Klei Aê Diê Blŭ: Y-Mathiơ 7:1-6
Êlan kliăng: “Kyuadah tui si diih phat kđi arăng, arăng srăng phat kđi diih msĕ mơh; leh anăn hnơ̆ng diih mkă kơ arăng, arăng srăng mkă kơ diih msĕ mơh.” (Y-Mathiơ 7:2).
Klei êmuh ksiêm mĭn: Ya mta klei Khua Yang Yêsu mtô phung ƀĭng kna đăm ngă ôh? Ya ngă? Ya klei Khua Yang čiăng mtô, Ñu yua rup ƀruih leh anăn êda hlăm ală? Hlei pô dưi phat kđi pô mkăn? Hrô kơ klei phat kđi arăng, ya klei brei drei ngă hĕ?
Khua Yang Yêsu mtô phung ƀĭng kna đăm phat kđi arăng ôh, čiăng kơ arăng amâo phat kđi pô. Boh blŭ “phat kđi” tinei mblang jing mplĕ kđi, mtrưm ksiêm. Khua Yang Yêsu amâo mâo mtô ôh phung ƀĭng kna brei dôk hdĭp kăp kwưh klei êđăp ênang, dôk kriêp ñăt ư ai mbĭt hŏng klei soh, amâodah amâo dưi đru lač ôh tơdah ƀuh ayŏng adei pô dôk ngă klei soh. Klei Khua Yang kăm ghă tinei jing knhuah hdĭp duah ksul suai klei jhat arăng, ngă khua phat kđi klei soh arăng, êjai anăn hlŏng amâo mđing ôh kơ klei kƀah soh jhat pô. Khua Yang Yêsu bi mngač klei anei hŏng rup hdơr đuôm, êda leh anăn ƀruih. Ñu pia kơ phung dôk hdĭp msĕ snăn jing phung ai ngăm, bruă diñu ngă knŏng kñăm čiăng bi mdlưh mtrŭn ênoh jing arăng gơ̆ leh anăn čiăng bi mđĭ diñu pô.
Mâo ƀiă êdi dua phŭn knhal mtrŭt Khua Yang Yêsu kăm ghă phung ƀĭng kna dôk hdĭp hŏng klei mĭn phat kđi arăng: Tal sa, amâo mâo pô dưi thâo klă ôh djăp ƀô̆ kiêng kơ sa mta bruă amâodah kơ sa čô mnuih, êngao kơ Khua Yang. Drei dưi ƀuh mta bruă, klei ngă, ƀiădah amâo dưi thâo săng ôh si klei jing, ya klei mtrŭt mơ̆ng lam, kyuanăn jih jang klei phat kđi amâo mâo klei djŏ năng ôh. Tal dua, amâo mâo ôh pô truh tơl kơ hnơ̆ng čuăn năng dưi phat kđi arăng, êngao kơ Khua Yang. Jih jang drei jing phung mnuih amâo mâo klă kluôm ôh, snăn yơh, hrô kơ klei dôk hdĭp hŏng klei mĭn phat kđi arăng, brei dôk hdĭp bĕ hŏng klei mĭn ksiêm dlăng wĭt kơ asei pô. Êlâo hĭn, brei mă hĕ êda mơ̆ng ală, snăn kơh thâo ƀuh mngač, čiăng dưi đru ayŏng adei mă hĕ ƀruih hŏng klei khăp amâo lŏ phat kđi dơ̆ng ôh.
Anak mnuih kreh khăng kdăng snăk hŏng klei soh wê arăng, ƀiădah êlưih pưih snăk hŏng klei soh wê asei pô. Anei jing klei mdah nanao grăp hruê hlăm klei hdĭp. Drei ăt kreh phat kđi, mplĕ kđi kơ đa đa bruă arăng ngă, ƀiădah klei yuôm jing drei amâo thâo ôh ya klei mtrŭt gơ̆ ngă snăn. Sa čô amâo đei truh nao bi kƀĭn, ƀiădah drei amâo thâo ôh anôk gơ̆ dôk kbưi snăk leh anăn ƀun đei, snăn amâo djăp prăk đĭ êdeh ôh čiăng dưi truh kơ Sang Aê Diê grăp hruê kăm. Amâodah mâo mơh đa mnuih dôk tlă anăp hŏng klei găp djuê ngă dleh, hnêč snăk kơh dưi truh nao bi kƀĭn, kyuanăn dlăng ti êngao msĕ si sa čô awăt êdu. Klei mưng phat kđi arăng amâo mâo klei bi đru rŭ mdơ̆ng hlăm phung đăo ôh, klăk wĭt, bi mjing hĕ phung ai ngăm. Knŏng hjăn Khua Yang Pô mâo klei năng leh anăn klei dưi phat kđi mnuih.
Si ngă drei khăng phat kđi bruă arăng ngă mơ̆?
Ơ Khua Yang, akâo kơ Ih đru kâo grăp hruê dôk hdĭp hŏng klei ksiêm mĭn wĭt kơ asei pô ti anăp Khua Yang. Akâo kơ Ih mñă kơ kâo thâo, êngao kơ Khua Yang, amâo mâo ôh pô năng dưi phat kđi arăng.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Klei Yap 33:50-34:29
Kênh Youtube BHKTHN:
