Mathiơ 26:36-46
“Ơ ‘Bă, dah gơh, ăn kơ Inh klaih đơ̆ng tơdrong gleh âu. Mă-lei Ih ‘nĕ pơm kiơ̆ kơ Inh, pơm kiơ̆ kơ Ih đĕch.” (Mathiơ 26:39b)
Nơ̆r jet tơchĕng pơwao:
– Tơ pơgar Gêtsêmanê, Kră Yang Yêsu apinh tơdrong kiơ hăm ‘Bok Kei-Dei?
– Jơhngơ̆m Kră Yang jơ ‘noh thoi yơ?
– Lu bơ̆n mơn kiơ gah tơdrong ‘mêm Kră Yang ‘măn kơ bơ̆n?
Kră Yang Yêsu păng lu bơngai pơhrăm Sư năm tơ minh anih đe anăn Gêtsêmanê lăm nơ̆r Juđê khan kơ’bang chơ pĕt đak rơmă. Pơgar ‘nâu ‘bĕnh tơm ‘long ôliu, plei ôliu ‘nâu đe teh pơhĕch păng chơ pĕt wă kơ jing đak rơmă đe gĭt. Kră Yang năm pơgar Gêtsêmanê wă kơ krao khan kơ ‘Bă Sư. Mathiơ roi tơbăt jơhngơ̆m Kră Yang kơplah jơ noh, Sư “sơ’ngon” (trong 37), Kră Yang khan kơ lu bơngai pơhrăm păng Sư thoi âu, “Dang ei Inh sơ’ngon dêh dang lĕ kơ wă lôch, na iĕm ngôi ‘bơ̆t âu kral kơchăng ngôi hơpong kơ Inh ‘biơ̆ hŏ.” (trong 38) tơdrong Kră Yang Yêsu Sư wă tơ’bưh hăm ‘long pơglang ‘noh tơdrong jĭ pơmat gah akâu kar, tơ’bưh hăm tơdrong yoch kon bơngai, păng tơdrong achăng ‘Bok Kei-Dei noh tơdrong jĭ ơh sơ’ngon gah bơhngol. Kră Yang anhăk ba Pêtrôs, Yôhan păng Yakơ kiơ̆ Sư năm tơ to ‘biơ̆ lăm pơgar. Na Sư năm tơ to wă kơ krao khan kơ ‘Bă Sư: “Yêsu năm ataih ‘biơ̆ đơ̆ng lu pêng ‘nu noh na Sư ‘nap kŭp kơ̆l krao khan kơ ‘Bă Sư thoi âu: “Ơ ‘Bă, dah gơh, ăn kơ Inh klaih đơ̆ng tơdrong gleh âu. Mă-lei Ih ‘nĕ pơm kiơ̆ kơ Inh, pơm kiơ̆ kơ Ih đĕch.” (trong 39).
Nơ̆r Kră Yang Yêsu krao khan tơ’bôh Sư lăp đon jur tơ lăm teh đak ‘noh Sư hơmet kơ trong ‘long pơglang (Mathiơ 1:21). Mă khan băt tơdrong krưp dêh tơ ‘long pơglang hăm sĕch akâu akar păng bơhngol mălei Sư oei chu kơ Kră Yang ‘Bă tôm tơdrong. Wơ̆t mă ‘bar păng wơ̆t mă pêng, Sư wă tơ’bôh dơ̆ng tơdrong chu kiơ̆ thoi ‘Bă Sư wă pơm keh tơdrong dŏng pơklaih: “Yêsu năm krao khan mă ‘bar Sư khan thoi âu: “Ơ ‘Bă, dah Ih wă kơ Inh chu iŏk tơdrong gleh âu tơpă, kư̆m bưh, gô mơ̆ng kơ Ih wă.” (trong 42). Đơ̆ng rŏng kơ Yêsu krao khan đang, lu bơngai wă pơlôch Sư.
Kơplah pơhrăm nơ̆r ‘Bok Kei-Dei ‘nâu, bơ̆n kăl kơ băt thoi âu bơ̆n ưh kơ hlôh ôh kư̆m nhen thoi ưh kơ gơh klah asong tơdrong pơmat Kră Yang Yêsu lăm tơdrong tơblah tơ pơgar Gêtsêmanê. Bơ̆n kăl kơ băt Kră Yang Yêsu lăp đon chu iŏk dôm tơdrong pơmat păng jĭ jăn hăm Sư wă huai iŏk tơdrong yoch kon bơngai. Bơ̆n kăl kơ băt bơnê kơ Kră Yang yua kơ Sư chu kiơ̆ thoi ‘Bă wă, pơm pơkeh tơ ‘long pơglang wă kon bơngai gơh iŏk tơdrong dŏng pơklaih đơ̆ng tơdrong yoch. Bơ̆n băt Kră Yang tơblah yua kơ bơ̆n thoi yơ lăm pơgar Gêtsêmanê, sơ̆p hla bơar tơdrong ‘nao ‘lơ̆ng Luka 22:44 chih thoi âu: “……”. Kơplah băt tơdrong ‘mêm Kră Yang ‘măn kơ bơ̆n tih dêh tơpă, bơ̆n gô wă arih pơyua kơ Sư.
Ơ Kră Yang mă ‘mêm, bơnê kơ Ih lăp đon lôch yua kơ inh. Apinh ăn inh ling lang ‘mêm kơ Ih păng arih trŏ lăm tơdrong Ih ‘mêm đơ̆ng tơdrong bơ̆jang păng pơm kơdranh gah Kră Yang kơ lơ bơngai. Krao khan yua Anăn Kră Yang Yêsu Krist, Amen.
Bơ̆n băt thoi yơ gah tơdrong ‘mêm Kră Yang ‘măn kơ bơ̆n kơplah Sư chu iŏk năm trong pơglang?
Đŏk Sơ̆p hla bơar ‘Bok Kei-Dei lăm pêng sơnăm: Jop 40
Kênh Youtube BHKTHN:
