Yausuas 5:9-12
Nqe cim:
“Yog nej mloog tus TSWV uas yog nej tus Vajtswv lus, nej yuav tau tej koob hmoov no” (2 Kevcai 28:2)
Lus nug xav:
– Vim li cas Vajtswv thiaj tshem cov Yixayees txoj kev txaj muag tawm?
– Ua Kevcai Hla Dhau thawj zaug hauv Tebchaws Coglus muaj lub ntsiab dabtsi?
– Dabtsi qhia tau hais tias peb tabtom ua neej mloog Vajtswv lus? thiab ua raws li Vajtswv lus?
Tom qab txhua tus txiv neej Yixalayees tau ua kevcai txiav tas lawm, Vajtswv hais tias: “Txawm yog nej ua luag qhev thiab poob ntsejmuag thaum nej nyob nram tebchaws Iziv los hnub no kuv pub kom nej rov tau ntsejmuag.” (Yausuas 5:9). Yav tas los lawv yog qhev nyob hauv tebchaws Iziv, tom qab ntawd lawv tau taug kev mus mus los los tom roob moj sab qhua tau 40 xyoo vim lawv tsis mloog Vajtswv lus. Hauv cov neeg Iziv qhovmuag, lawv tsuas yog ib pab neeg ua qhev khiav dim xwb. Tiamsis txij no mus lawv yuav tsis ua cov Iziv qhev ib zaug ntxiv lawd. Vajtswv tau coj lawv los rau hauv Tebchaws Coglus, thiab lawv yuav yeej lawv cov yeeb ncuab. Vim lawv mloog Vajtswv lus thiab ua kevcai txiav, lawv txoj kev poob ntsejmuag tau Vajtswv muab tshem tawm lawm. Vim li ntawd luag thiaj hu qhov chaw ntawd ua Nkilenkas lub ntsiab txhais tias “tshem tawm” lossis “dov tawm”.
Cov Yixalayees ua Kevcai Hla Dhau thaum lub sijhawm plaub hnub tom qab uas cov Yixayees tsuam tau yeej rau ntawm Nkilenkas. Vajtswv rhawv tsim txoj kevcai no los nco txog hnub uas Nws cawm cov Yixayees dim ntawm tebchaws Iziv. Thaum Vajtswv rau txim rau cov tub hlob hauv tebchaws Iziv, Nws hla dhau cov tsev uas muaj ntshav menyuam yaj pleev rau ntawm cov ncej qhov rooj thiab saum qhov rooj. Thaum mus rau hauv lub tebchaws uas Vajtswv coglus lawm lawv yuav tau coj txoj kevcai no mus ibtxhis (Khiavdim 12:24-27). Tamsim no lawv mloog Vajtswv lus thiab ceev txoj Kevcai Hla Dhau tiamsis yog tom qab tau ntev lawm lawv tsis ua, vim lawv lub neej sab ntsujplig txav deb ntawm Vajtswv lawm.
Vajtswv tau coglus hais tias Nws yuav foom koob hmoov rau cov Yixayees yog lawv mloog Nws lus thiab ua raws li Nws tej lus qhia (2 Kevcai 28). Vim lawv mloog Vajtswv lus, ua kevcai txiav thiab ua Kevcai Hla Dhau, hnub tom qab ntawd xwb Vajtswv cia lawv noj tej qoobloo hauv lub tebchaws uas muaj “mis nyuj thiab zib ntab” (Yausuas 5:6). Xyoo ntawd lawv kuj tau noj tej qoobloo hauv tebchaws Kana-as. Qhov no qhia hais tias Vajtswv tabtom muab lub tebchaws ntawd rau lawv ua lawv tug lawm.
Kevcai Hla Dhau yog ib lub sijhawm uas Vajtswv haiv neeg tig rov saib yav tag los, nco txog Vajtswv txoj kev cawmdim, kev ncaj ncees thiab txhawb zog kom muaj kev ntseeg rau yav tom ntej. Kevcai Hla Dhau thawj zaug hauv tebchaws Iziv yog ib lub cim uas qhia hais tias lawv tau dim ntawm kev ua qhev thiab yuav mus rau lub Tebchaws Coglus. Kevcai Hla Dhau thawj zaug hauv tebchaws Kana-as yog ib lub cim uas qhia hais tias lawv tau tawm hauv tiaj suabpuam mus rau Tebchaws Coglus lawm. Txuas ntxiv lawv yuav tsum mloog Vajtswv lus kom lawv ntaus yeej lawv cov yeebncuab thiab tau txais Vajtswv txoj koob hmoov hauv txoj kev tom hauv ntej uas yuav txeeb lub tebchaws.
Peb uas yog ib tug ntseeg, peb kuj tau txais kev cawmdim ntawm txoj kev ua qhev rau kev txhaum los ntawm Tswv Yexus Khetos cov ntshav dawbhuv. Peb txoj kev txaj muag thiab kev txhaum kuj raug Vajtswv muab tshem tawm lawm. Peb pib dua ib lub neej tshiab hauv Yexus Khetos. Vim li ntawd, txuas ntxiv peb yuav tsum ua neej raws li Vaj Ntsujplig coj thiab mloog Vajtswv lus, kom peb kovyeej hauv peb lub neej thiab thiaj tau txais tej koob hmoov uas Vajtswv tau cog lus pub rau peb.
Thov Vajtswv,
Tus Tswv, nyuam yaus ua Koj tsaug vim Koj tau tshem nyuam yaus txoj kev txhaum thiab kev txaj muag tawm lawm. Yav tas los nyuam yaus ua qhev rau kev txhaum, tiamsis Koj tau cawm nyuam yaus dim. Thov pab kom nyuam yaus niaj hnub mloog Koj lus thiab ua neej kom phim lub neej tshiab uas Koj tau pub rau nyuam yaus. Nyuam yaus tuav Tswv Yexus Khetos lub npe thov Amees.
Peb puas ua neej mloog Vajtswv lus kawg siab kawg ntsws?
Nyeem Vajluskub hauv peb lub xyoo: Malakaus 7
Kênh Youtube BHKTHN:
