Klei Aê Diê Blŭ: II Klei Yăl Dliê 11:1-4
Êlan kliăng: “Hlei pô bi êmut kơ ayŏng adei ñu jing pô bi mdjiê mnuih; leh anăn diih thâo kơ pô bi mdjiê mnuih amâo mâo ôh klei hdĭp hlŏng lar dôk hlăm ñu. ” (I Y-Yôhan 3:15).
Klei êmuh ksiêm mĭn: Wĭt lač klei bi ktlah mơ̆ng êpul nah Dưr, ya bruă Mtao Rôƀôam ngă? Ya bruă Aê Diê čiăng ñu ngă? Ya ngă? Ya mnơ̆ng ñu mâo leh gưt asăp Aê Diê? Ya klei brei drei ngă čiăng gưt asăp Aê Diê pap brei kơ ayŏng adei pô hlăm Sang Aê Diê?
Čiăng wĭt lač klei bi ktlah hjăn mơ̆ng dŭm êpul nah Dưr, Mtao Rôbôam bi kƀĭn phung sang Yuđa leh anăn Benjamin čiăng lŏ wĭt mă ala mtao pô. Khădah snăn, Klei Aê Diê Blŭ lač leh hŏng Khua pô hưn êlâo Y-Sêmaya mtă kơ mtao đăm nao bi blah ôh “hŏng ayŏng adei pô”. Leh dŭm bruă ngă ênguôt mâo leh kyua kƀah klei thâo mĭn, amâo tui duah klei Aê Diê čiăng mơ̆ng Mtao Rôbôam, ară anei drei ƀuh sa knuih mklăk wĭt, mtao leh anăn jih êpul lĭng kahan gưt asăp Aê Diê, “…wĭt, amâo nao bi blah hŏng Y-Jêrôbôam ôh”.
Čiăng gưt Klei Aê Diê Blŭ, Mtao Rôbôam lăm lui hĕ ai tiê pô, klei ngêñ, čiăng lŏ nao wĭt mă ya mta jing dŏ pô, lui wăt ai tiê hrŏng ruah pluh sa păn êbâo čô kahan, čiăng “gưt kơ klei Yêhôwa blŭ.” Klei anei dleh snăk ƀiădah tơdah gưt asăp snăn êdei anăn, Aê Diê hơêč hmưi hlăm lu mta bruă: mkŏ mjing dŭm ƀuôn prŏng kjăp mjing kđông kjăp ktang, lăn čar mdrŏng sah, leh anăn anak čô lar ênŭm.
Khua Yang Yêsu mtă “khăp kơ pô riêng gah ih msĕ si kơ ih pô” (Y-Mathiơ 22:39). Phung riêng gah jing jih jang phung drei bi tuôm hlăm klei hdĭp anei wăt tơdah kral amâodah amâo thâo kral ăt brei khăp msĕ si khăp kơ pô hĭn mơh phung jing “ayŏng adei pô”. Hruê anei, drei amâo bi mĭn ôh pô ngă soh bi mdjiê mnuih, ƀiădah lu blư̆ drei jing phung mdjiê “ayŏng adei pô” kyua klei amâo thâo săng. Anăn jing sĭt mâo ai tiê bi êmut kơ “ayŏng adei pô” kyua Klei Aê Diê Blŭ mtô “Hlei pô bi êmut kơ ayŏng adei ñu jing pô bi mdjiê mnuih” (I Y-Yôhan 3:15a). “ayŏng adei pô” tinei jing phung ayŏng adei sa gŏ sang klei đăo Aê Diê jing Ama, amâo djŏ knŏng jing phung sa êrah ôh. Klei bi êmŭt hlăm ai tiê hŏng “ayŏng adei pô” hnưm amâodah hnui ăt srăng bi êdah hŏng bruă ngă amâodah klei blŭ bi êka ayŏng adei pô. Klei soh mdjiê mnuih tal êlâo hlăm lăn ala jing mơ̆ng “ayŏng adei” hlăm sa gŏ sang, kyua rông klei bi êmut hlăm ai tiê ngă kơ Y-Kain truh kơ bruă ngă bi mdjiê adei pô leh anăn tŭ klei tăm pah truh lă lar (Klei Mphŭn Dơ̆ng 4:1-16).
Khua ƀĭng kna Y-Pôl mtô leh kơ klei khăp, “Klei khăp thâo gĭr leh anăn bŏ hŏng klei jăk; klei khăp amâo nač amâodah bi mđĭ ñu pô; ñu amâo mgao, amâodah ngă klei wê ôh. Klei khăp amâo duah klei tŭ dưn kơ ñu pô ôh; ñu amâo djăl ăl amâodah đing kơ klei jhat ôh; ñu amâo mơak ôh hŏng klei amâo kpă, ƀiădah ñu mơak hŏng klei sĭt nik. Klei khăp tŭ jih, đăo jih, čang hmăng jih, gĭr jih.” (I Kôrantô 13:4-7). Tơdah gưt asăp Aê Diê čiăng hdĭp hŏng klei khăp snăn hlăm ai tiê drei srăng amâo lŏ mâo ôh anôk kơ klei bi êmut truh kơ klei hdơ̆ng bi ngă bi ênguôt ƀiădah drei srăng bi thâo gĭr, thâo pap, bi hdơ̆ng bi čung ba.
Drei ƀuh pô dôk ngêñ, bi êmut kơ hlei pô hlăm “ayŏng adei pô” mơ̆?
Wah lač: Ơ Khua Yang, wăt tơdah klei hdĭp anei amâo dưi ñĕ ôh kơ klei amâo thâo bi djŏ, bi mneh msao, ƀiădah akâo kơ Khua Yang brei kâo thâo gưt asăp Aê Diê čiăng thâo pap, gĭr tŭ… ayŏng adei kâo, čiăng dưi mâo klei pap Aê Diê brei kơ klei hdĭp thâo gưt asăp Klei Aê Diê Blŭ.
Dlăng Klei Aê Diê Blŭ hlăm tlâo thŭn: Y-Yôp 35
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
