Klei Aê Diê Blŭ: Klei Bi Hriêng 28:1
Êlan kliăng: “Mnuih ƀai đuĕ wăt tơdah amâo mâo pô tiŏ ñu ôh, ƀiădah phung kpă dôk jhŏng msĕ si êmông gu.” (Klei Bi Hriêng 28:1)
Klei êmuh ksiêm mĭn: Ya klei ngă kơ phung ƀai hdĭp hlăm klei huĭ wăt tơdah amâo mâo klei jŭ jhat sĭt ôh? Si klei bi mguôp djŏ hŏng Aê Diê ba hriê klei jhŏng hlăm klei hdĭp grăp hruê? Hlăm ya mta klei brei drei knang kơ Khua Yang leh anăn hdĭp mâo klei jhŏng hĭn?
Êlan klei bi hriêng anei bi êdah klei mdê klă snăk kơ klei amâo hơĭt hlăm ai tiê phung ƀai hŏng klei hơĭt ai tiê phung kpă. Klei huĭ phung bi kdơ̆ng hŏng Aê Diê duah bi mĭn mă dưi bi msĕ hŏng phung kahan amâodah hlô mnơ̆ng êran đuĕ wăt tơdah amâo mâo pô roh amâodah mnơ̆ng hiu loa tiŏ diñu ôh (dlăng Bruă Lêwi 26:17, 36). Ai tiê kpă phung ƀai amâo tuôm mâo klei hơĭt ôh, klei mĭn diñu mâo klei huĭ nanao kyuadah klei soh ba hriê klei bi rŭng hlăm ai tiê diñu. Klei soh leh anăn klei klah đuĕ kbưi mơ̆ng Aê Diê ba hriê klei uêñ hnĭng leh anăn klei rŭng răng kyuadah huĭ kơ klei Aê Diê phat kđi.
Ƀiădah phung kpă – jing phung êbat mbĭt hŏng Aê Diê, hdĭp hŏng klei kpă ênô dưi bi msĕ “dôk jhŏng msĕ si êmông gu” (êlan 1). Klei êđăp ênang hlăm ai tiê mnuih khăp kơ Khua Yang leh anăn mă bruă kơ phung ƀuôn sang dưi bi hmô klă jing msĕ si sa drei “êmông gu jing hlô ktang hĭn kơ jih jang hlô” (Klei Bi Hriêng 30:30). Ñu srăng mă hlei pô kdơ̆ng ngă kơ ñu kyuanăn ñu amâo mâo klei huĭ ôh. Klei jhŏng ktang mnuih kpă amâo kbiă hriê mơ̆ng ai ktang anak mnuih pô ôh, biădah kbiă hriê mơ̆ng ai tiê kpă doh jăk leh anăn mơ̆ng klei bi mguôp djŏ hŏng Aê Diê. Tơdah drei hdĭp hlăm klei gưt asăp leh anăn đăo kơ Khua Yang, Ñu srăng bi êngiê drei mơ̆ng klei huĭ. Drei srăng dôk kjăp, hưn klei sĭt nik, leh anăn hdĭp hŏng klei jhŏng, kyuadah drei thâo Khua Yang dôk mbĭt hŏng drei nanao.
Jing phung đăo kơ Krist, brei drei mdơ̆ng atur klei kpă ênô drei ti dlông Khua Yang Yêsu Krist. Hlăm Ñu, drei mâo klei pap brei kơ klei soh leh anăn mâo klei yap kpă ti anăp Aê Diê. Kyuanăn mâo klei mtă brei drei hdĭp hlăm klei kpă ênô grăp hruê, čiăng lač ruah hdĭp kpă ênô, hdĭp hŏng klei đăo kơ Khua Yang leh anăn gưt asăp Ñu. Drei kpă ênô hlăm bruă mă, kpă ênô hlăm jih jang klei bi mguôp, đăo kjăp kơ Khua Yang hlăm jih jang klei truh. Hlăk anăn, Aê Diê srăng brei kơ drei klei jhŏng čiăng drei bi tlă anăp hŏng klei lông dlăng, bi kdơ̆ng hŏng klei mplư, leh anăn jhŏng hưn Anăn Khua Yang. Klei Khua Yang ƀuăn kơ drei, “phung kpă dôk jhŏng msĕ si êmông gu.” (êlan 1). Brei grăp čô drei ksiêm dlăng bĕ kơ ai tiê drei pô hruê anei, tơdah hlăm drei ăt dôk mâo klei ngă kơ drei huĭ leh anăn amâo mâo klei hơĭt ôh, hưn bi êdah bĕ kơ Khua Yang hŏng klei kmhal kơ klei soh. Kgŭ bĕ êbat hlăm klei sĭt nik Khua Yang leh anăn akâo kơ Ñu brei klei jhŏng msĕ si êmông gu.
Ya klei čiăng drei bi mlih hĕ čiăng kơ drei dưi dôk jhŏng msĕ si êmông gu?
Wah lač: Ơ Ama hlăm adiê ơi, bi mni kơ Ih iêô leh kâo brei hdĭp kpă ênô hlăm Khua Yang Yêsu Krist. Bi doh bĕ ai tiê kâo mơ̆ng klei soh leh anăn mă hĕ jih jang klei huĭ. Brei bĕ kơ kâo mâo klei jhŏng čiăng kơ kâo dôk kjăp hlăm klei đăo, êbat hlăm klei gưt asăp, leh anăn jhŏng hdĭp čiăng bi guh kơang kơ Anăn Ih. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Yôp 8
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
