Klei Aê Diê Blŭ: II Y-Pêtrôs 1:3-4
Êlan kliăng: “Klei myang Aê Diê brei leh kơ drei jih jang klei djŏ kơ klei hdĭp leh anăn kơ klei thâo mpŭ kơ Aê Diê, hlăm klei thâo kral Pô iêô leh drei kơ klei guh kơang leh anăn klei jăk Ñu pô” (II Y-Pêtrôs 1:3)
Klei êmuh ksiêm mĭn: Mơ̆ng klei thâo kral Aê Diê mdê mdê, Aê Diê mprăp brei leh leh anăn brei kơ drei ya klei? Si Aê Diê čiăng phung ƀuôn sang Ñu hdĭp tơdah mă tŭ klei jăk mơak hlăm mngăt anăn? Ya klei brei drei ngă čiăng mă tŭ klei Aê Diê ƀuăn?
Khua ƀĭng kna Y-Pêtrôs lač klă tơdah drei thâo kral Aê Diê hŏng klei mdê mdê jing “Pô iêô leh drei kơ klei guh kơang leh anăn klei jăk Ñu pô”, snăn Aê Diê mprăp leh leh anăn brei “jih jang klei” kơ mngăt phung drei brei mâo, anăn jing “klei hdĭp leh anăn klei huĭ mpŭ”. “Jih jang klei” tinei jing bŏ, êbeh dlai. Tal sa, Khua Yang brei kơ drei klei bi mtlaih mơ̆ng klei djiê leh anăn klei Khua Yang Yêsu kbiă lŏ hdĭp, čiăng kơ drei đăo leh anăn mâo klei hdĭp hlŏng lar leh anăn klei hdĭp jăk mơak. Tal dua, Yang Mngăt Jăk ăt jing Pô brei klei ktang čiăng kơ phung đăo kơ Khua Yang găn djăp klei dleh dlan, lông dlăng, djă pioh klei huĭ mpŭ kơ Aê Diê hriê kơ prŏng hlăm klei đăo (êlan 3). Brei drei hdơr, Aê Diê “brei leh kơ drei jih jang klei djŏ kơ klei hdĭp leh anăn kơ klei thâo mpŭ kơ Aê Diê” čiăng kơ drei hdĭp doh jăk leh anăn hdĭp mơak hŏng Khua Yang grăp hruê.
Pô guh kơang leh anăn jăk mprăp leh leh anăn brei leh ya klei prŏng prĭn anăn kơ drei, kyua anăn Khua Yang ăt čiăng kơ phung ƀuôn sang Ñu brei “tlaih mơ̆ng klei rai luč hlăm lăn ala kyua klei tluh” ƀiădah dưn sa klei hdĭp amâo mâo klei soh leh anăn klei čhŏ mrŏ lăn ala kă ôh, hdĭp sa klei hdĭp doh jăk čiăng “dưi jing phung mă tŭ knuih Aê Diê”, ƀrư̆ hruê jing msĕ si Khua Yang Yêsu hĭn (êlan 4). Klei anei lač kơ sa boh sĭt jing drei dôk hdĭp dŭm thŭn mlan hlăm lăn ala anei, snăn jih thŭn mlan anăn drei srăng tlă anăp hŏng klei tluh, klei mplư mơ̆ng klei soh. Ƀiădah tơdah drei păn kjăp klei Aê Diê ƀuăn, krơ̆ng kjăp klei đăo hŏng klei huĭ mpŭ, snăn drei mâo Yang Mngăt Jăk mtô, răng mgang leh anăn thiăm klei ktang čiăng dưi ti anăp klei tluh mơ̆ng klei mplư. Mbĭt anăn, bruă Aê Diê mprăp leh kơ drei klei hdĭp leh anăn klei huĭ mpŭ, mñă kơ drei amâo mgao bi mĭn pô djăp klei thâo čiăng djă pioh klei đăo leh anăn klei dưi hŏng klei mplư, ƀiădah srăng gưt kơ Yang Mngăt Jăk čiăng kơ Ñu thiăm klei ktang leh anăn đru grăp hruê hlăm klei hdĭp hŏng Khua Yang.
Hdră čiăng kơ drei mă tŭ klei Aê Diê mprăp leh anăn “tlaih mơ̆ng klei rai luč hlăm lăn ala kyua klei tluh”, jing grăp čô brei păn kjăp klei Aê Diê ƀuăn hlăm bruă hriăm Klei Aê Diê Blŭ leh anăn bi mguôp hlăm klei wah lač. Aê Diê “brei leh kơ drei klei Ñu ƀuăn yuôm leh anăn prŏng snăk” (êlan 4), ƀiădah tơdah drei amâo hriăm Klei Aê Diê Blŭ snăn drei amâo mă klei ƀuăn anăn kơ pô ôh.
Drei hur har dlăng, hriăm Klei Aê Diê Blŭ leh anăn bi mguôp hŏng Khua Yang grăp hruê mơ̆?
Wah lač: Ơ Khua Yang, kâo bi mni kơ Ih jing Pô brei leh kơ kâo klei hdĭp leh anăn klei huĭ mpŭ. Akâo kơ Ih đru kâo păn kjăp klei ƀuăn yuôm Ih, kriăng hriăm kơ Khua Yang leh anăn wah lač čiăng kơ kâo mă tŭ klei hdĭp leh anăn klei huĭ mpŭ, klei dưi hŏng klei mplư, leh anăn myơr klei hdĭp kâo jing mnơ̆ng myơr bi mơak kơ Ih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Markôs 10
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
