Pajlug 28:4
Nqe cim:
“Yog koj tsis ua raws li kevcai, ces koj yog tus tuaj cov neeg ua phem tog, tiamsis yog koj hwm txoj kevcai, ces yog koj tawmtsam cov neeg siab phem” (Pajlug 28:4)
Lus nug xav:
– Raws li Pajlug 28:4, yam dabtsi tshwmsim thaum tibneeg tso Vajtswv txoj kevcai tseg?
– Tus neeg ua raws Vajtswv txoj kevcai yuav ua neej zoo li cas?
– Yuav ua li cas kom tus neeg ntseeg tus Tswv sawv tau ruaj khov thaum lub ntiajteb no muaj ntau yam yuam kev?
Nqe Vajluskub no qhia rau Vajtswv cov menyuam ntsig txog qhov tseemceeb ntawm kev ua raws li Vajtswv Txojlus nyob hauv lub ntiajteb uas puv npho tej kev hloov pauv thiab sim siab no. Thaum tibneeg muab tus Tswv txoj kevcai tso tseg, lawv yuav poob zuj zus txojkev ua zoo thiab sab ntsujplig. Qhov phem yuav raug saib zoo li tsis yuam kev, swm mus txog qhov uas cia li lees yuav, txhawb thiab qhuas. Dua li, tus neeg uas hlub thiab ua raws li Vajtswv Txojlus yuav muaj zog sawv ruaj khov thaum muaj kev phem thiab tiv thaiv qhov tseeb.
“Txoj kevcai” hauv nqe Vajluskub no tsis tsuas yog tej kevcai uas nyob hauv Phau Vajluskub Qub xwb, tiamsis tseem yog hais txog Vajtswv tej lus qhia thiab qhov tseeb uas nyob mus ibtxhis. Tus neeg uas tuav rawv Vajtswv Txojlus yog tus uas muab nws lub neej tso kiag rau tus Tswv coj, paub cais qhov zoo thiab qhov phem, qhov yog thiab tsis yog. Lawv tsis ua neej raws cov neeg coob lossis raws npoj hauv ntiajteb, tiamsis lawv ua li Vajtswv lub siab nyiam. Dua li ntawd, lawv paub “tawmtsam” tej kev qhia cuav, ua neej muaj feem xyuam thiab siv lawv lub meejmom los qhia sawvdaws ua neeg txawj ntse, coj kevcai.
Nimno, muaj ntau yam ntawm lub ntiajteb tabtom ua txawv Vajtswv Txojlus qhia. Muaj tej yam ua ntej ntawd raug muab saib yuam kev, tiamsis nimno saib yam li pheej tshaj. Yog li ntawd, tus ntseeg Yexus yuav tau ceevfaj thiab tuav rawv Vajtswv Txojlus kom tsis raug kuav mus raws lub caijnyoog. Timthawj Paulus qhia tias: “Nej tsis txhob ua nej lub neej zoo li tej neeg ntiajteb ua, tiamsis nej yuav tsum cia Vajtswv hloov nej lub siab kom nej muaj lub siab tshiab. Nej thiaj yuav paub ua raws li Vajtswv lub siab nyiam. Yog nej ua li ntawd, nej thiaj paub ua qhov zoo, ua haum Vajtswv siab thiab paub ua zoo kawg nkaus” (Loos 12:2). Tus uas ntseeg Vajtswv tau hu los ua neej txawv, zoo li tus ntses tsis mus raws dej ntws, qhia tawm Yexus Khetos kev ncaj ncees thiab kev hlub. Kx John Wesley tau hais tias: “Ib tiam neeg ua neej cais tsis tau meej, ces tej xeebntxwv tom qab yuav lees yuav tagnrho”. Nqe lus no qhia rau peb tias yog Pawg Ntseeg thiab tsevneeg tsis tuav rawv tus Tswv qhov tseeb, ces tej xeebntxwv tom qab no yuav yoojyim tso kev ntseeg thiab kevcai ua neej sab ntsujplig.
Hauv kev ua neej txhua hnub, peb yuav tau nyeem thiab kawm Vajtswv Txojlus kom peb muaj kev hloov tshiab. Niam txiv qhia menyuam hwm tus Tswv thiab ua neej raws qhov tseeb. Nyob hauv tej chaw ua haujlwm, tsev kawm lossis koom tej neeg coob coob, tus ntseeg yuav tsum ncaj ncees, sib hlub thiab tsis ua raws qhov yuam kev. Txawm yog thaum ntsib txojkev tawmtsam lossis txomnyem, los cia li ntseeg hais tias Vajtswv yuav pub lub zog tshiab rau cov neeg uas ncaj ncees rau Nws.
Thov Vajtswv,
Vajtswv, thov Koj pab nyuam yaus paub hlub thiab ua raws li Koj Txojlus qhia txhua hnub. Thov pub tswvyim thiab kev ua siab tawv kom nyuam yaus sawv tau ruaj khov tsis yuam kev, ua timkhawv rau qhov tseeb thiab txojkev hlub rau neeg ntiajeb. Nyuam yaus tuav Tswv Yexus Khetos lub npe thov, Amees.
Peb twb tuav rawv Vajtswv qhov tseeb li cas nyob hauv peb kev ua neej txhua hnub nrog ntiajteb?
Nyeem Vajluskub hauv peb lub xyoo: Phau Ntawv Nkauj 138-139
Kênh Youtube BHKTHN:
