:15). Nqe 36 qhia pom Tswv Yexus txojkev hlub loj kawg nkaus rau cov neeg yuav raug kev puastsuaj. Thaum pom cov neeg coob coob raws Nws qab “Nws hlub lawv kawg li.” Nqe lus “Nws hlub lawv kawg li” hais txog Tswv Yexus kev nkag siab totaub cov neeg tabtom raug txomnyem uas tsis muaj leejtwg pab, zoo li “pab yaj uas tsis muaj tus tswv yug”. Lawv poob qab thiab nrhiav tsis tau qabhau ntawm kev ua neej. Thaum ntsia pom tej uas cov neeg ntawd ntsib, tus Tswv yim xav ua nws tes haujlwm ceev nrooj. Nws ntsia pom cov nplej zoo hlais lawm tiamsis cov neeg uas hlais nplej muaj tsawg heev (nqe 37). Lub Nras Liaj Moo Zoo tabtom tsis muaj neeg nqis tes los ua tus pab hlais rau tus Tswv.
Thaum ntsia pom cov neeg coob coob, Tswv Yexus pom yav tom ntej thiab Nws nqua hu coob leej los hauv nras liaj sab ntsujplig ua lub luag haujlwm cawmdim tibneeg zoo li Nws tau ua los lawm. Tswv Yexus ua tiav lub luag haujlwm uas Vaj Leej Txiv muab cob thaum Nws tuag thiab sawv rov qab los, niaj hnub nimno, Nws muab lub luag haujlwm ntawd cob rau cov thwjtim thiab peb txhua tus. Tus Tswv cov menyuam txhua tus yuav tsum muaj nplooj siab hlub cov neeg uas luag tabtom “yuav coj mus tua povtseg” (Pajlug 24:11) thiab yuav tsum xam pom hais tias lub luag haujlwm tus Tswv cob yog tseemceeb heev thiab ceev nrooj heev, yuav tsum ua tamsim txhob theev txhob tos ntxiv lawm.
Ib tug xibhwb qhia Txojmoo Zoo nto npe uas yog D. L. Moody rov los so hauv tsev qhua tomqab uas qhuab qhia hauv ib rooj xa moo zoo, muaj ib tug tub hluas tuaj nug nws txog lub tswvyim qhia Txojmoo Zoo. Xibhwb Moody tau hu tus hluas ntawd los ntawm qhov rai ntsia lawm hauv txojkev thiab nug hais tias nws pom dabtsi? Tus hluas teb hais tias, pom teeb taws taug kev, tsheb khiav, tej chaw muag khoom,… Xibhwb Moody rov hais kom nws ua tib zoo saib ntau zaug ntxiv, nws thiaj hais tias, tseem pom tibneeg mus los thiab. Tus hluas thiaj nug hais tias: “Ua li koj pom dabtsi?” Xibhwb Moody ntsia nws thiab teb hais tias: “Kuv pom muaj coob tug tabtom taug kev mus hauv ntuj tawg. Ntawd yog kuv lub tswvyim qhia Txojmoo Zoo.”
Tsuas yog thaum ntsia pom cov neeg tsis tau ntseeg nyob ibncig peb tabtom taug kev mus hauv ntuj tawg, ces peb thiaj yuav ras dheev xav txog lub luag haujlwm ntawm kev cawmdim yog ceev nrooj heev, txhauj peb nrhiav kev mus qhia Txojmoo Zoo txawm yeej kom cawm tau lawv dim.
Peb puas hlub tshua cov neeg uas tsis tau txais kev cawmdim? Peb yuav ua dabtsi cawm kom lawv dim??
Tus Tswv, thov pub nyuam yaus muaj lub siab hlub zoo li Koj thiab txhauj nyuam yaus ua lub luag haujlwm ceev nrooj qhia Txojmoo Zoo rau cov neeg nyob ibncig nyuam yaus. Amees.
Nyeem Vajluskub hauv peb lub xyoos: Phau Ntawv Nkauj 109
Kênh Youtube BHKTHN:
