Klei Aê Diê Blŭ: I Kôrantô 13:4-7
Êlan kliăng: “Klei khăp tŭ jih, đăo jih, čang hmăng jih, gĭr jih” (I Kôrantô 13:7)
Klei êmuh ksiêm mĭn: Si ngă gŏ sang jing anôk brei grăp čô dôk hdĭp thâo bi khăp? Ya jing atur čiăng gŏ sang dôk hdĭp kpă ênô leh anăn thâo khăp hŏng klei djŏ? Ya klei tŭ dưn kơ gŏ sang dôk hdĭp ti dlông atur kpă ênô leh anăn thâo bi khăp?
Gŏ sang dôk hdĭp kpă ênô jing gŏ sang hŏng jih ai tiê khăp kơ Khua Yang leh anăn mă bruă kơ Ñu. Ƀiădah čiăng kơ gŏ sang dôk sĭt suôr hlăm knhuah hdĭp kpă ênô, snăn brei grăp čô hlăm gŏ sang bi mguôp suôr tliêr hŏng klei khăp. Kƀah klei khăp snăn srăng kƀah klei ktang čiăng kơ gŏ sang dôk hdĭp kpă ênô. Khua Yang dưm drei êlâo hĭn hlăm gŏ sang. Anei yơh jing anôk hriăm mjuăt kơ knhuah hdĭp thâo bi khăp, êlâo kơ kbiă nao mŭt hlăm sang hră klei hdĭp. Ƀiădah lĕ, anak mnuih tơdah leh ngă soh jing leh phung čuôt klih, hrô kơ thâo bi khăp, snăn jing phung uêñ mĭn klei tŭ dưn kơ pô hĭn kơ mnuih mkăn. Hlăm gŏ sang, tơdah amâo khăp djŏ tui si Klei Aê Diê Blŭ mtô, snăn gŏ sang srăng lĕ, kyua knuih čuôt klih mâo leh hlăm grăp čô.
Hlăm I Kôrantô 13:4-7, drei ƀuh atur čiăng kơ gŏ sang dôk hdĭp kpă ênô leh anăn thâo khăp bi djŏ. Tal sa, “Klei khăp thâo gĭr leh anăn bŏ hŏng klei jăk;” (êlan 4a). Klei Aê Diê Blŭ mtô kơ amĭ ama, phung anak brei thâo bi tŭ gĭr, bi jang hdơ̆ng pô, čiăng tlaih kơ klei mneh msao amâo năng mâo. Tal dua, “klei khăp amâo nač amâodah bi mđĭ ñu pô; ñu amâo mgao,” (êlan 4b). Ai tiê nač, bi mđĭ pô, mgao ngă kơ phung mnuih anei khăp bi mkă lu ƀiă, đŭt dlông hŏng mnuih mkăn, leh anăn ai tiê nač yơh jing phŭn knhal bi rai klei bi mguôp sa hlăm gŏ sang, mbĭt anăn knuih bi mđĭ pô, knuih mgao srăng atăt kơ klei dluh lĕ hlăm klei hdĭp. Tal tlâo, “amâodah ngă klei wê ôh. Klei khăp amâo duah klei tŭ dưn kơ ñu pô ôh; ñu amâo djăl ăl amâodah đing kơ klei jhat ôh;” (êlan 5). Amâo dưi tlaih ôh kơ klei amâo thâo bi djŏ ti krah ung mô̆, hdơ̆ng phung anak. Ƀiădah lĕ, brei bi mĭn snei, gŏ sang dôk hdĭp kpă ênô jing gŏ sang bi thâo săng brei, thâo bi pap brei hdơ̆ng pô. Grăp čô brei lui hĕ klei ăl phĭ đuôm ai hlăm ai tiê, kyuadah klei anăn yơh pŏk klei myun kơ yang jhat ksŭng ngă kơ gŏ sang drei. Tal pă, “ñu amâo mơak ôh hŏng klei amâo kpă, ƀiădah ñu mơak hŏng klei sĭt nik. Klei khăp tŭ jih, đăo jih, čang hmăng jih, gĭr jih” (êlan 6-7). Gŏ sang dôk hdĭp kpă ênô leh anăn thâo bi khăp mâo klei hơ̆k mơak nanao hlăm klei sĭt nik jing Klei Aê Diê Blŭ. Grăp čô hlăm gŏ sang hmiêt mkăp săn asei mlei kơ hdơ̆ng pô, bi pap brei, bi đru, bi mđĭ ai hlăm klei kkuh mpŭ, hriăm Klei Aê Diê Blŭ leh anăn bi mguôp hŏng Khua Yang.
Tơdah gŏ sang drei dôk hdĭp hlăm atur klei kpă ênô leh anăn klei khăp, snăn srăng dưi găn gao jih klei lông dlăng hlăm klei hdĭp, mbĭt anăn dưi bi ktlă mtrang klei khăp Khua Yang kơ phung riêng gah msĕ si klei Khua Yang Yêsu mtô: “Hŏng klei anei jih jang mnuih srăng thâo kơ diih jing phung ƀĭng kna Kâo, tơdah diih bi khăp hdơ̆ng diih pô.” (Y-Yôhan 13:35).
Si gŏ sang drei bi êdah klei thâo bi khăp hlăm gŏ sang kơ phung riêng gah ƀuh?
Wah lač: Ơ Khua Yang, kâo thâo kâo mâo lu klei kƀah hlăm klei hdĭp. Akâo Khua Yang thiăm klei ktang kơ kâo, bi hriăm kâo hdĭp kpă ênô leh anăn thâo bi khăp hlăm gŏ sang, čiăng kơ lu mnuih thâo kral Khua Yang mơ̆ng gŏ sang kâo. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Sakari 12
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
