Tơdrong Pơđơ̆k 16:6
“Đơ̆ng ‘mêm băt sĭt tơdrong yoch gơh klaih; Đơ̆ng hli yom kơ Kră Yang na gơh weh đơ̆ng tơdrong kơnê̆.” (Tơdrong Pơđơ̆k 16:6)
Nơ̆r jet tơchĕng pơwao:
– Dôm lu tơdrong ayơ ba truh tơdrong mơnat păng ‘lơ̆ng rơgoh?
– Pơm thoi yơ wă kơ gơh iŏk dôm tơdrong ‘nâu?
Nơ̆r ‘Bok Kei-Dei lăm hla bơar Tơdrong Pơđơ̆k năr ‘nâu lăm trong 1 păng trong 9, chăl trong đei bơtho gah tơdrong hơmet păng tơdrong kơnhăm lăm tơdrong ‘Bok Kei-Dei pơgơ̆r. Trong 4 bơtho khan Kră Yang ‘Bok Kei-Dei pơjing tôm tơdrong ăn kơ sư kơdih dôm tơdrong tơdă, hơmet đơ̆ng Kră Yang păng đĭ dôm tơdrong tơdă Sư dŏng pơklaih ‘măn kơ kon bơngai tă kơ đei tơdrong kơnhăm ưang kơ Sư ngăl (Tơdrong Tơ’bôh 4:11).
Dah ‘Bok Kei-Dei tơ’bưh hăm kon bơngai lăp hăm tơdrong ‘lơ̆ng rơgoh păng tơpăt tôm tơdrong lei na ưh kơ đei bu gơh klaih đơ̆ng tơdrong phak. Bơnê kơ Kră Yang, đơ̆ng Kră Yang Yêsu, kon bơngai gơh klaih đơ̆ng tơdrong ‘Bok Kei-Dei sek tơlang yua kơ tơdrong yoch bơ̆n, păng tơdrong Sư phak hăm kon bơngai ưh kơ sĭ tuch luch. Lăm tơdrong ‘lơ̆ng rơgoh păng tơpăt! ‘Bok Kei-Dei oei tơ’bôh đĭ “Tơdrong gơh tơgŭm păng tơpăt tơpă”, wă khan yua kơ tơdrong ‘mêm păng yua kơ tơdrong tơpăt tơpă hăm Kră Yang – tơpăt sĭt gah kơdih Kră Yang – Sư đei dah hơmet lê̆ minh tơdrong tơdă tơdrong dŏng pơklaih ‘măn kơ bơngai hiong răm adrol kơ teh đak đei pơjing, đơ̆ng tơdrong Kon Sư chu lôch (I Pêtrôs 1:18-20).
Jơhngơ̆m hli yom kơ Kră Yang ‘Bok Kei-Dei noh jơ̆ minh tơdrong hli yom lui ngeh kơ ‘Bok Kei-Dei, noh tơdrong mă khan Sư âu bu, na đei tơdrong pơjing tơ’bưh hăm ‘Bok Kei-Dei noh đơ̆ng Kră Yang Yêsu kư̆m thoi tơdrong iŏk đon ala chu kiơ̆ hăm dôm nơ̆r Kră Yang tơtă. Păng tơdrong âu lăp lu bơngai băt kơnăl păng hlôi mơn đơ̆ng tơdrong ‘Bok Kei-Dei dŏng pơklaih ăn kơ bơ̆n yua kơ đơ̆ng “Tơdrong gơh hơgei păng tơpăt tơpă” đơ̆ng ‘Bok Kei-Dei lei bơngai noh gô arih “gơh tơgŭm păng tơpăt tơpă” hăm bơngai nai. ‘Lơ̆ng dêh kơplah bơ̆n băt bơ̆n kơdih đei jơhngơ̆m pran mah gơh dŏng pơklaih kơdih, wă khan kĕ jei đơ̆ng tơdrong yoch đơ̆ng bơngai nai pơm kơ bơ̆n yoch. Tơdrong yoch noh minh tơdrong pơm pơrăm hai pơm ưh kơ ‘lơ̆ng hai mơ̆n, pơm jing đei tơdrong ưh kơ hiôk lăm kon bơngai. Tơdrong ưh kơ hiôk noh pơih tơdrong blĕk lăm jơhngơ̆m bơngai mă đe pơrăm. Mă khan lei ră, tơdrong blĕk lăm bơngai mă đei tơdrong trŏ kơ blĕk gơh pơm rơngơp hăm “tơdrong gơh tơgŭm păng tơpăt tơpă”. ‘Bok Pêtrôs bơtho khan: “Mă loi bơ̆n ‘nĕ hiơt kơ tơdrong ‘mêm mơnat, dah bơ̆n ‘mêm mơnat dih băl bơ̆n huay kơ jô̆ yo kơ tơdrong yoch bôl buăl ôh.” (I Pêtrôs 4:8).
Lăm tơdrong hơ’mon đĭch đam ưh kơ băt mơnat (Mathiơ 18:23-35). Kră Yang Yêsu bơtho hơđăl khan jơhngơ̆m hli yom păng mơnat. Lăng bơ̆n kư̆m ngăl krao khan kiơ̆ nơ̆r Kră Yang Yêsu bơtho: “Apinh Ih ‘nĕ jô̆ yo kơ nhôn, thoi nhôn ưh kơ jô̆ yo kơ đe pơm yoch păng nhôn.” (Mathiơ 6:12). Thoi noh athei tơ’bôh bĕ tơdrong ‘mêm Kră Yang ăn kơ ‘nhŏng oh bơ̆n hăm tơdrong arih mơnat păng ‘lơ̆ng rơgoh.
Ơ Kră Yang, inh bơnê kơ Ih gah tơdrong Ih dŏng pơklaih ăn kơ inh hăm tơdrong băt bơnê păng tơdrong mơnat ăn. Inh pơkă tơ’bôh tơdrong ‘mêm Ih kơ lu bơngai jum dăr kơ inh hăm tơdrong arih mơnat păng ‘lơ̆ng rơgoh. Krao khan yua anăn Kră Yang Yêsu Krist, Amen.
Bơ̆n arih oei pơm tơ’bôh tơdrong mơnat păng ‘lơ̆ng rơgoh thoi yơ?
Đŏk Sơ̆p Hla bơar ‘Bok Kei-Dei lăm pêng sơnăm: Hơriso 119:1-56
Kênh Youtube BHKTHN:
