Klei Aê Diê Blŭ: Klei Bi Hriêng 16:26
Êlan kliăng: “Klei sa čô êpa mtrŭt ñu mă bruă, kyuadah ñu čiăng bi trei klei ñu êpa” (Klei Bi Hriêng 16:26).
Klei êmuh ksiêm mĭn: Ya klei mtrŭt arăng bi mă bruă? Ya klei mtrŭt mkăn mâo mbĭt hŏng klei anăn? Ya mta klei, klei hriăm brei drei bi mâo hĕ čiăng dưi kah mbha leh anăn mă bruă kơ arăng?
Êlan Klei Bi Hriêng anei dưi thâo săng hlăm dua mta klei mblang. Tui si klei mblang diêr “klei thâo êpa” amâo djŏ knŏng čiăng lač kơ klei êpa mhao hlăm kđeh asei mlei ôh ƀiădah čiăng lač wăt kơ klei tluh čiăng kơ mnơ̆ng amâo djŏ hlăm kđeh mơh. Drei dưi mblang msĕ snăn kyuadah boh blŭ “klei êpa mhao” tinei ăt jing boh blŭ lač kơ “mngăt” hlăm Klei Bi Hriêng 10:3, jing klei mtao Salômôn lač: “Yêhôwa amâo brei ôh phung kpă ênô ư̆ êpa; ƀiădah Ñu hngah klei phung ƀai tluh”. Msĕ si “klei thâo êpa” đru “mnuih suăi êmăn” brei mă bruă, snăn tơdah arăng thâo êpa amâodah êpa mhao kơ ya mta klei srăng mtrŭt pô anăn gĭr ktĭr čiăng dưi mâo. Ya mta klei drei dôk êpa mhao? Drei dôk êpa mhao Khua Yang pô leh anăn klei kpă ênô Ñu mơ̆ (Y‑Mathiơ 5:3, 6; 6:33)? Grăp hruê drei tlă anăp hŏng lu lĭn klei čiăng mâo hlăm klei hdĭp mbĭt hŏng lu klei mplư, mta klei krơ̆ng drei êbat hlăm êlan kniă Khua Yang jing klei êpa mhao Khua Yang, êpa mhao čiăng bi mơak kơ Khua Yang, êpa mhao kơ ƀuôn jăk hlăm adiê.
Êlan Klei Bi Hriêng anei ăt dưi thâo săng klă klơ̆ng. Tơdah dlăng kơ “klei thâo êpa” amâodah ƀơ̆ng huă jing sa klei thơ̆ng čiăng bi mâo, snăn klei kriăng mă bruă srăng jing sa bruă čuăn brei ngă bi leh čiăng dưi bi mdjŏ hrăp kơ klei čiăng anăn. Kriăng kreh mă bruă čiăng dưi bi mdjŏ hrăp klei čiăng pô ăt jing êlan djŏ kơ phung huĭ mpŭ kơ Aê Diê êbat nao. Mâo lu phung knan knăk (tham lam), čuôt klih, alah kba čiăng mâo mnơ̆ng yua kơ pô ƀiădah amâo kriăng mă bruă ôh ƀiădah mkra mnêč kăp plah mă dŏ arăng, mơ̆ng anăn atăt diñu mŭt hlăm “êlan klei djiê”, wăt tơdah lu mnuih lač klei ngă anăn jing thâo mĭn, jing djŏ (Klei Bi Hriêng 16:25).
Ƀiădah lĕ brei drei ăt hdơr mơh snei, tơdah drei kriăng kreh mă bruă kyua knŏng kơ “klei thâo êpa”, drei amâo srăng tuôm mâo klei thâo hrăp ôh. Mtao Salômôn lač snei: “Jih jang bruă mnuih ngă pioh kơ ƀăng êgei ñu, ƀiădah klei ñu čiăng ƀơ̆ng amâo thâo hrăp ôh” (Khua Pô Mtô 6:7). Tơdah msĕ snăn kơ ya mta phŭn knhal mkăn drei lŏ mă bruă?
Êlâo hĭn drei kriăng mă bruă kyuadah thâo săng klei mă bruă ăt jing sa bruă kkuh mpŭ mơh (Êphêsô 6:7). Kdlưn hĭn, drei mă bruă kyua bruă klam hlăm ƀuôn sang mơh (II Têsalônik 3:10-12). Leh anăn drei kriăng mă bruă kyua klei khăp kơ arăng, mă bruă čiăng dưi mâo mnơ̆ng ƀơ̆ng huă amâodah prăk kăk đru phung dôk kƀah (Êphêsô 4:28). Brei hdơr snei drei knŏng dưi kah mbha brei ya mta mnơ̆ng drei mâo. Tơdah drei amâo gĭr ktĭr kriăng mă bruă ôh, wăt tơdah čiăng dưn ăt kăn dưi mơh kah mbha leh anăn mă bruă đru ayŏng amai adei dôk găn klei dleh knap.
Si ngă drei dôk kriăng mă bruă hŏng ai tiê hur har leh anăn kpă ênô mơ̆?
Wah lač: Ơ Khua Yang, bi mni lač jăk kơ Khua Yang brei kâo mâo klei suaih pral leh anăn mmông myun dưi mă bruă čiêm rông gŏ sang. Akâo Khua Yang ăt yua kâo kăp đru rŭ, bi juh leh anăn mă bruă kơ pô mkăn hlăk dôk kƀah čiăng mâo mnơ̆ng.
Dlăng Klei Aê Diê Blŭ hlăm tlâo thŭn: Klei Mmuñ Hđăp 4:1-8; 5:1-12; 6:1-10
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
