Klei Aê Diê Blŭ: Y-Yôhan 19:17-30
Êlan kliăng:
“Tơdah Yêsu mnăm leh êa msăm, Ñu lač, “Jih jang bruă ênŭm leh!” Leh anăn Ñu kkui boh kŏ leh anăn tuč ai” (Y-Yôhan 19:30).
Klei êmuh ksiêm mĭn: Hlăk arăng pơ̆ng ti kyâo bi kal, ya klei Khua Yang Yêsu lač? Dŭm klei blŭ anăn brei ƀuh kơ ya mta klei Khua Yang uêñ mĭn? Si ngă drei hdơr knga kơ amĭ ama pô leh anăn kơ Ama hlăm adiê kơ klei khăp prŏng prĭn drei mă tŭ leh?
Klei Mrâo Mrang Jăk Y-Yôhan uêñ mĭn lu kơ klei blŭ, kčưm mŭt hŏng Klei Blŭ, êdei tinăn čih jŭm kjuh mta klei blŭ hưn “Kâo jing…” mơ̆ng Khua Yang Yêsu, leh anăn tlâo mta klei Khua Yang lač knhal tuč hlăk arăng pơ̆ng ti kyâo bi kal mâo lu klei mblang êlam lĭn. Dua mta klei blŭ tal êlâo hĭn êjai dôk yuôl ti kyâo bi kal bŏ hŏng klei ruă knap leh anăn hêñ, amâo djŏ ôh jing klei krao kwưh, ăl bi êmut ƀiădah jing klei blŭ pioh kơ amĭ Ñu tơdah ƀuh gơ̆ dôk giăm Y-Yôhan: “Ơ mniê, nĕ anei anak êkei ih!” (êlan 26). Jing sa čô anak, Khua Yang thâo săng kơ klei ruă ai tiê amĭ Ñu hlăk anăn. Jing sa čô ayŏng khua hlăm gŏ sang, amĭ Ñu jing mniê djiê ung mơh, Khua Yang thâo kơ amĭ Ñu čiăng snăk mâo hĕ sa čô thâo khăp hơiêng thâo uêñ dưi đru gơ̆, snăn yơh amâo lŏ mâo ôh pô mkăn jăk hĭn kơ Y-Yôhan ngă bruă anăn (êlan 27).
Êlan 28 čih: “Leh klei anăn, kyuadah Yêsu thâo jih jang bruă ênŭm leh,” Khua Yang knŏng ƀuh jih jang bruă ênŭm leh tơdah Ñu bi leh kluôm ênŭm bruă Ñu hŏng Ama hlăm adiê leh anăn hŏng amĭ Ñu ti lăn. Leh anăn kơh Ñu lač kơ klei Ñu čiăng: “Kâo mhao” (êlan 28). Dơ̆ng mơ̆ng mphŭn arăng mă, arăng phat kđi, arăng čăm, tơl truh kơ arăng pơ̆ng ti kyâo bi kal, amâo tuôm ƀuh Khua Yang krao kwưh sa boh ôh. Boh blŭ “Kâo mhao” brei ƀuh Khua Yang jing mnuih sĭt, thâo mhao, thâo ruă asei mlei klei mĭn hlăk arăng čăm, bi hêñ, arăng hngah leh anăn pơ̆ng ti kyâo bi kal. Ñu thâo kral jih jang mta klei ƀiădah ăt Ñu ruah êlan nao ti kyâo bi kal.
Klei blŭ knhal tuč jing “Jih jang bruă ênŭm leh!” (êlan 30). Hlăm klei Grek, klei blŭ anei “tetelestai”, mblang jing “Jih jang bruă leh leh”. Anei jing boh blŭ mưng yua hlăm klei hdĭp. Tơdah ngă leh jih bruă khua jao, dĭng buăl lač hŏng khua ñu tetelestai. Khua ngă yang leh ksiêm dlăng nik mnơ̆ng pioh myơr ngă yang amâo mâo ƀuh ôh sa anôk jhat, ñu lač tetelestai. Khua Yang Yêsu sĭt nik jing sa mnơ̆ng myơr ngă yang amâo mâo anôk dưi ƀuah ôh, leh anăn jing dĭng buăl bi leh kluôm ênŭm bruă Ama jao (Y-Yôhan 17:4). Êngao tinăn, tetelestai ăt jing boh blŭ phung blei mnia khăng yua tơdah tla wĭt ênŭm jih nư klei. Khua Yang Yêsu jing mnơ̆ng myơr bi djăp kluôm ênŭm jih jang ya mta phŭn brei bi mâo hĕ kơ klei bhiăn doh jăk, Ñu klam jih jang klei soh drei. Tetelestai ăt brei ƀuh mơh klei Khua Yang Yêsu tŭ klei djiê amâo djŏ jing klei dluh lĕ ôh, kăn djŏ jing mnuih tŭ klei jŭ jhat mơ̆ng phung bi êmut kơ Ñu mơh. Klei Khua Yang djiê bi tui klei soh jing sa hdră, jing klei Khua Yang pô čŏng čiăng ruah ngă.
Wăt tơdah bi leh kluôm ênŭm jih bruă Ama jao, Khua Yang Yêsu ăt bi êdah klei Ñu uêñ mĭn kơ amĭ Ñu. Si ngă drei dôk bi êdah ai tiê khăp, mpŭ kơ amĭ ama pô? Thâo kơ Khua Yang Yêsu thâo kral jih klei ruă knap hlăm asei mlei, klei hêñ ti kyâo bi kal ƀiădah Ñu ăt ruah êlan djiê brei kơ drei, ya mta klei diih thâo săng leh anăn ngă?
Bi mni kơ Khua Yang Yêsu ruah leh êlan nao ti kyâo bi kal wăt tơdah Khua Yang thâo kral jih klei ruă knap hlăm asei mlei, klei hêñ čiăng kơ kâo dưi mâo klei bi mtlaih. Akâo kơ Khua Yang đru kâo thâo kkuh mpŭ kơ Ama hlăm adiê leh anăn mpŭ kơ amĭ ama ti lăn anei.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
