II Timautes 2:14-21
Nqe cim:
“Koj yuav tsum xyaum ua koj lub neej kom haum Vajtswv siab thiab muab siab rau ua koj tes haujlwm tiag tiag, koj thiaj yuav tsis txajmuag. Thiab koj yuav tsum qhia raws li Vajtswv Txojlus” (II Timautes 2:15)
Lus nug xav:
– Timthawj Paulus ntuas tus xibhwb hluas Timautes kom qhia rau lwm tus paub qaij yam dabtsi?
– Paulus ntuas Timautes yuav tsum rau siab ua dabtsi?
– Zaj kawm hnub no qhia peb cheemtsum ua dabtsi kom txhim tsa tau kev ntseeg?
Txij nqe 14 hauv tshooj 2, Timthawj Paulus qhia tus xibhwb hluas Timautes txog qhov teebmeem cov xibhwb cuav, lossis tej kev qhia cuav (II Timautes 2:14 – 3:9). Paulus siv tej lus hais swm uas yog “tsis txhob” thiab “yuav tsum xyaum” los qhia rau Timautes cov phoojywg ua haujlwm. Ntu Vajluskub hnub no hais ntxiv cov ntsiab lus hauv tsab ntawv tim ib uas Paulus sau, “tsis txhob sib cav sib ceg txog tej nyuag lus uas sawvdaws hais” (nqe 14) lossis “tsis txhob sib cam txog tej nyuag lo lus” (Phau Txhais Tshiab – HMOWSV), thiab “txhob ua li cov neeg uas niaj hnub hais ua dog ua dig” (nqe 16). Timthawj Paulus tus kheej npaj txhij tiv thaiv thaum Txojmoo Zoo raug thuam. Paulus kuj yeej hais ncaj qha thaum Timthawj Petus muaj qhov kev ua tsis phim kev ntseeg, yoojyim ua rau lwm haivneeg totaub yuam kev hais tias lwm haivneeg yuav tsum ua kevcai txiav tawv thiaj dim (Kalatias 2:11-14). Tiamsis yam uas Timthawj Paulus hais yog tej kev sib cav sib ceg tsis muaj nqis, vim tej ntawd “tsis muaj qabhau dabtsi” (nqe 14), thiab ua rau lawv “tsuas muaj yuav ua rau sawvdaws tso Vajtswv tseg zuj zus xwb” (nqe 16).
Tsis yog hais tej uas yuav tau qaij, Timthawj Paulus qhia rau Timautes thiab peb paub ua neej thiab siv zog ua haujlwm heev dua: yuav tsum qhia raws li “Vajtswv Txojlus” (nqe 15). Peb yuav tawmtsam tsis tau kev ntseeg cuav los ntawm qhov uas pheej cav tej uas lawv ua tsis yog. Tes haujlwm uas peb yuav tau ua yog rau siab ntso kawm Vajtswv Txojlus thiab qhia qhov tseeb uas yog Vajtswv Txojlus, ua li no, txawm yog tej neeg ib ncig raug sim siab “tso Vajtswv tseg”, lossis “tsis muab siab rau ntseeg” (nqe 18), ces tus neeg uas paub qhov tseeb yeej “nyob ruaj khov”, lossis “tus ncej” tsis hloov, txawm ib ncig sawvdaws qaug tagnrho rau tej kev qhia cuav. (nqe 18-19).
Nimno, tsis coob los twb muaj ib feem raug poob mus rau tej kev sib cav, tsis hais nyob hauv Pawg Ntseeg thiab saum tej huab cua. Thaum mus ua neeg sib cav kom muaj yeej swb, tsis ua rau kom muaj kev txhim kho kev ntseeg tiamsis yog ua rau muaj kev sib chim, faib ua pab ua pawg. Zaj kawm hnub no qhia rau peb kom tsis poob sijhawm, dag zog mus sib cav sib ceg tsis muaj qab hau, cia li los koom tes txhim kho hauv Vajtswv Txojlus. Ib leeg txhawb ib leeg lub zog nyeem thiab kawm Vajtswv Txojlus, kawm hnubkaj, nquag pehawm Vajtswv, thiab muab Vajtswv Txojlus uas yog qhov tseeb los sib qhia. Thaum tus neeg ua Vajtswv haujlwm qhia thiab ua neej raws li Vajtswv Txojlus ces yuav txhawb tau ntau leej paub qhov tseeb thiab ua neej ruaj khov hauv qhov tseeb. Thov Vajtswv pab rau peb nco ntsoov Nws txojlus, niaj hnub “qhia raws li Vajtswv Txojlus”.
Thov Vajtswv,
Vajtswv, ua tsaug rau Koj tej lus qhia nyuam yaus, kom nyuam yaus qaij qhov uas sib cav sib ceg txog tej lus hais, yam tsis muaj qab hau saum tej huab cua, tiamsis siv sijhawm los kawm thiab qhia qhov tseeb uas yog Koj Txojlus rau lwm tus. Nyuam yaus tuav Tswv Yexus Khetos lub npe thov, Amees.
Peb koom tes rau tes haujlwm tseb qhov tseeb uas yog Vajtswv Txojlus zoo li cas?
Nyeem Vajluskub hauv peb lub xyoo: Phau Ntawv Nkauj 140-141
Kênh Youtube BHKTHN:
