Klei Aê Diê Blŭ: I Y-Pêtrôs 2:11-12
Êlan kliăng: “Brei diih dôk dơ̆ng ƀơ̆ng huă jăk nanao ti krah phung amâo đăo” (I Y-Pêtrôs 2:12a)
Klei êmuh ksiêm mĭn: Khua ƀĭng kna Y-Pêtrôs bi msĕ phung anak Aê Diê hŏng hlei pô? Si klei ñu mtă mtăn kơ phung anak ƀuôn sang Aê Diê brei mâo knhuah hdĭp jăk ti krah lăn ala? Si ngă čiăng kơ drei ăt djă pioh nanao knhuah hdĭp jăk ti krah ala ƀuôn thâodah arăng thâo săng čhuai dưn?
Khua ƀĭng kna Y-Pêtrôs kčưm dơ̆ng hŏng klei blŭ mñă kơ ƀuôn phung anak ƀuôn sang Aê Diê sĭt. Ñu bi msĕ drei “msĕ si phung tue leh anăn phung dôk ti êngao čar pô” ti lăn ala (êlan 11a). Sĭt yơh, drei amâo mdê hĭn hŏng sa čô tue găn bhiâo ti lăn ala anei ôh. Ƀuôn sang drei sĭt jing Ƀuôn Jăk ti adiê, anôk Yang Krist dôk (Philip 3:20). Tơdah thâo săng leh ƀuôn sĭt drei jing Ƀuôn Ala Mtao Adiê, drei srăng mâo sa knuih hdĭp mdê hĭn hlăm ala ƀuôn ară anei hin.
Knhuah hdĭp jăk leh anăn kpă ênô kčưm dơ̆ng mơ̆ng klei hngah klei kđeh tluh, msĕ si klei tluh čiăng čuôt klih, klei tluh čiăng leh anăn klei čhŏ mrŏ lăn ala khăng mtrŭt mčhur (êlan 11b). Sa čô tue amâo brei ôh drei pô bi čhŭ hŏng klei bhiăn klei mưng soh jhat mơ̆ng anôk drei dôk găn, ƀiădah pioh pô doh êngeh čiăng mtrang hnơ̆ng čuăn klei hdĭp ênuah ênô Ƀuôn Ala Mtao Adiê.
Khua ƀĭng kna Y-Pêtrôs iêô mthưr drei brei “dôk dơ̆ng ƀơ̆ng huă jăk nanao ti krah phung amâo đăo” (êlan 12a). Klei jăk kpă tinei amâo knŏng djă pioh klei bhiăn ƀiădah jing sa knhuah hdĭp kpă ênô leh anăn klei khăp. Anăn jing sa knhuah hdĭp bi êdah klei sĭt suôr hlăm bruă mă, amâo mplư amâodah mčeh luar, kăp đru pô riêng gah, leh anăn amâo ăl čôñ ôh tŭ klei arăng ngă amâo mtăp mđơr. Anei yơh jing êlan hdră drei bi êdah knuih Khua Yang Yêsu kơ phung ka thâo kral Khua Yang. Klei khăp amâo djŏ knŏng hŏng klei blŭ ôh, ƀiădah hŏng jih “bruă jăk” sĭt êmĭt tơl kơ phung amâo đăo dưi ƀuh klă hŏng ală, hmư̆ hŏng knga. Wăt tơdah klei hdĭp hlăm ala ƀuôn amâo mâo klei mtăp mđơr, drei ăt čuăn ruah dôk hdĭp kpă ênô. Wăt tơdah anak mnuih bi êmut soh jhat, drei ăt čuăn ruah hdĭp hŏng klei khăp klei pap brei. Klei hdĭp mâo klei bi mlih hlăm lam bi êdah truh ti êngao anăn yơh, srăng jing klei hưn bi sĭt hdĭp Klei Mrâo Mrang Jăk bi mtlaih mơ̆ng Khua Yang Yêsu.
Ƀiădah lĕ, mâo sa klei sĭt lŏ wĭt ngă amâo jăk ôh kơ drei, wăt tơdah drei hdĭp jăk tui si Klei Aê Diê Blŭ mtô, tăp năng arăng ăt blŭ mčeh luar amâodah thâo săng čhuai (êlan 12). Wăt snăn dưn, tơdah drei ăt sĭt suôr djă pioh klei hdĭp kpă ênuah leh anăn thâo khăp, snăn mơ̆ng anôk anăn yơh srăng kbiă hriê sa klei ktang dưi bi mlih yuôm bhăn, čiăng kơ mnuih mkăn dưi ƀuh leh anăn bi mlih. Klei kñăm knhal tuč kơ knhuah hdĭp jăk kpă, amâo djŏ pioh bi mđĭ drei pô ôh, ƀiădah čiăng kơ mnuih mkăn mpŭ mni kơ Aê Diê. Tơdah drei wĭt lač kơ klei bi êmut hŏng klei khăp, wĭt lač kơ klei jhat ƀai hŏng klei kpă ênô, jing drei dôk pŏk êlan kơ Klei Mrâo Mrang Jăk bi mtlaih Khua Yang Yêsu truh kơ ai tiê mnuih. Knhuah hdĭp jăk drei ti krah lăn ala yơh jing klei mtô ktang hĭn kơ ala ƀuôn dôk ƀuh dôk hmư̆ grăp hruê.
Si drei dôk bi êdah Anăn Khua Yang ti krah ala ƀuôn anei?
Wah lač: Ơ Khua Yang, akâo Ih đru kâo hdơr nanao ti lăn ala anei kâo knŏng jing tue, čiăng kơ kâo amâo hlue mbĭt hŏng klei kđeh tluh kơ lăn ala anei. Akâo Khua Yang brei kơ kâo klei ktang čiăng dôk hdĭp kpă ênô hlăm jih jang klei čuăn ngă leh anăn bŏ hŏng klei khăp hlăm jih jang klei dôk dơ̆ng ƀơ̆ng huă, čiăng kơ hŏng klei hdĭp kâo, Anăn Khua Yang mâo klei mpŭ mni. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Yôp 33
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
