Jôsuê 5:9-12
“Tơdah iĕm mơ̆ng pơm kiơ̆ nơ̆r Kră Yang ‘Bok Kei-Dei iĕm, dôm tơdrong pŭn hiôk gô jur tơ iĕm đei hloi.” (Bơtho Khôi juăt 28:2)
Nơ̆r jet tơchĕng pơwao:
– Yua đơ̆ng yơ kon pơlei Isơrael gơh huay kơ mơlâu?
– Giĕng Năm Brih blŭng a tơ Teh Đak pơkă wă tơ’bôh tơdrong kiơ?
– Tơdrong kiơ wă tơ’bôh kơ lu bơ̆n oei arih chu nơ̆r Kră Yang?
Đơ̆ng rŏng kơplah đĭ đăng bơngai drŏnglo Isơrael đei chu kăt tơdra akar, Kră Yang khan: “Năr âu Inh hŭt lê̆ boih tơdrong mơlâu lu iĕm đơ̆ng lu bơngai dêh Êyiptơ, lei na đe krao anăn anih âu Gilgal, mă truh dang ei.” (trong 9). Năr hơdrol, lu sư pơm đĭch tơ dêh Êyiptơ, đơ̆ng noh puăt jĭt sơnăm arih ‘bơ̆t âu ‘bơ̆t to tơ lăm char glă yua đơ̆ng ưh kơ chu nơ̆r Kră Yang, păng lăm măt lăng lu bơngai Êyiptơ lu noh minh khul đĭch kơdâu ôn. Jơ ‘nâu, lu sư ưh pă layơ wă pơm đĭch đe Êyiptơ dơ̆ng bơih. Lu sư đei Kră Yang chông ba mơ̆t tơ Teh Đak Pơkă păng lu sư gô blah pơpuh lu ayăt. Yua đơ̆ng chu kăt tơdra akar na “tơdrong mơlâu” lu sư gơh “tơgrol hŭt”, na đe krao anih noh Gil gal, wă khan “tơgrŏl hŭt”.
Kon pơlei Isơrael pơm Giĕng Năm Brih lăm puăn năr đơ̆ng rŏng kơ pơm Bơsŭn tơ Gil gal. Giĕng âu đơ̆ng Kră Yang pơjing wă kơ ‘blŏk hơdơ̆r kơ tơdrong dŏng pơklaih đe Isơrael kơplah sư hil phak lu kon kơdră bơngai Êyiptơ, mălei năm brih hnam ayơ đei pik pham kon triu ‘bơ̆t ‘măng hnam lu sư. Lu sư athei wei răk tơdrong giĕng âu kơplah mơ̆t tơ dêh mă Kră Yang ăn păng wei răk ling lang (LĐ Êyiptơ 12:24-27). Dang ei, lu sư chu yom nơ̆r Kră Yang na bơwei Giĕng Năm Brih đơ̆ng rŏng kơ noh kư̆m đunh ‘biơ̆ mơ̆n lu sư ưh pă bơwei giĕng âu yua kơ chăl arih gah bơhngol đĭ jur.
Kră Yang đei pơkă gô ăn hiôk kơ lu kon pơlei Isơrael tơdah lu sư mơ̆ng kiơ̆ nơ̆r Kră Yang khan, kơchăng pơm kiơ̆ dôm khôi juăt Sư (Bơtho khôi juăt 28). Yua kơ lu sư chu yom wă kăt tơdra păng wei răk Giĕng Năm Brih na đơ̆ng rŏng kơ pơm giĕng âu, Kră Yang ăn kơ lu sư tơmam lăm dêh “đak toh păng đak sut” (Jôsuê 5:6). Lăm sơnăm ‘noh lu sư gơh đei tơmam plei ‘long phe ‘ba lăm dêh Kanaan (trong 12). Tơdrong âu wă tơ’bôh Kră Yang ăn dêh âu kơ lu sư.
Giĕng Năm Brih noh trŏ pơlăp jơ năr wă kơ lăng tơ hơdrol sơ̆ ‘blŏk kơ tơdrong dŏng pơklaih, tơdrog tơpăt Kră Yang păng đei pơtrŭt wă kơ lăng tơ anăp, Giĕng Năm Brih blŭng a tơ dêh Êyiptơ wei wă tơdra tơdrong dŏng pơklaih đơ̆ng pơm đĭch wă yak năm tơ Teh Đak Pơkă. Giĕng Năm Brih tơ dêh Kanaan wă tơdra hlôi đơ̆ng char glă, mơ̆t tơ Teh Đak Pơkă. Kon pơlei Kră Yang athei oei wei răk nơ̆r Kră Yang wă kơ kĕ jei lu ayăt păng đei Kră Yang ăn pŭn hiôk lăm trong yak năm tơ anăp.
Jơ̆ Bơngai Lui, lu bơ̆n kư̆m gơh đei Kră Yang dŏng pơklaih đơ̆ng pơm đĭch kơ tơdrong yoch yua kơ đơ̆ng pham kăp Kon Triu, ‘noh Kră Yang Yêsu. Tơdrong “mơlâu” lu bơ̆n đei Kră Yang “tơgrŏl hŭt lê̆”. Lu bơ̆n pơtơm arih lăm chăl arih ‘nao lăm Kră Yang Yêsu, na kư̆m athei oei yak năm kiơ̆ kơ Yang Bơhngol ‘Lơ̆ng chông anhăk lăm tơdrong chu yom nơ̆r Sư wă kơ gơh đei chăl arih kĕ jei lăm trong yak năm tơ anăp păng gơh đei pŭn hiôk đơ̆ng Kră Yang pơkă ăn.
Ơ Kră Yang, inh bơnê kơ Ih yua kơ Ih hŭt lê̆ tơdrong kơnê̆ ‘mê̆ ‘mach inh, tơdrong mơlâu lăm chăl arih inh yua kơ inh đei pơm đĭch kơ tơdrong yoch. Apinh Ih ăn kơ inh ling lang arih chu yom Ih. ‘blĕp trŏ hăm pơtơm arih ‘nao mă Ih đei ăn kơ inh. Krao khan yua anăn Kră Yang Yêsu Krist, Amen.
Lu bơ̆n hăm oei arih chu yom nơ̆r Kră Yang lăm tôm tơdrong ưh?
Đŏk Sơ̆p Hla bơar ‘Bok Kei-Dei lăm pêng sơnăm: Markôs 7
Kênh Youtube BHKTHN:
