Klei Aê Diê Blŭ: Y-Mathiơ 6:24 –
Êlan kliăng: “Sa čô amâo dưi ôh jing hlŭn kơ dua čô khua; kyuadah ñu srăng bi êmut kơ sa čô anei leh anăn khăp kơ sa čô mkăn. Amâodah ñu srăng mpŭ kơ pô anei leh anăn bi êmut kơ pô mkăn. Diih amâo dưi ôh mă bruă kơ Aê Diê wăt kơ klei jing mdrŏng.” (Y-Mathiơ 6:24)
Klei êmuh ksiêm mĭn: Ya ngă sa čô mnuih amâo dưi jing hlŭn kơ dua čô khua ôh? Ya jing boh phŭn klei mblang Khua Yang Yêsu čiăng kñăm tinei? Ya klei Khua Yang mñă bi hdơr kơ drei leh anăn si klei diih lŏ wĭt ngă?
Hlăm êlan Klei Aê Diê Blŭ anei, Khua Yang Yêsu mtô kơ phung ƀĭng kna brei grăp čô ruah knŏng jing hlŭn kơ sa čô khua, amâodah jing hlŭn kơ Aê Diê, amâodah jing hlŭn kơ Mamôn (klei jing mdrŏng). Boh blŭ khua leh anăn hlŭn tinei, năng ai kbưi êgar hŏng drei ară anei. Ƀiădah hlăm ênuk Khua Yang Yêsu, dĭng buăl jing hlŭn, khua jing pô mâo klei dưi kluôm dhuôm hŏng hlŭn jing dŏ ñu, mklăk wĭt, pô jing hlŭn knŏng dưi mă bruă hjăn kơ khua ñu pô, khut khat amâo dưi lŏ mă bruă thiăm kơ khua mkăn ôh.
Hlăm ênuk ƀuôn sang kkuh kơ lu mta yang, Khua Yang Yêsu yua rup khua leh anăn hlŭn čiăng lač kơ anôk dôk knŏng hjăn păn kơ Aê Diê, brei phung tui hluê Ñu khut khat sĭt suôr. Amâodah blŭ klă hĭn, tơdah sa čô mnuih ruah mpŭ kơ Khua Yang Yêsu jing khua kơ klei hdĭp ñu, snăn amâo mâo klei dưi lŏ mă bruă thiăm kơ khua mkăn ôh. Khua mkăn Khua Yang lač tinei jing prăk kăk, dưi thâo săng jing msĕ si yang Mamôn hlăm ênuk anăn. Kdlưn hĭn, tơdah sa čô mă bruă mđrăm kơ dua čô khua srăng atăt truh kơ klei mâo dua knhuah hdĭp bi kdơ̆ng mbĭt, anăn jing srăng khăp kơ khua anei leh anăn bi êmut kơ khua adih, amâo bi leh ênŭm ôh bruă klam sa čô hlŭn. Anăn yơh jing phŭn knhal Khua Yang Yêsu kñăm, sa čô mnuih amâo dưi ôh mă bruă kơ Aê Diê wăt kơ klei jing mdrŏng.
Pruê̆ êlan Klei Aê Diê Blŭ anei brei drei ƀuh, boh phŭn Khua Yang Yêsu čiăng kơ phung tui hluê Ñu brei khut khat sĭt suôr, hŏng jih ai tiê mă bruă kơ Ñu, amâo brei ôh ya mta klei bruă mkăn bi kŭl klei hdĭp, msĕ si hlăm klei Blŭ Khua Yang mtô: “brei ih khăp kơ Khua Yang Aê Diê ih hŏng jih ai tiê, hŏng jih mngăt, hŏng jih klei mĭn, leh anăn hŏng jih ai ktang ih.” (Y-Markôs 12:30).
Jing phung tui hluê Khua Yang Yêsu, brei drei tŭ ư klei sĭt anei, drei ăt ka kluôm dhuôm ôh hlăm klei sĭt suôr mă bruă kơ Ñu khut khat hlăm klei hdĭp. Drei ăt dôk brei ngăn prăk, klei hing, bruă knuă, klei khăp pô bi kŭl klei hdĭp drei lu đei. Klei tui hluê Khua Yang leh anăn mă bruă kơ Ñu ka jing klei boh phŭn ôh hlăm klei hdĭp drei. Grăp hruê hrô kơ klei êmuh: ya klei Khua Yang čiăng kâo ngă kơ Ih, drei khăng bi mĭn lu hĭn: kâo čiăng ngă klei anei klei dih kơ kâo pô, amâodah hĭn êjai đa, drei akâo kwưh kơ Khua Yang đru brei bi mâo mta klei drei pô čiăng. Tơdah drei amâo thâo săng bi djŏ ôh, hlei drei jing hŏng Khua Yang, drei amâo srăng tuôm ngă djŏ ôh, leh anăn amâo mâo knhuah hdĭp djŏ tui si klei Khua Yang čiăng ôh. Klei khut khat sĭt suôr jing klei Khua Yang čiăng kơ hlei pô tui hluê Ñu brei bi mâo hĕ.
Si ngă drei jing dĭng buăl khut khat sĭt suôr hŏng Khua Yang grăp hruê mơ̆?
Ơ Khua Yang, jing Pô kâo dôk kkuh mpŭ leh anăn mă bruă, akâo kơ Ih đru kâo khut khat sĭt suôr hŏng Ih. Akâo kơ Ih đru kâo dưi găn klei mplư truh grăp hruê, čiăng kơ kâo hŏng jih ai tiê mă bruă kơ Ih kluôm klei hdĭp kâo.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Klei Yap 7:66-8:4
Kênh Youtube BHKTHN:
