Mathiơ 26:26-29
“Na đơ̆ng sơ̆ truh năr Sư jur ning-mônh rim wơ̆t bơ̆n huch sa đak păng ‘bĕng ‘noh, wă khan bơ̆n pơm tơ’bôh kơ đe tơdrong Sư lôch tang bơ̆n.” (I Kôrintô 11:26)
Nơ̆r jet tơchĕng pơwao:
– Kră Yang Yêsu đei pơjing phĕt Huch Sa Pơgơ̆p thoi yơ?
– ‘Bĕng mi păng đak hơ mu Kră Yang ăn kơ bơngai pơhrăm păng Sư wă pơma tơdrong gĭt kiơ?
– Ahrei âu, lu bơ̆n iŏk Huch Sa Pơgơ̆p hăm jơhngơ̆m thoi yơ?
Đơ̆ng rŏng kơ iŏk ‘bĕng mi Kră Yang ăn, na Juđa lĕch hloi tơ’nguaih ei măng mu yua kơ ‘năr mơ̆t bơih (Yôhan 13:30). Kră Yang Yêsu păng mơjĭt mônh ‘nu jơ̆ng ‘bang Sư oei akŭm ’blŏk kơ Phĕt Năm Brih.Lăm năr Phĕt âu, Kră Yang đei pơjing minh tơdrong Phĕt ‘nao lăm tơdrong pơgơ̆p ‘nao, noh bơih Phĕt ‘Lơ̆ng tơdrong Huch Sa Pơgơ̆p. Kơplah ăn ‘bĕng mi păng đak hơmu kơ lu bơngai pơhrăm păng Sư kiơ̆ tơdrong juăt Phĕt Năm Brih, Kră Yang đei pơjing minh tơdrong gĭt phara:
Iŏk ‘bĕng mi phĕ na tơ’blŏk akâu jăn Kră Yang pơchah yua kơ tơdrong yoch lu bơ̆n. Kră Yang khan kơ lu bơngai ;pơhrăm păng Sư: “ Iŏk sa ‘bĕng âu bĕ wă pơma khan rim ‘nu kơ lu bơ̆n sơng iŏk tơdrong gleh pơmat Kră Yang yua kơ tơdrong yoch bơ̆n kơdih” (trong 26). Sư iŏk dơ̆ng minh pôm kơ chŏk đak hơmu păng khan đak hơmu âu bơih “ pham Inh”, pham lăm tơdrong pơgơ̆p ‘nao wă lĕch tang ăn kơ lơ bơngai, na ‘Bok Kei-Dei pơklaih bơ̆n đơ̆ng tơdrong yoch (trong 27-28). Tơdrong pơgơ̆p ‘nao jơ̆ tơdrong ‘mêm ăn đĕch jơ̆ tơdrong Kră Yang Yêsu wă pơkeh tơ’long pơglang. Rim bơngai mưh oei lăm tơdrong pơgơ̆p âu gô mơnat tơdrong yoch. Hăm tơdrong pơgơ̆p so jơ̆ tơdrong pơgơ̆p lăm tơdrong juăt, kon bơngai gơh klaih đơ̆ng tơdrong yoch noh đơ̆ng pham sem dơrong, păng pơm pơlơ̆k pơle lăm chăl arih. Lăm tơdrong pơgơ̆p ‘nao “Yêsu mơ̆t bơih hnam ei truh tơ anih giĕng tih hloi. Sư mơ̆t soi minh ‘măng đĕch tôm hloi kơ tơdrong soi bơih yua kơ Sư soi hăm pham Sư kơdih. Ưh kơ sĭ Sư soi hăm pham bơbe pham rơmo ôh. Sư soi thoi noh đĕch, na bu wă gơnang kơ tơdrong Sư soi noh, bơngai noh gô klaih hloi kơ tơdrong yoch”. Kră Yang khan: “Huch bĕ đĭ đăng kơ iĕm wă khan rim ‘nu athei sơng iŏk tơdrong dŏng pơklaih đơ̆ng Kră Yang chu lôch tang yua kơ tơdrong yoch bơ̆n.
Hlôi đơ̆ng tơdrong Huch sa Pơgơ̆p noh bơih đơ̆ng Kră Yang pơjing, lu bơ̆n kư̆m ‘bôh tơdrong chang hơmĕng lăm lu bơngai oei lăm tơdrong ‘mêm Kră Yang ăn đĕch, noh bơih gô Huch đak hơmu ‘nao hơdai Kră Yang tơ Dêh Char Sư pal plĕnh (trong 29) wă khan lu đe bu mă oei lăm tơdrong tơ’bưh hăm Kră Yang na gô oei hơdai Sư kơplah Sư jur ning mônh. ‘Nâu bơih tơdrong pơsĭt tơpă kơ lu đe bu mă oei lăm tơdrong pơgơ̆p ‘nao.
Ahrei âu rim năr tơpơh giĕng blŭng a lăm khei mưh bơ̆n akŭm Huch Sa Pơgơ̆p, mưh iŏk ‘bĕng mi păng đak hơmu, lu bơ̆n hăm đei tơchĕng kiơ dah mă juăt kơ akŭm kiơ̆ kơ tơdrong juăt lăm hnam akŭm đĕch? Athei bơnê kơ Kră Yang yua kơ Sư lôch tang tơdrong yoch lu bơ̆n, na lu bơ̆n gơh klaih đơ̆ng tơdrong yoch păng đei tơdrong arih ling lang. Akâu jăn Kră Yang pơchah păng pham Sư lĕch yua kơ tơdrong yoch kon bơngai păng tơdrong yoch lu bơ̆n. Lu bơ̆n athei hiơ̆k tơ’bưh hăm lu ‘nhŏng oh hơdai đon lui. Kră Yang Yêsu lôch wă pơm ‘long sơlam ‘Bok Kei-Dei hăm kon bơngai. Na Kră Yang kư̆m wă kơ lu bơ̆n hiơ̆k tơiung, mơnat, păng pơhiôk dih băl. Klaih kơ noh, rim ‘nu kơ lu bơ̆n pơm tơ’bôh kơ đe tơdrong Sư lôch tang bơ̆n
I Kôrintô 11:26).
Ơ Kră Yang mă ‘mêm, inh bơnê kơ Ih đei pŭ iŏk tơdrong gleh păng tuh pham dŏng pơklaih inh. Apinh Ih tơgŭm inh rai ‘mêm kơ Ih hloh, pơm tơ’bôh kơ đe tơdrong Ih lôch tang lu nhôn ding truh Ih jur ning mônh.Krao khan yua Anăn Yêsu Krist, Amen.
Lu bơ̆n tơchĕng gah tơdrong kiơ kơplah lu bơ̆n akŭm Huch Sa Pơgơ̆p?
Đŏk Sơ̆p Hla bơar ‘Bok Kei-Dei lăm pêng sơnăm: Jop 13
Kênh Youtube BHKTHN:
