Klei Aê Diê Blŭ: Y-Mathiơ 7:7-11
Êlan kliăng: “Akâo bĕ, leh anăn arăng srăng brei kơ diih; duah bĕ, leh anăn diih srăng ƀuh; khŏk bĕ, leh anăn arăng srăng pŏk brei kơ diih” (Y-Mathiơ 7:7)
Klei êmuh ksiêm mĭn: Dŭm boh blŭ lač kơ bruă ngă hlăm êlan 7 leh anăn 8 bi hriăm phung drei ya mta hlăm klei wah lač? Si klei Khua Yang mă bi hmô čiăng đru phung ᵬǐng kna thâo sang klei khăp Ama hlăm adiê? Ya ngă drei ăt kwưh akâo êjai Khua Yang ka wǐt lač ôh?
Hlăm kdrêč 6, Khua Yang Yêsu bi hriăm phung ƀĭng kna sĭt wah lač đăm lŏ mñă wĭt mnă nao ôh klei amâo yuôm msĕ si klei răk grăp hruê, snăn hlăm kdrêč anei Ñu bi hriăm phung ƀĭng kna brei gĭr hlăm klei wah lač. Ñu yua boh blŭ lač kơ bruă ngă bi knar msĕ si: duah – ƀuh, khŏk-ᵬăng pŏk kñăm mtă kơ phung ƀĭng kna brei ktuh êyuh ai tiê gir wah lač, dôk kjăp hlăm klei wah lač, amâo êdu ai, čiăng dưi mă tŭ klei akâo.
Khua Yang Yêsu yua klei bi hmô kơ klei amĭ ma khăp kơ phung anak hlăm klei hdĭp anei čiăng bi hriăm phung ƀĭng kna thâo săng si ngă Aê Diê srăng wĭt lač klei wah lač hŏng klei gĭr. Tơdah phung anak akâo kơ amĭ ma ya mta klei, khă gơ̆ amĭ ama knŏng jing anak mnuih mâo klei soh, amâo kluôm ênŭm, ƀiădah kyua klei khăp kơ phung anak, digơ̆ brei kơ phung anak klei jăk amâo djŏ ôh anak akâo ƀêñ brei boh tâo, akâo kan ƀiădah brei ala. Khua Yang Yêsu yua gru rup anăn čiăng đru kơ phung ƀĭng kna thâo săng kơ klei khăp Aê Diê Ama hlăm adiê brei kơ phung ƀuôn sang Ñu prŏng êdi. Aê Diê amâo djŏ jing Pô amâo mđing dôk ti dlông adiê ôh, amâo uêñ kơ klei dleh dlan mơ̆ng anak mnuih ôh, amâo dah amâo djŏ jing Pô knŏng čiăng kơ phung ƀuôn sang Ñu ngă klei anei klei dih kơ Ñu ôh. Mklăk hŏng anăn, Khua Yang Yêsu bi mklă, tơdah amĭ ama hlăm klei hdĭp anei knŏng jing phung amâo năng mâo klei soh ƀiădah lŏ thâo brei klei jăk kơ anak čô pô, snăn Aê Diê klei khăp hĭn mơh amâo ngă ngơi mang ti anăp klei akâo mơ̆ng phung ƀuôn sang Ñu. Pô bŏ hŏng klei myang, thâo mĭn klă sĭt srăng brei kơ phung ƀuôn sang Ñu khăp hơiêng klei jăk hĭn hlăm wưng leh anăn klei čiăng jăk mơ̆ng Ñu.
Msĕ si sa klei lŏ wĭt ngă mâo klei mtui, grăp čô sĭt tuôm hŏng klei dleh dlan hlăm klei hdĭp, drei khăng nao giăm Khua Yang wah lač, akâo kơ Ñu đru. Ƀiădah amâo djŏ grăp čô mnuih gĭr ktĭr, dôk kjăp sơaĭ ôh hlăm klei wah lač. Mâo lu mnuih leh sa wưng wah lač ƀuh Aê Diê ăt kăn wĭt lač, anăn êdu ai leh anăn čŏng duah hdră msir tui si pô čiăng. Amâodah ăt mâo mơh mnuih sĭt ƀuh Aê Diê ka wĭt lač kơ pô snăn đing kơ Khua Yang. Diñu mĭn, tơdah Aê Diê klă sĭt jing Pô kăp mđing hmư̆ djăp klei akâo wah lač, ya ngă Ñu amâo đru kơ klei dleh dlan diñu dôk găn. Tơdah wah lač hŏng Aê Diê, brei drei đaŏ knăp snei, Aê Diê jing klei khăp, klă sĭt Ñu srăng brei klei jăk hĭn kơ phung ƀuôn sang Ñu hlăm mông jăk hĭn leh anăn tui si hdră jăk hĭn mơ̆ng Ñu. Kyua anăn, drei đăm ruăt êdu ai ôh, ƀiădah brei gĭr ktĭr, dôk kjăp jih ai tiê hlăm klei wah lač čiăng thâo klei jăk mơ̆ng Aê Diê Ama.
Drei tuôm êdu ai mơ̆ hlăm klei wah lač tơdah ƀuh Aê Diê êmưt wĭt lač klei pô akâo?
Ơ Khua Yang, kâo đaŏ sĭt Ih thâo ya klei jăk hĭn kơ kâo. Akâo kơ Ih bi hriăm kâo brei kjăp ai tiê hlăm klei wah lač, leh anăn thâo Aê Diê jing Pô brei klei jăk hlăm klei hdĭp kâo.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Klei Yap 35
Kênh Youtube BHKTHN:
