Tơdrong Pơđơ̆k 28:1
Lu bơngai pơm kơnê̆ kơdâu ôn mă ưh kơ đei bu druh. Mă-lei lu bơngai oei arih tơpăt nuih thoi dămbrang.” (Tơdrong Pơđơ̆k 28:1)
Nơ̆r jet tơchĕng pơwao:
– Tơdrong kiơ pơm kơ bơngai kơnê̆ arih lăm tơdrong hli tơrơ mă khan ưh tam mă đei tơdrong hli krê ơpă ră?
– Tơdrong tơ’bưh trŏ hăm ‘Bok Kei-Dei ba ăn tơdrong pơ̆n nuih thoi yơ lăm tơdrong arih rim năr?
– Lu bơ̆n ‘bôh lui kơ Kră Yang păng arih pơ̆n nuih lăm tơdrong ayơ?
Nơ̆r lăm Pơđơ̆k ‘nâu đei tơ’bôh kơ tơdrong ưh kơ lei lăi hơđăl dêh lăm tơdrong ưh kơ đei hơđơ̆ng gah tơdrong tơchĕng lu bơngai pơm kơnê̆ hăm tơdrong hơđơ̆ng gah tơdrong tơchĕng lu bơngai pơm ‘lơ̆ng tơpăt. Tơdrong hli hlơt đơ̆ng bơngai ayăt kơ ‘Bok Kei-Dei pơtih thoi lu bơngai năm tơblah dah kơdâu kơ đao hơlă, pơ̆k mă ưh kơ đei bu druh (Lêwi 26:17, 36). Bơngai kơnê̆ ling lang arih hăm jơhngơ̆m ưh kơ hơđơ̆ng, tơdrong tơchĕng ưh kơ hơđơ̆ng: Lu sư ling lang hli hlơt yua kơ tơdrong pơm rŭng răng tơ lăm jơhngơ̆m. Tơdrong yoch ataih đơ̆ng ‘Bok Kei-Dei jing đei tơdrong hiơ̆k tơchĕng păng ưh kơ hơđơ̆ng yua kơ hli kơ tơdrong Kră Yang sek tơlang.
Tơplơ̆ dơ̆ng, bơngai ‘lơ̆ng tơpăt – lu bơngai yak năm hăm ‘Bok Kei-Dei, arih tơpăt tơpă – đei pơtih thoi “Pran Kơtang thoi Dăm Brang” (trong 1). Tơdrong hơđơ̆ng lăm jơhngơ̆m đơ̆ng bơngai ‘mêm kơ Kră Yang păng bơ̆jang tơgŭm khul tơpôl đei pơtih gia hơđăl dêh thoi kon “Dăm brang, pran kơtang hloh kơ đĭ đăng lu sem brem”. (Tơdrong Pơđơ̆k 30:30). Sư ưh kơ kơdŭn ôh sư wă rôp châu lu sem brem nai wă blah sư thoi noh sư ưh kơ đei hli ôh. Tơdrong pran kơtang đơ̆ng bơngai ‘lơ̆ng tơpăt ưh kơ lĕch đơ̆ng tơdrong pran kon bơngai ôh, na đơ̆ng lăm jơhngơ̆m ‘lơ̆ng rơgoh păng tơdrong tơ’bưh trŏ hăm ‘Bok Kei-Dei. Kơplah bơ̆n arih chu yom păng lui gơnang kơ Kră Yang, pơm kơ bơ̆n rơngei đơ̆ng tơdrong hli hlơt. Bơ̆n gơh dơ̆ng kơjăp, pơma tơpăt, păng arih pơ̆n nuih, yua kơ băt ‘Bok Kei-Dei oei hơdai bơ̆n ling lang.
Jing Bơngai Lui tơdrong tơpăt bơ̆n đei dan tơ hơnă lăm Kră Yang Yêsu Krist. Đơ̆ng Sư na Sư gơh mơnat ăn tơdrong yoch bơ̆n păng gơh jô̆ ‘lơ̆ng tơpăt ‘bơ̆t anăp ‘Bok Kei-Dei. Kơlih kơ thoi noh, athei bơ̆n arih ‘lơ̆ng tơpăt rim năr, wă khan rơih iŏk tơdrong arih ‘lơ̆ng tơpăt, hăm đon lui kơ Kră Yang păng chu nơ̆r Sư. Bơ̆n tơpăt tơpă lăm tơdrong jang, tơpăt lăm tơdrong tơ’bưh dih băl, kơjăp lăm Kră Yang lăm tôm tơdrong. Kơplah noh, ‘Bok Kei-Dei ăn kơ bơ̆n pơ̆n nuih wă tơ’bưh hăm tơdrong pơlong tơblah hăm tơdrong pơhlŭ, păng pran kơtang pơm kơdranh kơ Kră Yang. Nơ̆r Kră Yang pơkă kơ bơ̆n: “Bơngai tơpăt nuih pran thoi dăm brang.” (trong 1). Rim ‘nu kơ bơ̆n athei lăng ming lăm jơhngơ̆m bơ̆n dang ei, dah lăm bơ̆n oei đei tơdrong kiơ pơm kơ bơ̆n oei hli tơrơ dah ưh kơ hơđơ̆ng, athei roi kơ Kră Yang lăm tơdrong tơbral. Athei iung bĕ yak năm lăm tơdrong tơpăt Kră Yang, păng krao khan apinh Sư ăn tơdrong pran kơtang thoi dăm brang.
Ơ Yang ‘Bă mă tih hloh, bơnê kơ Ih đei krao athei inh arih ‘lơ̆ng tơpăt đơ̆ng Kră Yang Yêsu Krist. Apinh Ih sŭt rơgoh jơhngơ̆m inh klaih đơ̆ng tơdrong yoch păng iŏk lê̆ tơdrong hli tơrơ. Apinh Ih ăn kơ inh pơ̆n nuih wă kơ inh dơ̆ng kơjăp lăm tơdrong lui, yak năm lăm tơdrong chu yom, păng arih pơ̆n nuih wă ư-ang kơ Ih. Krao khan yua anăn Kră Yang Yêsu Krist, Amen.
Bơ̆n kăl kơ tơplih tơdrong kiơ wă kơ gơh arih nuih pran thoi dăm brang?
Đŏk Sơ̆p Hla ‘Bok Kei-Dei lăm pêng sơnăm: Jop 8
Kênh Youtube BHKTHN:
https://www.youtube.com/c/bhkthn
