Tơdrong Pơđơ̆k 3:27-28
“’Nĕ kơ sơngah pơm ‘lơ̆ng kơ bơngai trŏ kơ pơm, Kơplah ti ih gơh pơm tơdrong noh. Tơdah ih đei boih” (Tơdrong Pơđơ̆k 3:27)
Nơ̆r jet tơchĕng pơwao:
– Pơtao Sôlômôn bơtho kon sư kăl kơ pơm tơdrong kiơ wă tơwih tơdrong kăl wă bôl buăl?
– Bơ̆n oei pơm kiơ̆ nơ̆r bơtho âu thoi yơ?
Tơdrong pơđơ̆k chăl 3 jơ̆ nơ̆r bơtho ‘lơ̆ng dêh đơ̆ng pơtao Sôlômôn bơtho kon sư gah tơdrpng gơh hơgei. Tơdah 26 trong adrol bơtho gah Kră Yang Yêhôwa jơ̆ tu tơm tơdrong gơh hơgei, dôm tơdrong đei yua đơ̆ng tơđrong gơh hơgei păng đei iŏk tơdrong gơh hơgei, lei dôm trong đơ̆ng rŏng, pơtao Sôlômôn bơtho gah tơdrong bơngai gơh hơgei đei pơm hăm bơngai nai.
Tơdrong blŭng a pơtao Sôlômôn bơtho kon sư khan “’Nĕ kơ sơngah pơm ‘lơ̆ng kơ bơngai trŏ kơ pơm” trong 28 tơbăt ăn “Bơngai ayơ” khan “bôl buăl bơ̆n”. Bôl buăl bơ̆n “trŏ kơ pơm” wă khan “trŏ lăp kăl tơpă”. Thoi noh, bơ̆n băt kơnăl bơngai bơ̆n kăl kơ pơm ‘lơ̆ng” ưh kơ sĭ lu bơngai oei jê̆ hnam bơ̆n đĕch, khan “bôl buăl bơ̆n” dah rông ‘bôt, mălei lu bơngai đei tơdrong kăl wă mă bơ̆n đei băt. Hla bơar ‘Bok Kei-Dei pah ‘nao đei pơma hơđăl rơđah gah “bôl buăl bơ̆n” kơplah minh ‘nu thây bơtho tơdrong juăt đe Juđê jet Kră Yang Yêsu: “Lu đe bu bôl buăl inh”. Đơ̆ng tơđrong pơtih gia bơngai Samri mơnat kơ bơngai Juđê, Kră Yang Yêsu khan: Bôl buăl bơ̆n phŏ sư bơngai tơmoi bơ̆n tam mă băt băl mălei kăl kơ tơgŭm sư. (Luka 10:29-37). Thoi noh, trong tơdrong pơ̆k âu bơtho bơ̆n athei pơm ‘lơ̆ng păng tơgŭm dôm tơdrong kăl wă lăp trŏ lu bơngai mă đei tơdrong anat anot. ‘bơ̆t âu ưh kơ pơma ‘bơm dôm tơdrong kăl wa mă “ưh kơ rơđah” ayơ noh ôh, mălei nơ̆r “’lơ̆ng” wă pơma tơgŭm hăm tơmam tơpă (I Yôhan 3:17-18).
Blŭng a trong tơdrong pơđơ̆k ‘nâu lăm nơ̆r wă pơma khan: “’Nĕ kơ gơ̆t lê̆ tơdrong ‘lơ̆ng đơ̆ng lu bơngai tơ’ngla Sư noh”. Bu oei đei dôm “tơdrong ‘lơ̆ng” ‘nâu? Hăm trŏ kơ lu bơ̆n ưh? Ưh kơ trŏ ôh? Lu bơ̆n ưh kơ đei “Tơdrong ‘lơ̆ng” noh, mă bơ̆n oei wei sư ‘noh đĕch! Tơpă sư “tơdrong ‘lơ̆ng” noh gah lu bơngai đei tơdrong kăl wă lu bơ̆n kret tơsen, ưh kơ klah asong , tơgŭm đe yua kơ bơ̆n khan tơmam bơ̆n kơdih, wă ăn kơ bu jơ̆ ăn, ưh kơ wă ăn kư̆m huay kơ đei kiơ ôh! Mălei sơ̆p hla bơar ‘Bok Kei-Dei bơtho khan mŭk tơmam Kră Yang ăn kơ bơ̆n ưh kơ trŏ kơ gah bơ̆n kơdih ôh, noh gah lu bơngai oei kăl kơ tơgŭm. Yua kơ tôm tơdrong gah ‘Bok Kei-Dei ngăl păng bơ̆n jơ̆ bơngai wei lăng mŭk tơmam Sư đĕch! Dôm “Tơdrong ‘lơ̆ng” Kră Yang pơjao ăn kơ bơ̆n ưh kơ trŏ wă kơ bơ̆n yua kiơ̆ kơ bơ̆n kơdih ôh, mălei Kră Yang ăn kơ bơ̆n dôm “tơdrong ‘lơ̆ng” noh wă kơ bơ̆n wei lăng sư păng ba ăn kơ lu bơngai oei đei tơdrong kăl wă kơ tơgŭm.
Bơ̆n pơm yoch dih băl ưh kơ trŏ kơ pơm dôm tơdrong kơnê̆ đĕch ôh, mă noh jơ̆ sơngah kơ pơm dih băl dôm tơđrong ‘lơ̆ng. Lơ bơngai juăt kơ tơchĕng khan gô ‘lơ̆ng tơdah bơ̆n ưh kơ đei pơrăm bơngai bu, mălei tơpă sư kư̆m yoch tơdah bơ̆n pơm ưh kơ pơrăm đe đĕch! Tơdrong mă bơ̆n athei ling lang lăng ming ‘noh jơ̆: Đei dôm tơdrong ‘lơ̆ng ayơ mă inh oei bơwei kơdih, păng sơngah ưh kơ “pơm kơ bơngai trŏ kơ pơm” ưh?
Ơ Kră Yang, apinh Ih ăn kơ inh băt kơdih jơ̆ bơngai wei mŭk tơmam Ih đĕch păng tơgŭm inh yua dôm tơdrong Kră Yang asong ăn wă tơ’bôh tơdrong ‘mêm Sư kơ bơngai nai. Krao khan yua anăn Kră Yang Yêsu Krist, Amen.
Tơdrong kiơ pơm kơ bơ̆n ‘bôh anat dêh kơplah pơm kiơ̆ nơ̆r bơtho ‘nâu?
Đŏk Sơ̆p hla bơar ‘Bok Kei-Dei lăm pêng sơnăm: Jop 36
Kênh Youtube BHKTHN:
