Klei Aê Diê Blŭ: Klei Mtô Mñă Klei Bhiăn 8:10-20
Êlan kliăng: “Brei diih hdơr kơ Yêhôwa Aê Diê diih, kyuadah Ñu yơh pô brei klei dưi mâo klei mdrŏng; čiăng kơ Ñu dưi bi sĭt klei bi mguôp Ñu kat asei leh kơ phung aê đưm diih, msĕ si diih ƀuh hruê anei.” (Klei Mtô Mñă Klei Bhiăn 8:18).
Klei êmuh ksiêm mĭn: Y‑Môis mtă mtăn êlâo kơ phung ƀuôn sang Israel đăm wơr bĭt ôh kơ ya mta klei Aê Diê ngă leh kơ diñu? Tơdah mâo klei mdrŏng, ya mta klei mplư phung ƀuôn sang Aê Diê ênưih lĕ? Wơr bĭt hĕ Aê Diê, bi êdah klă sĭt hŏng ya mta klei? Ya mta klei êlan 19-20 hưn êlâo kơ phung ƀuôn sang Aê Diê? Mơ̆ng drei mâo klei myun duah ƀơ̆ng huă leh anăn dưi mkŏ mjing bruă knuă? Si knhuah brei drei dôk hdĭp tơdah mă tŭ klei jăk jĭn Aê Diê brei?
Y‑Môis lŏ mñă kơ phung ƀuôn sang Israel snei, Aê Diê yơh jing Pô yua klei myang Ñu bi mtlaih diñu kbiă mơ̆ng klei jing hlŭn kơ čar Êjip (êlan 14b); Ñu yơh jing Pô dua blư̆ ngă klei myang bi ƀlĕ êa mơ̆ng boh tâo khăng kơ diñu ti krah kdrăn tač thu krô (êlan 15); Ñu yơh jing Pô thiê brei kpŭng mana mơ̆ng adiê čiêm diñu jih pă pluh thŭn hlăm kdrăn tač (êlan 16) tơl truh hlăk diñu dưi mŭt hlăm Čar Aê Diê ƀuăn, tơl hruê diñu kčưm ƀơ̆ng huă mnơ̆ng mơ̆ng čar Kanaan kơh Aê Diê mjưh amâo lŏ thiê brei kpŭng mana (Y‑Yôsuê 5:12) kyuadah phung ƀuôn sang Israel dưi buh pla, čiêm rông hlô mnơ̆ng mă pô leh čiăng mâo mnơ̆ng ƀơ̆ng huă.
Y‑Môis mtă mtăn hĕ êlâo, tơdah diñu mâo klei mdrŏng sah, ngăn drăp lu êbeh leh đăm mgao ôh wơr bĭt hĕ klei jăk Aê Diê ngă leh kơ diñu hlăk êlâo (êlan 14a) leh anăn đăm mĭn ôh kyuadah klei dưi leh anăn ai ktang mơ̆ng kngan diñu pô mkŏ mdơ̆ng, ƀiădah Aê Diê yơh Pô brei kơ diñu klei ktang čiăng kơ diñu dưi mâo klei mdrŏng sah tui si klei bi mguôp Aê Diê ƀuăn leh hŏng phung aê đưm diñu (êlan 17-18). Klei wơr bĭt Aê Diê bi êdah hlăm klei dôk dơ̆ng ƀơ̆ng huă grăp hruê hŏng knhuah hdĭp dlăng msĕ si amâo mâo Aê Diê ôh, klă sĭt jing klei amâo gưt ngă hlue si klei mtă mtrŭn leh anăn klei bhiăn Ñu ôh. Y‑Môis mtă mtăn êlâo, tơdah diñu wơr bĭt klei pap Aê Diê leh anăn kkuh mpŭ kơ yang mkăn, sĭt nik diñu srăng rai tuč msĕ si Aê Diê bi rai tuč phung ƀuôn sang Kanaan mơh (êlan 19-20).
Hlăm Y‑Luk 12:15-21, Khua Yang Yêsu iêô kơ mnuih mdrŏng tluh kơ dŏ dô knŏng uêñ mĭn leh anăn knang kơ ngăn drăp ti lăn ala anei jing mnuih mluk; mdrŏng sah ti lăn ala anei ƀiădah wơr bĭt hĕ klei pap Aê Diê snăn jing mnuih ƀun ƀin hĭn hlăm Aê Diê, kyuadah mlam anăn mtam tơdah Aê Diê sua mă wĭt mngăt ñu, ya klei tŭ dưn mâo mơ̆ng ngăn drăp anăn? Khua ƀĭng kna Y‑Pôl mtă mtăn kơ phung mdrŏng đăm dưm klei čang hmăng kơ ngăn drăp ti lăn ala ôh ƀiădah dưm bĕ klei čang hmăng hlăm Khua Yang leh anăn ngă lu bruă jăk čiăng mkăm pioh kơ drei pô sa hrue êdei anăp rơ̆ng kjăp (I Y‑Timôthê 6:17-19). Akâo kơ Aê Diê brei drei hdơr snei Aê Diê yơh brei kơ drei ai ktang, klei thâo mĭn, hruê mmông, klei myun dưi mă bruă, mkŏ mjing bruă knuă. Kyuanăn, tơdah dưi mâo klei mdrŏng sah Aê Diê brei, đăm wơr bĭt ôh klei pap Aê Diê. Dôk hdĭp bĕ hŏng ai tiê klei mĭn thâo hdơr knga bi mni kơ Aê Diê msĕ si pô čih Klei Mmuñ Hđăp 104:33, “Kâo srăng mmuñ kơ Yêhôwa jih jang hruê kâo dôk hdĭp; kâo srăng mmuñ bi mni kơ Aê Diê kâo êjai kâo dôk hdĭp.”
Si ngă drei thâo mơ̆ jih jang mnơ̆ng drei mâo jing mơ̆ng klei pap Aê Diê brei? Si ngă diih bi mni lač jăk kơ Aê Diê tơl jih klei hdĭp mơ̆?
Wah lač: Ơ Khua Yang, bi mni lač jăk kơ Ih kyua klei Ih thiê brei amâo dưi yap ôh. Akâo kơ Ih mñă bi hdơr kơ kâo jih jang klei jăk jĭn leh anăn mnơ̆ng brei klă kluôm knŏng hriê mơ̆ng Khua Yang, čiăng kơ kâo thâo hdơr knga bi mni kơ Ih nanao leh anăn thâo kah mbha klei pap Ih brei kơ pô mkăn.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: I Bruă Mtao 2:39-3:28
Kênh Youtube BHKTHN:
