Klei Aê Diê Blŭ: Klei Mphŭn Dơ̆ng 13:1-13
Êlan kliăng: “Y-Lot dôk hlăm ƀuôn prŏng hlăm Lăn Dap, leh anăn ñu bi mđuĕ anôk sang čhiăm ñu nao truh ti ƀuôn Sôdôm. Phung mnuih ƀuôn Sôdôm măk ƀai leh anăn ngă soh prŏng snăk hŏng Yêhôwa” (Klei Mphŭn Dơ̆ng 13:12b-13)
Klei êmuh ksiêm mĭn: Y-Lot ruah lăn, ti hnơ̆ng čoh čuăn ñu yua? Klei ruah anăn bi êdah ya klei kơ klei Y-Lot jing? Ya klei hriăm drei mâo mơ̆ng klei ruah anei?
Leh sui thŭn hiu mbĭt leh anăn tŭ klei awa ñu rông ba, ară anei Y-Lot leh anăn Y-Abram srăng bi mbha lăn dôk čiăng jing jăk kơ diñu dua. Y-Abram čŏng čiăng dưm klei tŭ dưn kơ amuôn ñu jing êlâo hĭn, hŏng klei brei ruah kdrêč lăn gơ̆ čiăng. Tui si djŏ tơdah mâo klei brei ruah, Y-Lot ăt mĭn kơ awa ñu mơh êlâo hĭn. Ƀiădah hơăi, Y-Lot mă mtam mmông găl leh anăn čuăn ruah kdrêč lăn ñu mĭn jing tŭ dưn hĭn kơ ñu. Y-Lot ruah kơ ñu pô jih lăn dap êa krông Yurdan tĭng ngŏ kyuadah “Y-Lot kngưr ală dlăng kơ jih lăn dap êa krông Yurdan truh kơ Ƀuôn Sôar, djăp anôk mâo êa sơăi, jing msĕ si war djam Khua Yang, msĕ si čar Êjip. Ka Khua Yang bi rai ôh ƀuôn Sôdôm leh anăn ƀuôn Gômôrơ” (êlan10). Sĭt nik, jưh ti klei buh pla, rông hlô mnơ̆ng anei jing klei ruah jăk hĭn, kyuadah lăn krĭng anei jing lăn jăk jing msĕ si war Êđen ênuk đưm amâodah msĕ si lăn dap ti čar Êjip. Ƀiădah lĕ, klei Y-Lot ruah knŏng jưh ti dlông klei tŭ dưn klei duah ƀơ̆ng huă amâo uêñ mĭn ôh kơ klei hdĭp myang leh anăn klei ênuah ênô phung mnuih krĭng anăn. Y-Lot nao dôk ti ƀuôn Sôđôm, Klei Aê Diê Blŭ brei thâo: “Phung mnuih ƀuôn Sôdôm măk ƀai leh anăn ngă soh prŏng snăk hŏng Yêhôwa” (êlan 13).
Klei Y-Lot ruah bi êdah kơ ñu jing sa čô mnuih duah klei tŭ dưn ti anăp êlâo hĭn. Hdră êlan ñu hdĭp jing knŏng kna ti klei ală ñu ƀuh amâo djŏ kna ti klei đăo ôh. Y-Lot kăn uêñ rei Aê Diê mơak mơ̆ kơ klei ñu ruah anăn amâodah hơăi. Năng ai ñu mĭn klei nao dôk hlăm ƀuôn Sôđôm anăn amâo djŏ klei ngă soh ôh khă bi gŏ sang ñu răng kriê diñu pô, amâo hlue ngă ôh klei soh phung hlăm ƀuôn. Ƀiădah ñu amâo thâo ôh nao dôk hlăm ƀuôn Sôđôm jing klei tŭ ư kơ klei dôk mbĭt hŏng phung soh jhat. Klei čuăn ngă anăn tui si Y-Lot mĭn jing klei jăk jĭn ƀiădah tui si hnơ̆ng čuăn mơ̆ng Klei Aê Diê Blŭ klei anăn jing amâo djŏ ôh: “Jăk mơak yơh mnuih amâo êbat ôh tui si klei phung ƀai kčĕ, kăn dôk rei hlăm êlan phung soh, kăn dôk gŭ rei mbĭt hŏng phung mưč.” (Klei Mmuñ Hđăp 1:1).
Lu mnuih hruê anei ăt mâo mơh klei čuăn ruah hlăm klei hdĭp jing msĕ si Y-Lot mphŭn dô. Klei tŭ dưn kơ mnơ̆ng mnuă tĭng čêč kdrêč ƀiădah klei tŭ dưn kơ mngăt amâo dlăng yuôm ôh. Drei msĕ mơh mâo lu blư̆ drei mâo klei čuăn ngă kơ klei hdĭp drei tui si klei ală ƀuh ƀiădah wơr bĭt hĕ si klei čuăn ngă anăn bi hmăi kơ klei hdĭp myang drei pô leh anăn klei hdĭp myang phung anak čô drei. Akâo Khua Yang đru drei knang kơ Ñu nanao leh anăn thâo răng hlăm jih jang klei drei čuăn ruah.
Drei khăng čuăn ngă kyua klei tŭ dưn kơ klei hdĭp myang hĕ amâodah kyua klei tŭ dưn kơ mnơ̆ng mnuă?
Wah lač: Ơ Khua Yang, kâo thâo kral anôk kƀah kâo, akâo Khua Yang pap brei leh anăn đru kâo thâo săng dôk hlăm Ih leh anăn mâo klei Ih mơak yơh jing klei jăk jĭn prŏng hĭn brei kâo tui duah, leh anăn jing atur kơ jih jang klei kâo čuăn ngă hlăm klei hdĭp kâo. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Malaki 3-4
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
