Mathiơ 26:36-46
“Inh wă kơ iĕm kral ngôi hơpong kơ Inh păng wă kơ iĕm krao khan kơdih wă kơ iĕm huay kơ lui kơ yang Satan pơhlŭ. Inh băt kơ jơhngơ̆m đon iĕm wă ră, mă-lei akâu iĕm ưh kơ kĕ.” (Mathiơ 26:41)
Nơ̆r jet tơchĕng pơwao:
– Kră Yang Yêsu pơkă kiơ hăm pêng ‘nu bơngai pơhrăm păng Sư lăm pơgar Gêtsêmanê?
– Yua kơ kiơ Kră Yang athei lu sư thoi noh?
– Bơ̆n yua iŏk ‘bai pơhrăm ‘nâu thoi yơ kơplah arih lăm jơhnơr năr wă jê̆ tôch?
Kơplah Kră Yang Yêsu hơdai hăm lu bơngai pơhrăm păng Sư năm tơ pơgar Gêtsêmanê wă krao khan, Sư pơkă kơ pêng ‘nu bơngai pơhrăm păng Sư: “na iĕm ngôi ‘bơ̆t âu kral kơchăng ngôi hơpong kơ Inh ‘biơ̆ hŏ” (trong 38). Nơ̆r “kral kơchăng” dah “kral gak” wă khan ling lang kơchăng wă kơ đei nơ̆r pơma păng jơhngơ̆m tơ’bôh trŏ kơplah đei dôm tơdrong pơmat, tơdrong pơlong lăng truh mă ưh kơ tam băt. Đang kơ Yêsu kraokhan na wih tơ pêng ‘nu noh, Sư ‘bôh pêng ‘nu bơngai pơhrăm păng Sư tep, lu sư ưh kơ kĕ kral kiơ̆ kơ thoi Sư pơkă khan. Kră Yang athei lu sư kral.Nhen thoi linh kral gak ‘măng athei pơm kiơ̆ tơdrong đei hơmet wă ling lang kơchăng jah năm dah đei tơdrong wă truh, wă tơgŭm tơ lăm pơlei băt na hơmet lê̆ adrol kơplah đei ayăt năm blah, lu bơngai pơhrăm păng Sư kư̆m kăl kơ chơ chă jơhngơ̆m pran hăm tơdrong krao khan wă kơ đei jơhngơ̆m pran tơblah hăm dôm tơdrong hơlĕnh, lăm tơdrong pơhlŭ đơ̆ng yang satan păng teh đak. Kră Yang bơ̆n tơbăt kơ lu bơngai pơhrăm păng Sư băt tơdrong lu sư jơ noh, lu sư ‘maih kral dêh păng krao khan, mălei gah sĕch akâu akar lu sư rơdu dêh, lu sư gleh lap.
Kơplah Kră Yang Yêsu wih tơ lu sư wơ̆t mă ‘bar: “’bôh oei tep lei lăi yua kơ măt lu sư tep ưh kơ lar” (trong 43). Lu sư thuơ răm tơpă păng tep blêk dêh.Kră Yang Yêsu khan: “Iĕm tep pơdơh ‘biơ̆ hă? Dang ei truh jơ đe wă rôp Inh kon bơngai jao kơ lu bơngai yoch bơih” (trong 45) ưh kơ sĭ Kră Yang wă kơ lu đe bu mă kiơ̆ Sư tă ưh kơ gơh ngăl ôh mălei Sư wă kơ lu sư băt kơ tơdrong truh lu sư gô thuơ răm kơplah tơ’bơ̆p tơ’bưh hăm dôm tơdrong pơmat pơlong wă truh na tơdrong pran kĕjei hăm tơdrong krao khan.
Arih lăm jơhnơr tuch luch, nơ̆r Kră Yang oei tơ’blŏk kơ bơ̆n athei ling lang krăng kơchăng, Pêtrôs kư̆m tơ’blŏk kơ bơngai lui gah tơdrong kơchăng pơnam krao khan lăm năr wă jê̆ tôch bơih: “Khei ‘năr wă jê̆ tôch boih na iĕm athei tơchĕng đon mă hơgei wă kơ kơchăng kơ tơdrong krao khan pơnam.” (I Pêtrôs 4:7). ‘Bok Pôl kư̆m tơ’blŏk kơ khul bơngai lui tơ Têsalônik gah tơdrong kơchăng bơwei akâu kơdih “Yua kơ bơ̆n huay pă oei lăm măng mu boih, na bơ̆n ‘nĕ kơ tep hiơt thoi lu bơngai ưh kơ lui. Bơ̆n lui boih, bơ̆n thoi lĕ iung đơ̆ng tep na bơ̆n athei kơchăng ling lang. Bơ̆n athei pơm thoi bơngai hơdrăl ưh kơ et sik; ‘noh wă khan bơ̆n athei lui kơjăp mă tơpă.” (I Têsalônik 5:6). Tơ’ngla Kră Yang Yêsu kư̆m tơ’blŏk kơ đĭ đăng lu đe bu mă lui kơ Sư kăl kơchăng wei tơdrong arih ‘lơ̆ng rơgoh wă kơ lăm năr Kră Yang jur bơ̆n gô năm hơdai Sư: “Inh ‘bôh thoi noh boih na inh kơtơ̆ng Kră Yang Yêsu Krist khan: “Inh wă jur kơplah kon bơngai ưh kơ lêng ê thoi bơngai wă năm tơtông. Hiôk dêh bu mă oei kral kơchăng păng đei hơbĕn ao hrŭk wă kơ đe huay kơ ‘bôh sư hang-hông.” (Tơdrong tơ’bôh 16:15). Apinh Kră Yang ăn kơ bơ̆n ling lang kơchăng păng adrin krao khan wă kơ bơ̆n huay kơ pơ̆k huŏng lăm tơtdrong yang kơnê̆ pơhlŭ mălei ling lang kơjăp yak năm hăm Kră Yang rim năr.
Ơ Yang Bơhngol ‘Lơ̆ng, Yang mă oei lăm inh, apinh tơgŭm inh kĕjei đơ̆ng dôm tơdrong pơgăn, dôm tơdrong yoch, dôm tơdrong hưch hanh ‘maih wă lăm teh đak pơm kơ inh ưh kơ gơh kĕ kơchăng wă krao khan păng chang gô năr Ih jur. Krao khan yua Anăn Kră Yang Yêsu Krist, Amen.
Lu tơdrong rơdu ayơ, tơdrong gleh lap ayơ pơm kơ bơ̆n ưh kơ kĕ gơh kơchăng hăm Kră Yang?
Đŏk Sơ̆p hla ‘Bok Kei-Dei lăm pêng sơnăm: Jop 41
Kênh Youtube BHKTHN:
